Mostrando entradas con la etiqueta Recursos. Mostrar todas las entradas
Mostrando entradas con la etiqueta Recursos. Mostrar todas las entradas

29/1/20

Libros para mediadores/as de lectura I: Da Carapuchiña ao señor Lamote

Miguel Vázquez Freire vén de publicar en Xerais Da Carapuchiña ao señor Lamote.Clásicos da literatura para a infancia e a mocidade en lingua galega.

O autor propón neste libro coñecer  a LIX universal e faino percorrendo a historia da literatura infantil e xuvenil desde a Carapuchiña vermella até o Ramón Lamote de Paco Martín.

Sabedores de que moitos descoñecemos a existencia destas versións ao galego de clásicos universais e tamén na necesidade de coñecermos o canon da LIX, este ensaio é ben oportuno para as bibliotecarias e bibliotecarios escolares e para as mediadoras de lectura porque como di o autor na presentación “ os mellores libros para a infancia e a mocidade son os mellores libros que calquera, incluídos nenos e mozos, poden ler;os libros, logo máis universais, os libros para todos”.

De moito interese son tamén as referencias que fai ao cine nas 32 propostas e a bibliografía que as acompaña.




19/7/19

Guía de literatura infantil e xuvenil para a igualdade


A Secretaría Xeral de Igualdade vén de publicar a  Guía de literatura infantil e xuvenil para a igualdade.

Coordinada por Pilar Sampedro, esta guía ofrece unha selección de libros publicados nos anos 2014, 2015 e 2016, distribuídos en tres tramos en función da idade ou competencia lectora. As obras escollidas alentan a reflexión e o debate sobre o papel da muller na sociedade ou o concepto de xénero e aportan referentes necesarios de mulleres, de novas masculinidades e diversidade de opcións sexuais.
Cómpre termos en conta esta guía nas seleccións que fagamos en torno á igualdade e coeducación. Asi mesmo é unha ferramenta moi útil para achegar recursos ás bibliotecas escolares.

30/1/18

Lecturas para a paz: "Por que?" de Nicolai Popov

A editorial Kalandraka acaba de publicar Por que? de Nikolai Popov. 
O autor, que viviu  os horrores da 2ª Guerra Mundial, pregúntase  neste álbum cales son as causas das guerras e convida aos lectores e lectoras a reflexionar sobre os conflitos, desde os máis cotiáns ás grandes loitas para sementar unha cultura e educación para a paz, o diálogo e a tolerancia entre os máis novos.
Na presentación editorial indícasenos que "a senrazón da guerra, a violencia, a vinganza, a devastación e a morte asómanse en toda a súa crueza ás páxinas deste libro visual; unha fábula que comenza coa bucólica estampa dunha ra gozando do arrecendo dunha flor, ata a irrupción dun rato que a ataca para quitarlla. Xorde daquela unha loita entre dous bandos cada vez máis numerosos en individuos e medios bélicos que dá lugar a emboscadas e bombardeos. Dun prado florido, a un lugar desolado; dunha minucia, a un gran conflicto sen ter mediado nin unha soa palabra."
Este álbum cómpre telo en conta nas lecturas, nas seleccións e outras actividades que fagamos na biblioteca escolar para conmemorar  o Día escolar pola paz e non violencia.
Outros títulos :
A bruxa Discordia de Mamá Cabra e Carmen Gil
O Valo de Carlos Labraña
Eu son Suleiman de Antonio Lozano
Camiños de auga  de Manuel Núñez Singala

29/12/17

Selección de poesía infantil



Como nas nosas bibliotecas lemos moita poesía, elaboramos un taboleiro no Pinterest  da Asesoría de Bibliotecas escolares cunha selección de títulos, á que chamamos Poesía infantil, dirixida fundamentalmente a primeiros lectores e lectores autónomos. Como toda escolla, ha medrar co tempo pero ben pode axudar a seleccionar recursos para as nosas actividades en torno á poesía ou acrecentar a colección da biblioteca escolar.

9/9/16

A LECTURA, CHAVE DO FUTURO. Guía para a lectura en familia.

Recomendamos a guía dixital  A lectura, unha chave de futuro, porque nos pode dar boas ideas para tratar a lectura coas familias e para deseñar orientacións para a lectura en familia desde a biblioteca escolar. 
É un proxecto de Letra en Obras, o portal educativo Botóns e da Xunta de Galicia, a través da Secretaría Xeral de Cultura.
O recurso está dividido en dez apartados nos que se describe a importancia do hábito lector para o futuro dos nenos e das nenas, os primeiros pasos na animación á lectura, o tipo de libros máis axeitados para cada idade, regras básicas para a lectura en familia,a lectura no mundo dixital,  o papel das librarías e bibliotecas, tamén a escolar, como espazos comúns de lectura. Propón asimesmo algunhas actividades para facer na casa en torno aos libros.
Complétase o recurso co apartado Compartindo experiencias onde persoas destacadas do mundo da literatura, do ensino, das bibliotecas e librarías e de diferentes asociacións contan a súa experiencia e dan algunhas claves para a animación á lectura.

10/12/15

Ler ciencia: Cor animal


Facémonos eco dun recurso informativo en galego, de interese para as bibliotecas escolares. Kalandraka publica un libro que achega a ciencia os máis pequenos. Trátase dun álbum escrito por Agustín Agra e ilustrado por Maya Hanisch. 

Cunha linguaxe adaptada ao alumnado de infantil e primaria descríbense trinta especies animais de diferentes lugares do mundo. Acompañadas dunha ilustración en collage dixital aprendemos como os animais marcan o seu terreo, como cortexan as femias, como se reproducen, como se camuflan, por que emigran, canto miden, etc.
O álbum ben pode ser unha recomendación lectora  para as familias a través da mochila viaxeira ou formar parte da selección de recursos cando se traballan os animais.

20/10/15

Poesía Hexágono. Ollada e Experiencia. Proposta e resposta nas aulas

Poesía Hexágono. Ollada e Experiencia. Proposta e resposta nas aulas

O selo editorial Apiario presenta este libro para docentes que queren traballar coa poesía nas aulas. Xa no prólogo, Agustín Fernández Paz quere derrubar os muros para que a literatura, neste caso a poesía, se desprenda do enfoque historicista e que estimule as capacidades creativas do alumnado. Lémbranos Fernández Paz a Rodari na Gramática da Fantasía: “A cuestión é que na escola se len os textos para xulgalos e clasificalos, non para comprendelos. A peneira da corrección retén e revaloriza as pedras, deixando escapar o ouro.”
Nos seis ensaios que compoñen o libro, seis poetas, fannos cadansúa proposta :

Tamén conta cun blog onde se pode atopar material extra para continuar co traballo na aula.

Facer chegar a poesía á mocidade é labor ben complicado. Agradecemos a Apiario esta aposta tan decidida.



25/5/15

Sira e o robot. Adventures on Titan. Galego e inglés con música


Sira e o robot. Adventures on Titan é un libro disco de Mark Wiersma e Miguel Mosquera 
As ilustracións de Iván Sende resultan moi adecuadas, especialmente as máis panorámicas como a do colexio e destaca pola súa orixinalidade como a da nave espacial en forma de hórreo que nos lembra aquela serie de nome Anamarciana de Alberto Varela, na que no firmamento, entre os planetas aparecían as vacas. 
Para ler e escoitar, para cantar acompañando as voces a modo de galeoke
Diferentes ritmos musicais: hip hop, rap, lied... 
Plurilingüísmo: galego, castelán, inglés, francés, portugués, chinés, alemán
A modo de teatro radiofónico, as voces do narrador e a narradora así como a de cada un dos personaxes, condúcennos a unha visión imaxinativa.
Referencias a Luar, a catedral de San Google, Leo Arremecaghona ou a clase de twitter sitúannos na máis salvaxe actualidade. E os valores a pé de obra, eses valores realmente plurais que non agachan imperios encubertos. Grazas pola frescura!
Terá continuidade?

20/5/15

Un percorrido pola vida e as obras de Gaudí

Dàlia Adillon Marsó crea o texto e as ilustracións desta pequena biografía ilustrada de Gaudí, traducida por Xosé Ballesteros e dirixida a lectores a partir dos catro anos.
Esta obra resultou finalista do VII Premio Internacional Compostela de Álbum Ilustrado. E con ela continúa esa liña de álbumes relacionados con artistas e obras, polas que xa teñen pasado Velázquez, Picasso e Van Gogh.
Libros necesarios para autores imprescindibles.
Libros de arte.

6/5/15

Poetas no mapa.


http://culturagalega.gal/noticia.php?id=25206&soportal=lg3
A AELG (Asociación de Escritores en Lingua Galega) fixo público un mapa de poetas, realizado por Noelia Gómez. Uns maís coñecidos que outros, unhas con máis obra e outras.. pero todas elas con videos de recitados na páxina da asociación.
Como noutros ámbitos, na costa concéntranse tamén as persoas creadoras de poesía. Démoslle unha volta á xeografía mentres escoitamos poemas e coñecemos / recoñecemos poetas. Cada un de nós pode buscar quen está máis perto da súa localidade ou da súa sensibilidade (con rima, tamén).

20/4/15

Animais, animais... e paseando pola obra dun gran arquitecto

"Cor animal é un libro que achega de forma amena unha trintena de animais de difeentes lugares do mundo, presentándoos cun sinxelo texto descritivo e cunhas chamativas ilustracións elaboradas coa técnica do collage dixital, que destacan polo seu extraordinario colorido, as sorprendentes texturas e a orixinal fisonomía dos seus protagonistas.
Pensada para primeiros lectores, a partir dos catro anos, está escrita por Agustín Agra (que fai a asúa primeira incursión nesta editorial) e ilustrada por Maya Hanisch a base de recortes de revista e xornal, estampados de correo postal, tipografías, papel pintado con pinceladas de tinta, trazos soltos ou retais
de materiais téxtiles." 
Da presentaicón editorial.
Lembremos que nesta editora podemos atopar a colección de "Animais extraordinarios", en gran formato. Sempre son ben recibidos estes produtos nas nosas bibliotecas.

3/3/15

Páxina de literatura infantil e xuvenil

Lupa del cuento é unha páxina de literatura infantil e xuvenil en español, "con recursos para a lectura, o ensino, a aprendizaxe, o ocio e a creatividade. O corazón de "Lupadelcuento" é unha base de datos de libros de literatura infantil/xuvenil e libros informativos que se actualiza diariamente" (así se definen).
Conta coas seguintes seccións:
Libros destacados
Seleccións (por xéneros, temáticas, conmemorativas, bos libros e premios)
Busca o teu libro
Proxectos de lectura
Recursos didácticos
Libro dixital
Autores/as
E seguen contándonos: "Lupadelcuento" é o froito do traballo dun equipo de profesionais comprometidos coa educación, a literatura infantil/xuvneil e as bibliotecas esoclares.
As nosas primeiras andaduras comenzaron alá polo ano 1987 coa creación "Doce-Documentos de Educación", en 1993 recibimos o "Premio Ibertex en el sector educativo" outorgado pola Fundación Telefónica. No ano 1999 creamos "Leer y Vivir: literatura infantil y juvenil" que se distribuía dende a plataforma "Educared" da Fundación Telefónica. No ano 2015, con novas secciones, transfórmase en Lupadelcuento."

2/3/15

esdelibro / édelibro acaba de estrear páxina


A páxina creada por CEDRO no que se recolle o programa de formación no tratamento da información, así como o concurso para investigadores alumnado entre 12 e 18 anos. 
Este sitio web acaba de actualizarse, cun novo deseño que presenta a información de maneira máis clara e asequible. 
Nela escollemos entre os epígrafes "Investigadores" (detrás do que se atopan 300 investigacións), "Aprender a investigar" (onde nos ofrecen descubrir os trucos do investigador) e o Concurso 2015 (en pñé desde a primeira convocatoria no 2007.Recursos para alumnado e profesorado, unha guía do investigador dixital, así como follas de traballo adaptadas a cada nivel de ESO e Bacharelato.
Uns materiais para utilizar no alfabetización informacional e un bo concurso para participar desde a biblioteca escolar.

20/1/15

Presentación de materiais (para as bibliotecas escolares) en Culturgal



Quedamos agardando a que nos fixeran chegar as presentacións que as editoras realizaran para Culturgal.  E a organización aínda non nolas pasou así que imos facer o que podamos, lembrando o que ali escoitamos.
Comezamos con Ouvirmos editora que presentou as súas coleccións Cociña infantil e familiar, Biografías de científicos galegos e Xoguetes naturais. Argalladas dos pícaros.
Dentro da primeira colección aparecen os títulos: Xeados, Pratos do mundo, Chocolates, Carnes, peixes, Arroces, Menús para festas, Pastas e pizzas, Bocadillos e sandwiches e Sobremesas.
"10 libros de receitas que ensinan a preparar pratos fáciles e creativos, específicamente concebidos para experimentar en familia (...) Cada volume inclúe 20 receitas realizadas con ingredientes básicos, explicadas paso a paso dunha forma sinxela polos profesores titulados de Hostalería Miguel A. Caruncho, David Cidre, Santiago Martínez e Xenxo Pereiro, e acompañadas das fotografía de Tono Arias. Ademais, consellos prácticos, trucos específicos para cada receita e recomendacións para desenvolver con éxito a aventura de adentrarse na cociña."
A segunda colección, conta na actualidade coas biografías de Casares Quiroga e Ramón Mª Aller Ulloa.
Esta colección ten como obxectivo rescatar a vida e obra dos grandes nomes da nosa historia científica. "Unha revisión do pasado para inspirarnos nos pioneiros que coas súas ideas, esforzo e creatividade, achegaron luz e progreso á sociedade".
A terceira da coleccións, e a última en saír ao mercado, conta con dúas entregas seguindo as estacións: Primavera - Verán e Outono - Inverno. Xoguetes naturais é un caderno que nos ensina como realizar paso a paso 30 xoguetes con elementos da natureza, follas, herbas, flores… Detrás de todas estas “argalladas”, atopamos un forte compromiso coa defensa do medio ambiente, pero sobre todo un devezo profundo de recuperación e posta en valor do xoguete popular e tradicional
O último produto presentado foi Historia da música en Galicia, un libro e dous CD´s nos que se fai unha revisión cronolóxica da música feita en Galicia ao longo da Historia e desde unha perspectiva pedagóxica.

10/12/14

CRIATURAS. A revista dixital de literatura infantil e xuvenil galega

Hai uns días, en Culturgal, fíxose a presentación pública desta nova publicación, tan necesaria que pasou varios días desaparecida da rede de puro exceso de interese. 
- Atascousenos!- é o mellor que se pode dicir dunha nova revista. Empachousenos de tanta xente como quería darlle de comer.
Quen dirá que non a sentimos imprescindible?
Poñémolas chapiñas, facémoslle un sitio e lemos o que nos din na editorial:
"Detrás de Criaturas estamos persoas de todos os ámbitos da creación e da mediación: escrita, ilustración, deseño, crítica, bibliotecas… e máis queremos que estean. Ademais de crear unha nova plataforma de difusión, análise e estudo da LIX, temos un certo degoxo de renovación, de dar voz a novas xeracións de todos estes eidos e outros que se vaian incorporando. Hai que lle procurar a isto que andamos a debullar no poliedro da lectura e dos libros de LIX, caras novas, ángulos distintos, vértices de confluenza e arestas de encontro. Porque a pesar de que vivamos neste anaco de mundo que corresponde ao punto cardinal exacto onde o vento nunca deixa de soprar, de seguro que aínda quedan cousas por inventar."

9/9/14

As bibliotecas e os recursos


As bibliotecas municipais da Coruña dan acceso a unha wiki na que se recollen materiais dos que dispón esta rede en relación á temática LGTBq, e detrás das tipoloxías de cine, cómics, divulgación, literatura, música e recursos de interese.
Así a presentan:
"Os fondos das bibliotecas son (e deben ser) un fiel reflexo da sociedade e moi especialmente das comunidades ás que prestan servizo de proximidade.
Como bibliotecas, e como bibliotecarixs, debemos ser partícipes, e mesmo impulsorxs, dos procesos de erradicación de toda manifestación excluínte, optando sempre por unha vía integradora da diversidade.
Calquera persoa que se achegue a unha biblioteca pública buscando información sobre o feito homosexual, bisexual e transexual require de nós unha resposta eficiente. Esta resposta debe traducirse nunha integración total de materiais que toquen a temática LGTB nas nosas estanterías e, ademais, no ciberespazo."


5/5/14

Libros infantís e xuvenís de Galicia 2014. Catálogo para a feira de Boloña.

Neste enlace podemos acceder áo catálogo de libros infantís e xuvenís galegos do ano 2014, que se ten presentado na Feira de Boloña.
Un catálogo que elabora GALIX (Asociación Galega para o Libro Infantil e Xuvenil) cada ano e que mostra as publicacións do anterior.
Un recurso de interese para as bibliotecas escolares.

30/4/14

Un recurso con motivo do día da danza,


O Servei de Biblioteques del Departament de Cultura da Generalitat de Catalunya acaba de editar unha bibliografía básica dedicada ao mundo da danza, que nos fai chegar, con motivo do Día da Danza (29 de abril)
Tamén nos achega o taboleiro de Pinterest relacionado con este tema.
Agradecemos este recurso, que será moi utilizado en certas bibliotecas escolares.

21/4/14

GUÍA DE RECURSOS CONTRA O ACOSO ESCOLAR


A biblioteca CIVICAN acaba de publicar unha guía de selección de lectura infantil e xuvenil contra o acoso escolar que leva o título de "Pasa página al acoso escolar". 
U

28/10/13

Recursos musicais


A nova web de GalicianTunes, da Consellería de Cultura, Educación e Ordenación Universitaria, busca a promoción da música galega. A páxina chega da man de Axencia Galega das Industrias Culturais (Agadic) e en colaboración coa Asociación Galega de Empresas Musicais (AGEM).
Trátase dunha ferramenta útil para coñecer o traballo dos artistas e grupos.