Unha proposta teatral: A soidade do asasino de Carlos G. Reigosa

A soidade do asasino, de Carlos G. Reigosa. Xerais, 2018.

A editorial Xerais vén de publicar na colección Fóra de xogo a peza teatral A soidade do asasino de Carlos G. Reigosa.

A obra está centrada na dialéctica entre un asasino e a súa vítima, que durante o tempo que dura a obra teiman sobre a conveniencia ou non do asasinato, rematando dun xeito inesperado para o lector.

Destinada para lectores a partir dos 15 anos (xuvenil) onde non abundan as propostas teatrais. Ben sexa para unha lectura compartida ou para a súa representación, é un título que debe ser tido en conta para os recursos da biblioteca escolar de Secundaria.

Enlace ao programa Cada día un libro

http://www.crtvg.es/tvg/a-carta/a-soidade-do-asasino-de-carlos-g-reigosa

Nina e Antón

Antonio VENTURA e Alejandra ESTRADA: Nina e Antón, Kalandraka

Que pode haber máis bonito que ler para outros? Quizais ser ese outro?

Con este libro seguramente non imos saír de dúbidas, pero disfrutaremos dun anaco da tenra historia de amor entre unha nena e o seu gato. Talmente como se os estivésemos vendo polo burato da pechadura.

Todos os rapaces deberían poder sentir polo menos unha vez ao día ese agarimo que hai detrás dunha mirada compartida a un conto con fermosas ilustracións. Como o que ven Nina e Antón. Como este mesmo.

Destinado a primeiros lectores, é unha boa proposta para compartir nas lecturas compartidas das nosas bibliotecas escolares , por exemplo. Con calma, saboreando o momento, porque é desas obras que dá pena que rematen.

Un novo poemario: Ring, ring...! Quen rima?

Hércules Edicións publica o libro de poemas Ring, ring...! Quen rima? de Ana María Fernández, ilustrado por Enrique López.

En 46 poemas podemos ir percorrendo diferentes espazos poéticos, que se van deseñando xa no primeiro texto, titulado Ring, Ring. Destinado a primeiros lectores, sería unha boa proposta que as nosas bibliotecas se enchesen de persoas poema para conformar os libros, que coma este, se poden ofrecer de viva voz. Tamén, nas seleccións temáticas ou nas mochilas viaxeiras. 

Eis os primeiros versos do poema O  lobo:

Ven o lobo!

Ven o lobo!

sobe, aos poucos, a escaleira

e eu non sei onde agocharme,

tremo de mala maneira.

O manga Tam de Anémona de Río

Retranca Editora vén de publicar neste 2018 Tam de Anémona de Río (Aldara Álvarez García).

A autora formouse na escola profesional de banda deseñada e ilustración O Garaxe Hermético de Pontevedra. No último curso creou Tam, a personaxe protagonista da súa primeira obra publicada, que levou o Premio Fin de Curso 2017.

Considerado o primeiro manga galego, Tam conta a historia dunha moza que é convidada a unha cea de antigos estudantes e a preocupación e presión que produce nela enfeitarse para a ocasión, seguindo os ditames da moda.

Destinado a lectores xuvenís, xa está dispoñible para as bibliotecas escolares nas maletas de Banda Deseñada de Secundaria e algúns clubs  de lectura xa están a ler este manga nas súas sesións.

Elmer no Día Mundial do Libro

A editorial Kalandraka vén de publicar na Elmer de David McKee. 

Conmemoramos este ano 30 anos da súa publicación.

Este álbum clásico da literatura infantil e xuvenil, todo un cántico á tolerancia, fala da importancia de respectar  e aceptar as diferenzas, que farán as nosas bibliotecas máis ricas e inclusivas.

Na biblioteca, na casa, nas seleccións lectoras, nas mochilas viaxeiras, é bo celebrarmos a diversidade que proclama Elmer.

O lapis máxico de Malala, de Malala Yousafzai

O lapis máxico de Malala, de Malala Yousafzai, Xerais

Dende Paquistán para o mundo. Un precioso álbum sobre o valor desmedido das palabras e a súa maxia, que nos conta en primeira persoa como unha serie televisiva pode facernos soñar cun lapis máxico, pero a propia vida fainos sentir que “calquera lapis pode selo”.

Describe as ansias dunha nena por facer felices aos demais, si, pero tamén denuncia que clasificar o lixo non abre portas á liberdade das nenas, como si o fan a escola e a familia. Decididamente unha historia imprescindible para ver e dar que pensar e falar á rapazada. Porque calquera día do ano é Día da Paz, tan desexada en Siria nestes momentos.

A Casa Grande de João Manuel Ribeiro

João Manuel Ribeiro, A Casa Grande, Hércules Ediciones, 2018.

O segundo título deste autor portugués que nos presenta Hércules é unha proposta interesante para unha lectura compartida. Trátase dunha sorte de decálogo do “ben vivir” harmonioso e pacífico, que pon no seu sitio conceptos tan importantes como: liberdade, honestidade, amor, perdón, tempo, silencio, palabra, xogo, riqueza, cidadanía...

Hai metáforas e mensaxes probablemente claras para os lectores autónomos, pero tamén outras que seguramente é mellor desentrañar nunha sosegada conversa, na casa ou na biblioteca escolar. Sen esquecer comentar as fermosas imaxes de Ricardo Rodrigues, claro está.

Para celebrarmos o Día Mundial da Poesía:"Cara de velocidade" de Marga Tojo

A editorial Kalandraka acaba de publicar o libro de poemas Cara de velocidade co que Marga Tojo gañou o X Premio Internacional Cidade de Orihuela de Poesía . María Hergueta ilustra o libro.

Estamos ante unha superheroína con superpoderes que é quen de transformar o cotián en algo excepcional a través do humor, a música,  a fortaleza, o optimismo e a imaxinación fronte á adversidade, e que, con capa e anteface, apréndenos a pór Cara de velocidade.

Superpoderes

Zamarra, 

chaquetón, 

casaca, 

chuvasqueiro,

gabardina, 

chaqueta con botón. 

Desde que aprendín 

a poñer o abrigo,

voo.

Destinado a partir de lectores autónomos, este poemario vén acrecentar os fondos de poesía das bibliotecas escolares para que un día coma hoxe proclamemos que a poesía esta nas cousas que nos rodean.

Lembramos e difundimos tamén, os actualizados "Cinco motivos para ler poesía" de Fran Alonso

A batalla da pequena Chañán Curi Coca de Rosa Aneiros

O libro, editado por Xerais e destinado para un lectorado autónomo, ten como un dos temas máis destacados os desafiuzamentos, vividos en carne propia pola nena Noelia e a súa familia. A pesar dos esforzos da nai de agochar unha situación tráxica, a protagonista vai ser quen, achegando e revivindo no seu maxín as lendas incas de defensa da terra que lle contaba a súa avoa Elizabeth, de defender o seu territorio “a casa” coa axuda da súa veciña “Mamá Huaco” que tamén se resiste a abandonar o seu fogar pero por motivos diferentes: é maior e está soa.

Abordar determinadas situacións como a falta de recursos por mor do paro, os desafiuzamentos, a vellez ou a soidade faise necesario porque presenta a realidade de moitas persoas e fogares, e tamén dalgúns dos nosos rapaces e rapazas. Contarmos nas bibliotecas escolares con textos que nos falen dos nosos problemas fará entendermos o mundo e intentar darlles solucións como fai con afouteza Noelia, a pequena Chañán Curi Coca.

A batalla da pequena Chañán Curi Coca de Rosa Aneiros, vén de ser seleccionada finalista no apartado de Lilteratura infantil da Gala do Libro 2018.

Allumette, de Tomi Ungerer

Allumette, de Tomi Ungerer, Kalandraka

ALLUMETTE é a suma de dous fantásticos ingredientes: unha emocionante historia (que recoñecemos de contado) e unha ollada crítica sobre a -ás veces- desastrosa sociedade na que vivimos.

Pero o máis importante, e a razón pola que este libro pode estar no andel das nosas bibliotecas, nas lecturas compartidas, nos apadriñamentos lectores ou nos clubs de lectura é porque  fala sobre o importantísimo papel dos rapaces para encararmos un futuro máis esperanzador, a solidariedade.

Quizais a nena protagonista faga boas migas co señor Xe, aquel personaxe de José Campanari en E que podo facer eu? (OQO Editora, 2008). Cómpre lelo para averigualo.

RAPAZAS 25 LITERATURA INFANTIL E XUVENIL GALEGA PARA A IGUALDADE

Pilar Sampedro,  experta en Literatura Infantil e Xuvenil (foi integrante do equipo da Asesoría de bibliotecas escolares),  vén de publicar co gallo da celebración dos 25 anos da publicación de Rapazas de Agustín Fernández Paz dous taboleiros en Pinterest cunha selección de títulos para a igualdade. Esta mirada literaria é moi necesaria nestes tempos que nos tocan vivir, tanto para as persoas mediadoras como para os lectores e lectoras que precisan tamén de referentes femininas para construír un mundo igualitario e con perpectiva de xénero.

• Taboleiro no que se mostran aqueles libros dirixidos ao lectorado infantil e  nos que se mira (e le) con perspectiva de xénero

https://www.pinterest.es/pilarsampedro2241/rapazas-25-literatura-infantil-galega-para-a-igual/

• Taboleiro no que mostran aqueles libros dirixidos ao lectorado xuvenil e nos que se mira (e le) con perspectiva de xénero

https://www.pinterest.es/pilarsampedro2241/rapazas-25-literatura-xuvenil-galega-para-a-iguald/

Máis alá do mes de marzo, cómpre ter en conta estes materiais coa intención de equilibrar e completar as coleccións das bibliotecas escolares. Da mesma forma, débense  de valorar estes recursos á hora de programar actividades ou facer propostas para os grupos de lectura.

"Ceiba de luz" de Manuel Lourenzo González

O premio Jules Verne 2017  acadouno o escritor Manuel Lourenzo coa novela Ceiba de Luz. 

Publicada en Xerais, Ceiba de luz é un achado de aventuras, de filosofía, dos mundos que xiran da man de dezaoito mozos e mozas científicos que parten na procura dun tesouro: a propia orixe, a identidade mesma, o ouro agochado na selva amazónica.

Dirixida  a un lectorado xuvenil, a lectura de  Ceiba de luz ben pode ser unha proposta a ter en conta nos clubs de lectura dos nosos institutos.

Unha figura humana da arte indíxena da América precolombina e un narrador experimentado condúcennos nunha expedición ao corazón mesmo do Perú , a unha antiga civilización e a moitos segredos.

Formigas, risas, flores e dinosauros, de Euloxio R. Ruibal

Achegamos hoxe Formigas, risas, flores e dinosauros de Euloxio R. Ruibal, publicado en Galaxia .

Catro historias imaxinativas para deleitarse non só co argumento, senón tamén coas palabras escollidas polo autor – “un home de teatro”- para narralas.

En realidade, son historias de feliz final: a de Xoana, a formiga loura que aprende a lingua das formigas mouras; a de Claudia, á que se lle logra unha curiosa flor; a de Chinto, a súa risa e a súa bici; e a de Santi e o seu Iagosauro , que xuntos funcionan talmente como superheroes.

Dirixido ao lecturado autónomo, o libro contén valiosas metáforas en si mesmas que tamén poden funcionar como frutíferas pontes: ao Principiño, ao Espantallo amigo, a Plinio ou Estrabón, ao léxico relacionado cos sons que emiten distintos animais...

As estrambóticas aventuras do barón de Münchhausen, de Pinto & Chinto

As estrambóticas aventuras do barón de Münchhausen, de Pinto &Chinto, Bululú

Outra actualización dun clásico literario: os divertidos relatos “ordenados” que Rudolph Erich Raspe compilara e Gottfreid August Bürger versionara.

A nota aclaratoria do inicio xa dá pé a entender por que estas aventuras son estrambóticas (que non extravagantes). Son retallos de guerra, caza... “cousas tristes que fan rir”, que diría Castelao.

Destinado  a  partir de lectores autónomos, a súa lectura pode dar pé (nalgún club, por exemplo) a seguirlles a pista a outros nobres ilustres, como O barón rampante ou O vizconde demediado, de Italo Calvino.

Lecturas para a paz: "Por que?" de Nicolai Popov

A editorial Kalandraka acaba de publicar Por que? de Nikolai Popov. 

O autor, que viviu  os horrores da 2ª Guerra Mundial, pregúntase  neste álbum cales son as causas das guerras e convida aos lectores e lectoras a reflexionar sobre os conflitos, desde os máis cotiáns ás grandes loitas para sementar unha cultura e educación para a paz, o diálogo e a tolerancia entre os máis novos.

Na presentación editorial indícasenos que "a senrazón da guerra, a violencia, a vinganza, a devastación e a morte asómanse en toda a súa crueza ás páxinas deste libro visual; unha fábula que comenza coa bucólica estampa dunha ra gozando do arrecendo dunha flor, ata a irrupción dun rato que a ataca para quitarlla. Xorde daquela unha loita entre dous bandos cada vez máis numerosos en individuos e medios bélicos que dá lugar a emboscadas e bombardeos. Dun prado florido, a un lugar desolado; dunha minucia, a un gran conflicto sen ter mediado nin unha soa palabra."

Este álbum cómpre telo en conta nas lecturas, nas seleccións e outras actividades que fagamos na biblioteca escolar para conmemorar  o Día escolar pola paz e non violencia.

Outros títulos :

A bruxa Discordia de Mamá Cabra e Carmen Gil

A historia do touro Ferdinando de Munro Leaf

O Valo de Carlos Labraña

Eu son Suleiman de Antonio Lozano

Camiños de auga  de Manuel Núñez Singala

Novidades de banda deseñada: "Xinfu na maldición guauchuki"

A editorial Xerais publicou a finais de 2017 Xinfu na maldición guauchuki de Adrián Morgade.

Este cómic infantil está incluído na colección Merlín cómic, da que forman parte tamén títulos como Marcopola.

Xinfu (que significa feliz en chinés) e Wini son dous cans que viven unha vida pracenteira até que descobren un óso que posúe un poder máxico que os vai trasladar a outro mundo, onde vivirán aventuras extraordinarias.

Destinado a partir de primeiros lectores (6-8 anos), vén acrecentar os títulos

(aínda escasos) de banda deseñada infantil en galego, que poden formar parte dos fondos da biblioteca escolar ou ben dunha selección de cómics para as mochilas viaxeiras.

Todo o mundo!

Despois de En familia, Hercules de Ediciones achega ao galego Todo o mundo! A vida ten moitas cores de Anja Tuckermann e con ilustracións de Tine Schulz. A tradución do alemán é de Rosa Marta Gómez Pato.

No álbum váisenos lembrando, con humor, cales son as orixes dos seres humanos e cales as súas necesidades básicas pero tamén que homes e mulleres tiveron que migrar ao longo da historia por múltiples razóns. Iso conformou sociedades diversas, con linguas e costumes diferentes que poderían levar a prexuízos, pero a convivencia en harmonía debe aproveitar a posibilidade que dá a multiculturalidade e o plurilinguismo para enriquecer a nosa sociedade.

Moitas son as posibilidades de lectura deste libro nas nosas bibliotecas, que son tamén diversas e multiculturais.

Teatro para ler e representar: O valo de Carlos Labraña

O valo de Carlos Labraña, ilustrado por Nuria Díaz, vén de ser publicado na Biblioteca Dramática galega, coeditada por Xerais e AGADIC.

A obra mereceu o IX Premio Manuel María de literatura Dramática Infantil no ano 2016.

No medio dun deserto, un neno soldado chanta unha bandeira e coloca un valo de arame, xusto onde no seu mapa marca a fronteira. Do outro lado do valo, Sahara, unha rapaza abandonada, que foxe da guerra, trata de convencelo de que a deixe pasar, xa que está procurando un pozo onde saciar a súa sede. Mirando as estrelas fugaces no firmamento, Sahara e o Soldadiño comparten idéntico ceo e comprenden que só na procura dos seus soños atoparán a liberdade. Peza dun único lance para dous personaxes, “O valo” propón unha emocionante reflexión sobre a igualdade e a paz entre todas as persoas e comunidades. (Presentación editorial)

Pallasos en Rebeldía, baixo a dirección de Iván Prado representan esta obra de Carlos Labraña.

Teatro para ler, para ver e tamén para representar nas actividades promovidas polas bibliotecas escolares, cando xa está próximo o Día Escolar da Non Violencia e da Paz.

Selección de poesía infantil

Como nas nosas bibliotecas lemos moita poesía, elaboramos un taboleiro no Pinterest  da Asesoría de Bibliotecas escolares cunha selección de títulos, á que chamamos Poesía infantil, dirixida fundamentalmente a primeiros lectores e lectores autónomos. Como toda escolla, ha medrar co tempo pero ben pode axudar a seleccionar recursos para as nosas actividades en torno á poesía ou acrecentar a colección da biblioteca escolar.

Pensando na biblioteca escolar: Saltón no camiño

Kalandraka acaba de publicar en galego Saltón no camiño, un dos libros clásicos de Arnold Lobel que vén acrecentar os títulos dispoñibles deste autor na nosa lingua.

Na súa viaxe, Saltón atopa a moitos personaxes  como uns escaravellos, un verme, unha mosca, un mosquito, unhas bolboretas ou  uns cabaliños do demo, e vive con eles unhas historias moi interesantes, que van enriquecer seu camiño.

Aínda que a ilustración ou o tamaño da letra nos fagan pensar que está destinado para os máis pequenos, a súa lectura pode resultar de interese para todas as idades.

Autor e título imprescindible nas nosas bibliotecas, moi acaído para pensarmos na biblioteca escolar. 

Dándolle a volta aos contos clásicos: Brancaneves e os 77 ananiños e Cincenta e as zapatillas peludas

A editorial Xerais vén de publicar  os contos Brancaneves e os 77 ananiños e Cincenta e as zapatillas peludas, ambos os dous da autoría de Davide Cali, con ilustracións de Raphaëlle Barbanègre e traducidos por  Anaír Rodríguez.

Na presentación editorial indícannos que son reinterpretacións dos contos clásicos e un canto á liberdade. Desde o humor cuestiónanse os estereotipos aceptados, que impiden a educación en igualdade de dereitos de oportunidades de nenos e nenas.

Indicados para primeros/as lectores/as, son boas lecturas para incluír nos fondos da biblioteca escolar co fin de traballar a coeducación, a iguadade de xénero e o dereito a decidir das persoas, nomeadamente as mulleres. 

Novidades de poesía

Achegamos tres novos títulos de poesía que poden formar parte do fondo das nosas bibliotecas escolares, das nosas maletas ou mochilas de poesía ou ben formar parte das recomendacións lectoras do Nadal.

O baúl de Domingo Quintas de Xoán Babarro, ilustrado por Estefanía Padullés e publicado en Hércules Edicións. A historia comeza cando o narrador decide abrir o vello baúl do bisavó e atopa unha morea de poemas escritos sobre cortizas de bidueiro. A partir de aí, cada páxina contén un deses poemas, acompañado de cadansúa ilustración.

A pel do mundo de Berta Dávila, ilustrado por Alba Cid e publicado na Colección Árbore, de Galaxia. O poemario está deseñado como unha viaxe a diferentes lugares do planeta. Canda o poema temos unha pequena explicación do lugar que se visita.

Anatomía da lingua (Lingua de amar, lingua de amor) de Antón Cortizas Amado, con ilustracións de Leandro Lamas e publicado pola AS-PG. Na súa presentación editorial di que nos fala en 31 poemas saídos "dun impo tan profundo como a noite", da lingua, da nosa lingua. Como obxecto para amar, como obxecto de amor, como palabra de futuro. Oficios de lingua, paisaxes de lingua, beixos de lingua todo está presente neste poemario.

Marilar Aleixandre, premio Raíña Lupa 2017

Imaxe de Marilar Aleixandre tomada da AELG

A escritora, profesora e académica, Marilar Aleixandre vén de recibir o Premio Raíña Lupa 2017 que convoca anualmente a sección de Cultura da Deputación de A Coruña, coa novela "A filla do Minotauro". Segundo o xurado  a obra galardoada é unha "relectura moi actual da mitoloxía grega cunha gran sensibilidade co patrimonio cultural". 

Felicitamos a Marilar, unha das autoras que máis se ten comprometido coas bibliotecas escolares e coa lectura en galego para os máis novos, atendendo sempre as demandas de colaboración que desde este ámbito se lle fixeron e ofrecendo ás persoas mediadoras, e ao profesorado en xeral, excelentes títulos para por nas máis dos lectores e das lectoras.

• Páxina persoal de Marilar Aleixandre
• Marilar Aleixandre na Wikipedia
• A noticia na Real Academia Galega

Na noite do 31 de outubro "Violeta quere ser vampiro. Un conto de Samaín"

Xerais vén de publicar o álbum Violeta quere ser vampiro.Un conto do Samaín  escrito por Ramón D. Veiga e ilustrado por David Sierra.

Como di na presentación editorial Coma todos os anos, a noite do 31 de outubro celébrase na casa de Violeta a festa do Samaín. Pequenos e grandes disfrázanse, xogan, bailan e contan contos ata ben entrada a noite, e malia os fantasmas, as bruxas e a Santa Compaña, ninguén se asusta porque, como di a avoa Pilar, «aos mortos non hai que terlles medo; cos vivos xa é outro cantar»

Neste álbum, ademais da historia de Violeta, temos incluída información sobre Vamtruvio e os vampiros riquiños, nese Manual de vampiro moderno que enche de humor o relato.

Lectura moi acaída para estes días que inundan de libros de medo e calacús as bibliotecas escolares.

A terra de Anna, unha historia sobre o clima e o medio ambiente

Kalandraka acaba de publicar A terra de Anna de Jostein Gaarder. A tradución do noruegués ao galego foi feita por David A. Álvarez.

Na presentación editorial dísenos que nos seus soños, Anna é quen de albiscar un planeta agonizante no futuro, con moitas especies desaparecidas da face da Terra a causa da contaminación e do cambio climático. Evitar que ese escenario apocalíptico se faga realidade é seu reto.

Esta novela de Jostein Gaarder, autor de obras como El mundo de Sofía, trata sobre o clima e o medio ambiente, e preséntase como unha fábula filosófica chea de optimismo.

Dirixida a lectores xuvenís, é unha boa proposta para formar parte dos fondos da biblioteca e  ler nos Clubs de Lectura, nomeadamente nestes tempos  no que a natureza do país sufriu importantes agresións e os máis novos precisan de ferramentas para entender o que está pasando e mirar para o futuro con esperanza. 

Por outro lado, hai que valorar a presenza de materiais en galego que enriquecen a adquisición do pensamento crítico e aportan outras miradas sobre o mundo, máis alá das sagas comerciais.

Exposición do Pergamiño Vindel en Vigo

Onte foi inaugurada a exposición do Pergamiño Vindel, o manuscrito que contén as sete cantigas de amigo de Martín Códax, que se poderá visitar no Museo do Mar de Galicia, en Vigo, até o 4 de marzo de 2018.

O pergameo pertence actualmente á Morgan Library de Nova York, que llo cedeu á Universidade de Vigo para esta exposición, pero moitos foron os avatares que pasou o manuscrito, datado entre os séculos XIII ou XIV.

Este importante acontecemento pode dar pé a multiples traballos interdisciplinares coordinados desde a biblioteca escolar: liñas do tempo, estudo da literatura medieval, vinculación coa música, traballos de paleografía, selección de recursos...e por suposto, a visita á exposición do pergamiño, que está acompañada de 50 pezas de arte vinculadas á temática.

No ano 1998 a Editorial Galaxia editou un libro sobre as cantigas de Martín Códax que inclúe unha copia do Pergamiño Vindel e un CD coas sete cantigas. Este recurso pode ser de utilidade para os traballos de investigación que se fagan en torno ao Pergamiño Vindel.

Antonio García Teijeiro, Premio Nacional de Literatura Infantil e Xuvenil

O poeta Antonío García Teijeiro vén de ser galardoado co Premio Nacional de Literatura Infantil e Xuvenil polo libro Poemar o mar, do que dabamos conta na entrada Moita poesía.

Nos Encontros do Plan de Mellora de Bibliotecas Escolares 2016/2017, Antonio falounos de que a poesía non se ensina, fíltrase.

Moitos parabéns a García Teijeiro por este recoñecemento.

A señorita Bubble de Ledicia Costas

Editada por Xerais e ilustrada por Andrés Meixide, vén de publicarse a nova novela de Ledicia Costas, A señorita Bubble. 
Segundo a autora é unha homenaxe ás mulleres inventoras que, "como ocorre en moitos outros ámbitos, foron invisibilizadas ao longo da historia". O relato está cargado de fantasía e marcado pola estética steampunk.
A señorita Bubble tamén  é unha homenaxe a diferentes escritores e cineastas como Jules Verne, Tim Burton ou Roald Dahl.
Personaxes como a señorita Bubble, Sofi, Noa ou Vincent farán un canto á liberdade e imaxinación fronte a intrasixencia e ignorancia  da sociedade que xulga e rexeita o diferente.
Indicada a partir de lectores autónomos, non debe faltar nas bibliotecas escolares.

Chamando á Terra, novo programa de libros da Radio Galega

O sábado 9 de setembro comezou a emitirse na radio galega o programa Chamando a terra que ten como protagonista o libro en galego. Está dirixido pola xornalista e escritora María Solar e que conta coa colaboración de Montse Pena Presas, Malores Villanueva e Alba Cid.

O programa, que se emite os sábados entre tres e catro da tarde, ten como finalidade estimular as ganas de ler de todos os públicos e en todos os xéneros. Lecturas, entrevistas, recensións de libros ou opinións son seccións fixas deste programa que comeza.

Seguiremos con atención este novo programa que achega novas da Literatura Infantil e Xuvenil en galego. Asimesmo pode servir de modelo para futuros programas sobre libros desenvolvidos polas bibliotecas escolares.

Podedes escoitar os dous primeiros podcast no seguinte enlace

María Victoria Moreno será homenaxeada nas Letras Galegas 2018

María Victoria Moreno

© Archivo da familia de María Victoria Moreno

O 17 de xuño, mentres estabamos a celebrar a grande festa da lectura na X Xornada dos Clubs de lectura, a Real Academia Galega decidía adicar o Día das Letras Galegas 2018 a María Victoria Moreno, escritora da literatura infantil e xuvenil. 

Nacida en Estremadura, exerceu a docencia en diferentes lugares de Galicia pero foi en Pontevedra onde se instalou definitivamente até o ano da súa morte, en 2005. Legou a súa biblioteca ao IES Torrente Ballester, onde foi profesora os últimos anos de docencia. A biblioteca do Torrente leva o seu nome.

Algúns dos seus libros destacados son Leonardo e os fontaneiros (1986) Premio O Barco de Vapor de 1985, Anagnórise (1989), que formou parte da lista de honra dos IBBY ou Guedellas de seda e liño (1999), mención especial White Ravens en 2002. En Diario da luz e a sombra (2004) fai unha reflexión sobre os efectos da enfermidade que padecía.

Destaca ademais por ser defensora e impulsora do galego ( a miña relación con Galicia e a miña opción pola súa lingua é simplemente unha historia de amor), tradutora, libreira, editora (dirixiu a colección Árbore da Editorial Galaxia) e autora de materiais didácticos de lingua e literatura galegas, como Literatura galega século XX (Galaxia).