Novidades da editorial Cuarto de Inverno

A editorial Cuarto de inverno vén de publicar estas dúas novelas na súa colección xuvenil.

En SuperUlex, Susana Sanches Aríns preséntanos a Clara, a primeira " superoína" galega que tras un tratamento de quimioterapia xa non é quen de tolerar as inxustizas que ocorren ao seu redor, especialmente no Instituto. Con traxe de superheroína e coa axuda da avoa Rorita, conseguirá levar ao centro ás mozas e mozos que están na marxe. 

A autora, con cariño e tenrura, móstranos unha adolescencia realista, sen prexuízos nin condescendencias.

En Velloucas e Minchas, III Premio María Victoria Moreno de Literatura Xuvenil, Lorena Conde conta con moito humor como
Sofía, Gabri e a veciñanza terán que resolver un sarillo no que están metidas a avoa de Sofía e as súas amigas do 1º andar.

Unha vez máis a solidariedade e a amizade son quen de amañar os problemas.

Ambos os dous libros, dirixidos a un lectorado experto e xuvenil, acaen ben na colección das bibliotecas escolares con temática inclusiva e poden achegar diferentes miradas sobre a adolescencia nos Clubs de Lectura.

A filla do Minotauro, un novo título de Marilar Aleixandre para lectorado xuvenil e outros.

Marilar Aleixandre volveu facela. Novamente pon nas mans das persoas mediadoras un texto magnífico para presentar a mozos e mozas e convidalos a unha experiencia de lectura das que deixan pegada. Desta vez a escritora volve á mitoloxía clásica e de alí tráenos a Miranda, A filla do Minotauro, unha rapaza afouta, curiosa, intelixente, sensible, atenta ao que pasa ao seu arredor, disposta a botar unha man nunha empresa arriscada: cómpre agochar un documento moi valioso do patrimonio cultural de Sicilia para libralo das gadoupas dos traficantes de tesouros arqueolóxicos e Miranda non dubidará en aliarse cos "bos" na defensa dese patrimonio histórico. Pero A filla do Minotauro agocha moitas outras historias e aventuras que se entrelazan a través de diferentes voces de narradores cos que Miranda se vai atopando, comezando polos seus pais, que finalmente descubren ante ela o seu segredo. Excelente texto que revisita, entreverando na aventura de Miranda, moitas outras aventuras e mitos clásicos aos que nos permite achegarnos, desfacendo algúns tópicos e desvelando algúns misterios. 

Aventura, amor, paisaxe, historia, mito, narración oral, matemáticas, arquitectura, inventos, muller, misterio, mafias... Quen dixo que non hai libros atractivos en galego para por nas mans dos nosos lectores?

Cómpre agradecer á Editorial Galaxia a publicación desta novela que mereceu o Premio Raíña Lupa de Literatura Infantil e Xuvenil 2017 e que, de seguro, proporcionará unha vivencia de lectura grata a novos e maiores. Publicada na colección Costa Oeste, os equipos de biblioteca escolar deberán lela para valorar a súa recomendación pero desde aquí pensamos que non debe faltar en ningunha biblioteca dun centro de secundaria (lectorado xuvenil). Como pasa coa auténtica literatura, A filla do Minotauro ten varios niveis de lectura e pode ser tamén de interese para outros lectores e lectoras con gaña de aventura. Ademáis, é unha novela "con mapa", desas que chaman á viaxe imaxinaria e convidan á viaxes reais "para cando se poida". 

Lectura fácil en galego: 20.000 leguas baixo dos mares de Jules Verne.

Parabenizamos a publicación do libro de Jules Verne 20000 leguas baixo dos mares que vén de editar Galaxia segundo as pautas de lectura fácil.

A lectura fácil vén atender a un lectorado con dificultades de lectura ou de comprensión e facilita o disfrute da lectura, facendo unha biblioteca, unha escola e, por extensión, unha sociedade máis democrática e inclusiva.

Imprescindible para a normalización linguística, este título (primeiro dunha serie), non debe faltar nas bibliotecas escolares galegas, sobre todo nas de secundaria, para incentivar a creación de clubs de lectura fácil ou para favorecer a alfabetización en galego de lectorado con dificultades de aprendizaxe.

Ë destacable tamén o título que inicia esta serie, pola vinculación da obra e de Jules Verne a Galicia.

Historias de inmigración para xoves

Faktoría K de libros vén de publicar Eu son Suleimán de Antonio Lezcano, con tradución de Carlos Azevedo.

Na súa presentación editorial dísenos que a novela conta como, farto da extrema pobreza que padece en Mali, Suleimán decide marchar co seu amigo Musa na busca dunha vida mellor en Europa, onde esperan traballar, conseguir diñeiro para voltar ao seu país, abrir os seus negocios e axudar as súas familias. A viaxe resulta dura e difícil: cruzan o deserto en camións escangallados, ateigados de xente tan desesperada coma eles; chegan á fronteira con Melilla pero, ao cruzar a reixa fronteiriza, son arrestados e expulsados. Tras perder Musa, Suleimán loita por sobrevivir e volve intentalo por mar, dende as costas de Senegal ata Gran Canaria.

É a historia de calquera dos miles de rapaces que desafían a morte para chegar a Europa fuxindo da guerra e da miseria no continente africano. Un drama que traspasa o frío factor da actualidade para achegarse á dimensión humana do fenómeno migratorio que é tratado tamén na novela Camiños na auga de Manuel Núñez Singala, publicada en Galaxia tamén no 2016, onde se denuncian as duras condicións de vida dos negros albinos en África, así como a trata de negros que constitúe o negocio dos caiucos mediante os cales tratan de introducirse en Europa.


Destinadas a un lectorado xuvenil ou adulto, ambas as dúas novelas deben estar nas nosas bibliotecas escolares, poden ser lidas en clubs de lectura temáticos ou ben poden formar parte da selección de lecturas sobre inmigración, guerras ou vulneración dos dereitos humanos, nestes días que temos tan próxima a Conmemoración do Día escolar da non violencia e a paz.

Novidades de literatura xuvenil

Destacamos hoxe en Rede Lectura dúas novelas xuvenís, 
publicadas ambas as dúas na colección Fóra de xogo de Xerais. Estamos a falar de Xa non estou aquí de Iria Misa, que recibiu o premio Jules Verne de Literatura Xuvenil na edición de 2016, e d´A caixiña dos rancores de Héctor Cajaraville, Premio Raíña Lupa de Literatura Infantil e Xuvenil en 2015.

Aínda que con temáticas moi diferentes, son novelas altamente recomendables para ese alumnado que se achega á biblioteca escolar solicitando algún título que o enganche porque desde o comezo, as historias e os personaxes son quen de atraer a lectoras e lectores, pola súa proximidade.

Iria Misa, presentando a súa primeira obra publicada, comenta que é unha novela que fala de sentimentos universais: a necesidade de pertenza a un grupo, de comprensión, a soidade… A intriga artéllase arredor da desaparición da protagonista, misterio que se irá desentrañando ao longo da novela a través dos distintos puntos de vista dos personaxes. É unha novela coral onde quixen traballar o multiperspectivismo e así poñer de manifesto o cariz tan distinto que pode tomar a realidade dependendo dos ollos de quen a mira.

D´A caixiña dos rancores de Héctor Cajaraville dísenos na presentación editorial :

A xuíza Felpeto, acabada de chegar á localidade costeira de Valdomar, revoluciona a vila coas súas orixinais sentenzas. Cando Estevo é obrigado a pasar todo o verán visitando a Chiruca, a anciá a que atropelara co seu ciclomotor, imaxina unhas soporíferas xornadas aturando as historias daquela muller que cruzara polo paso de cebra sen mirar. Pero todo cambia cando a casualidade fai que o mozo descubra un segredo que ten na súa cerna a Chiruca e que ela mesma descoñece. Coa axuda de Paula, a noiva de Estevo, o nobelo daquel misterio irase desenredando ao mesmo tempo que xorde entre os tres protagonistas unha relación tan profunda como inesperada, que pasa por riba da diferenza de idade e que demostra que a amizade verdadeira non entende de prexuízos nin de convencionalismos.

Jules Verne e a vida secreta das mulleres planta

Por que  ler  Jules Verne e a vida secreta das mulleres planta de Ledicia Costas?

Premio Lazarillo de literatura xuvenil 2015

Esta engaiolante historia pode namorar a adolescentes e a moitos adultos fieis seguidores da literatura de Jules Verne e da narrativa de Ledicia Costas.

A novela mistura xéneros narrativos como a novela fantástica, de aventuras, histórica e realista; algúns dos seus personaxes son reais e famosos de seu coma Verne ou Sanjurjo Badía e a trama parte duns feitos coma a visita do francés a Vigo e a importancia que o empresario Sanjurjo Badía tivo nesta cidade. Aparecen as lendas que forman parte xa do noso imaxinario popular: a presenza do Nautilus en Vigo, os tesouros de Rande ou o túnel entre as Cíes.

Esta obra fálanos de amor, de aventuras, de felicidade, de nostalxia, os afectos… pairando sobre un mundo sobrenatural (o das mulleres planta) apoiado pola bioloxía e pola localización xeográfica real, a cidade de Vigo, que lle aportan verosimilitude á historia. Destacamos tamén a presenza na obra do primeiro amor, dos sentimentos entre pais e fillos e dos avós.

A partir da novela podemos achegarnos á obra de Verne e despertar a curiosidade sobre datos históricos e tecnolóxicos que nela aparecen.

(Unha colaboración da profesora Anxos Rial)

A casa do medo de Agustin Fernández Paz

En torno á data do 1º de novembro moitas bibliotecas escolares preparan seleccións de lecturas que teñen o medo como eixo temático.

Presentamos unha  novidade editorial, obra póstuma de Agustín Fernández Paz, A casa do medo, que debe estar nesa selección xunto con outras obras de Agustín, un mestre neste tipo de relatos, como Cartas de inverno, Aire negro, O centro do labirinto, As fronteiras do medo ou A neve interminable, entre outras.

Publicado en Rodeira, A casa do medo está dirixida a lectores expertos e conta a historia dun home que  lembra uns feitos acontecidos durante a súa infancia cando se achega á casa do medo ...

Traemos tamén a nova sobre o catálogo que vén de editar Xerais con todas as obras de Agustín Fernández Paz publicadas nesa editorial, que se está a distribuír por escolas, bibliotecas, librarías ou no próximo cultur.gal

BIBLIOTECA ESCOLAR, territorio das artes

A rede de bibliotecas escolares galegas, a proposta desta asesoría, vai seleccionar títulos de ficción e de información, así como outros recursos de interese (películas, música, espazos web,...) en relación co lema proposto este ano: BIBLIOTECA ESCOLAR, territorio das artes.

Iniciamos este percorrido con catro títulos de referencia na LIX galega de temática artística, que se poden incluír nas lecturas dos Clubs, nos itinerarios lectores ou ben como recomendacións da biblioteca.

O retrato de Bia de Médicis, pintado por Bronzino, inspira O armiño dorme de Xosé Neira Cruz, publicado en Galaxia e Premio Raíña Lupa 2002. Tamén nesta editorial e tamén co mesmo premio na edición de 2013 está Reo, de Xesús Fraga, que nos fala da arte urbana cun graffiteiro como protagonista.
O pintor do sombreiro de malvas de Marcos Calveiro, publicado en Xerais e que foi Premio Lazarillo entre outros galardóns, recrea os últimos días do pintor Van Gogh.

Por último, unha das múltiples homenaxes que fai Agustín Fernández Paz ao cine: Fantasmas de luz publicado en Xerais no ano 2011.

EUROPA EXPRESS , Premio Jules Verne de Narrativa Xuvenil 2015

Europa Express de Andrea Maceiras gañou o Premio Jules Verne de narrativa xuvenil, na edición de 2015.  

A novela, publicada recentemente na colección Fóra de xogo de Xerais, está protagonizada por un grupo de mozos e mozas que realizan unha viaxe Interrail por Europa ao rematar os seus estudos. Desenvólvese por distintos países e en distintos tempos (a actualidade e dez anos atrás, o tempo da viaxe) e unha postal serve para que Nico inicie o retorno ao pasado en busca de respostas ante a traxedia. Esta vai ser o pulso da vida de cada un dos personaxes, ela vai tecendo unha arañeira, unha trama psicolóxica á par da aventura de cada un deles na busca da súa identidade.

Outros temas coma o amor, a amizade, o desencanto da vida, os conflitos de identidade enriquecen a trama.

Novela recomendada para a lectura persoal e compartida.

Un novo premio para Ledicia Costas, o Lazarillo 2015

A literatura infantil e xuvenil en galego está de noraboa xa que Ledicia Costas foi galardoada esta pasada fin de semana co Premio Lazarillo 2015 pola súa novela xuvenil Jules Verne e a vida secreta das Femmes Plante. O premio foi  convocado pola Organizacion Española para el Libro Infantil y Juvenil (OEPLI) e conta co patrocinio do Ministerio de Educacion, Cultura e Deporte.

O xurado destacou da obra obra gañadora  que se trata dunha «novela ben escrita, cunha narración fluída, unha estrutura moi ben axeitada e unha linguaxe sinxela pero elaborada, que combina con precisión elementos da realidade e ficción e imprimíndolle un aire de misterio que contribúe a facer moi emocionante a súa lectura».

A novela publicarase en Xerais no 2016.

Os noso parabéns a Ledicia Costas por este novo recoñecemento. 

Dragal IV. A estirpe do dragón. A fantasía en serie

Porque as series crean lectores, traemos hoxe aquí o número IV de Dragal, neste caso co título A estirpe do dragón.

Trátase dunha historia de longa traxectoria: a estirpe dos dragóns, a especie desaparecida que ha de volver da man dos dragalianos, e fronte a eles a gran Igrexa Inquisición (con este ou outro nome co que se recoñezan en cada momento), os grandes represores que os buscan para acabar con esa posibilidade. Os vellos códices nas casas dos descendentes, a igrexa de san Pedro coa súa cripta secreta, a poza da Moura, os ouroboros que cada dragaliano leva no brazo, a alquimia, os cabaleiros da Fraternidade, a telepatía, as viaxes no tempo, xente que se volve invisible e outros que ven as auras dos demais, as transformacións; o códice onde está o pasado, o presente e o futuro que se está a reescribir a cada instante... son elementos desta historia. E dentro desta, outra historia: a dun par de adolescentes namorados, con todos os ingredientes dun relato de amor e instituto: o acoso escolar, un embarazo non desexado, o melodrama de non acabar de confesarse nunca ese segredo que está aí pendente dun fío, as gravacións roubadas, ... 

As grandes forzas do ben e do mal sobre o taboleiro da Historia ou do día a día.

Algunha chiscadela que nos moverá o riso como esa referencia á última novela do Xerais que alguén está a ler ou a necesidade de cantar A Rianxeira para desconectar... porque todo sucede neste tempo que estamos a vivir, sen dúbida.

Un libro de Elena Gallego, publicado por Xerais.

¿Quen mata: as palabras ou o silencio?

 

Ben a conto a pregunta despois de ler a última novela de Marcos Calveiro As palabras poden matar.

Un barrio de favelas onde goberna o Chibo e os seus sicarios. O Chibo, igual que o progatogisna daquela novela de Vargas Llosa é intocable e ditador, sen límites no seu castigo e sen perdón nas súas decisións. O perigo axexa nese mundo pechado do que non se pode saír. Xa dende rapaces xógase a lareta ou sicario, logo tómase a decisión que non pode ser outra que a que decida O Chibo, porque non se trata de conseguir algo senón de lograr que non acaben con un.

En terra hostil, sería o programa. 

Unha antiutopía.

Un personaxe que non damos crido de tan enrevesado e cruel... porque, non vai quedar unha fenda de esperanza? van deixar a rapazada condenada a unha noite sen día? 

Igual non vale a risa nin os paiasos aínda que sexan do mundo, igual non é suficiente coa visita dun anxo e hai que agardar máis, pero as portas deben estar abertas. Hai demasiada desesperanza para non agardar por alguén.

Porque as palabras poden de auga ou de xeo, poden liberar ou matar.

Doutra maneira...

 Bieito Dubidoso de Roque Cameselle na colección Milmanda de Xerais.

Bieito Dubidoso, o mago de Tui, xa chegara a nós nun formato dirixido aos pequenos, pero faino agora en forma de novela xuvenil para mostrarnos o horror medieval da man do bispo Xoán, dono e señor da vila con poder absoluto e malas artes. O fermoso e cruel bispo está disposto a mil estratexias para acabar cos de Bieito. Un neno e unha moza chegada do lonxano Norte, Bieito e Destreza, que maduran mentres descubren o amor e a perda das persoas queridas. 

Bieito Dubidoso xa está na wikipedia porque parte dunha longametraxe de animación, estreada no 2011 e dirixida polo seu autor Roque Cameselle. A película presentouse no 33 Festival Internacional de Nuevo Cine Latinoamericano na Habana e foi nominada a Mellor Película de Animación no Prmeios Goya 2012.

Tamén en Xerais, o álbum ilustrado O pequeno mago publicado en 2014.

Fráxil coma o cristal

De cristal, é o título da última obra de Silvestre Gómez Xurxo que fala da vulnerabilidade. Cinco relatos, cinco, sobre a indefensión do ser humano. 

Conta o autor que a colección de relatos nace da petición dunha nena, que quere un conto titulado "O home de cristal e o mago". Escribira Gloria Sánchez A casa de cristal do señor Clin (e ilustráraa Miguel Calatayud), unha das historias máis tristes ás que dera lugar a nosa literatura, porque cando es tan inocente que nada tes que ocultar faste transparente coma o cristazl e como el igual de delicado, de forma que calquera ceh pode destruír. Estaría ben reler esta obra antes de entrar nas de Gómez Xurxo... porque son estas unhas historias nas que o autor entra con presenza propia -parando o relato- porque en cada unha delas "O ratiño negro", "O ratiño branco", "O gato negro", "O pavo real" ou "Gulag de galgos" se presenta unha situación na que determinados animais padecen indefensión e un protagonista humano se identifica con eles porque a súa situación é parella e a súa dor é semellante.

Libros e antiutopías

Ledicia Costas, ganadora do premio Merlín de literatura infantil 2014, cunha obra que agardamos ter nas mans o antes posible, tense caracterizado ata este momento pola escrita xuvenil. Dela é Unha estrela no vento, O corazón de Xúpiter en Recinto gris, todas elas publicadas na colección Fóra de xogo de Xerais.

A última, Recinto gris, ambiéntase nunha distopía. Unha sociedade organizada arredor do medo e a uniformidade onde semella que o totalitarismo será permanente e non vai ter saída. Un ambiente asfixiante e pechado, un mundo sen futuro... e un final que conteén unha gran ensinanza que nos chega a modo de agasallo co lazo da sorpresa.

Teredes que lelo!

Literatura transmedia, libros que medran noutros formatos e soportes

As meigas de Lupa é unha novela de María Solar, da que xa falamos noutra entrada deste blogue.

O que agora nos chama a atención é o feito de que ese libro dou lugar a unha serie de produtos que seguen a falarnos dese imaxinario creado pola autora.

Ela mesma nolo conta desta maneira:

"É a historia máis linda que vivín na literatura porque medrou en moitos campos grazas ao traballo desinteresado de lectores.
Naceu como un libro xuvenil, pero leuno un compositor de música de cine que vive en Lugo e que eu non coñecía, David Alonso Garzón. Él criouse nos espazos do Pico Sacro dos que fala o libro. Así que inspiroulle unha Banda Sonora Orixinal"

Esta banda sonora foi recollida nun CD que acompañou a segunda edición do libro, publicado por Edicións Xerais de Galicia. Banda sonora que resultou finalista dos prestixiosos premios Jerry Goldsmith de musica de cine. Podedes escoitala neste enlace.

E segue a contar María:
"Despois o mesmo compositor cun compañeiro (teñen unha productora) pedironme usar o libro para probar unha técnica audiovisual nunca feita en Galicia mesturando actores reais con escenarios recurtados en papel e sombras chinescas. Así implicaron a un artista plástico, a productora e o grupo de teatro Achádego de Lugo e naceu o booktrailer. E a web As meigas de Lupa onde contan o proceso que seguiron.

E despois aínda se fixo unha exposición preciosa e moi exitosa no Museo de Historia interactiva de Lugo cos proscenios usados para o audiovisual."

Sería xenial poder contar con esa expo rulando por toda Galicia, a que si?

De todo isto se dá noticia na páxina de María Solar.

Un libro que medra nunha BSO, un audiovisual, unha web e unha expo

LECTURAS EN NOVEMBRO

O outono tráenos temas pouco usuais, pero moi reais.

Un deles é a morte. Un dos últimos títulos de Galaxia, na colección Costa Oeste, é  Ás veces quero morrer coa risa.

O resumo, feito pola editora, é absolutamente aclaratorio:

"O protagonista non é capaz de pensar con claridade diante da tremenda realidade, nin entender por que ten que morrer tan novo con todo o que lle queda por vivir: ter noiva, o primeiro coche, ir a concertos..., en definitiva, todo o que calquera adolescente devece por facer. Séntese furioso, desvalido e enganado pola vida. Todo semella inxusto. Ten que decidir onde pasar o tempo que lle queda, se seguir no hospital, onde está rodeado por persoas que comparten o mesmo fado, ou marchar cos seus pais. Mais coñece a Helene, unha rapaza que está aínda máis enferma ca el. Así, coa aparición do amor, descobre un posible sentido para o tempo que lle queda: quere pasalo con Helene."

Máis alá desa situación, está a forma de vida nesa sección do hospital, a reacción ante a morte e a maneira de facerlle fronte coas palabras, o pensamento e as actitudes deses seres tan novos e xa condenados a saber a proximidade do seu final. 

As autoras, Birgit Schlieper e Nina Stahl uniron o seu bo facer, unhas delas dende o ámbito da experiencia de traballo neste campo de xoves enfermos terminais, de forma que conforme lemos, semella que estamos asistindo ao proceso de despedida da vida duns rapaces que non merecen semellante carga. As dúbidas do protagonista a respecto de a onde ir a pasar eses últimos días, se á casa do pai ou da nai, os seus sentimentos ante a forma de reaccionar cada un deles, a rabia,... pero tamén a liberación solidaria, esa maneira de ser felices axudando a outros, distraéndoos, estando con eles é a gran lección desta historia. Unha historia impresionante que se presta para falar e falar, para relacionar con series como Pulseras rojas e outras obras relacionadas con esta temática, algunha delas xa citadas na propia novela como Os irmáns Corazón de León, publicado por Edicións Xerais de Galicia.

A "desaparición" como tema

Todos somos de Marcos Calveiro trata este tema, a desaparición dunha nena de doce anos. Un golpe que dá unha viraxe á vida no barrio e na cidade.

Cando aparece a novela, estamos conmocionados por outra desaparición (neste caso morte) de adolescente, e podemos constatar que o tratamento da prensa coincide. Que ben o reflicte o autor, con toda a crueza, os intereses non confesabeis, os cartos e o éxito profesional sobre todas as cousas, a empresa por riba da dignidade, o negocio privado sacando á luz o peor do ser humano...

No medio, as xentes deixando que aflore o lado máis escuro, e uns poucos mantendo a cabeza fría e a consciencia cívica, a pesar de todo. A tensión ten un prezo e fai saír os enfrontamentos que antes podían disimularse, as diferenzas qie agora se fan insondables... no medio a rapazada sufrindo máis alá da dor de perder unha compañeira, no medio unha muller que non semella policía e actúa dunha maneira que entenderemos moi ben na escola.

Unha novela actual, moi actual, que nos fará pensar.

Que acerto esa foto da cuberta! ou non?... Tamén ela nos fará pensar.

NOVIDADE XUVENIL...

Tal como contabamos, acaba de saír á busca de lectores a primeira entrega (Destino Xalundes) dunha anunciada triloxía (Ámote Leo A.) de Rosa Aneiros, publicada na colección Fóra de Xogo de Edicións Xerais de Galicia.

Libro de viaxes que bebe das fontes das mellores augas do xénero, volvendo a textos como O libro das viaxes imaxinarias de Xabier P. Docampo, As viaxes de Marco Polo (ou O libro das marabillas) e Las ciudades invisibles de Italo Calvino.

É a viaxe o eixe central da novela, a súa razón de ser. Unha viaxe ao longo do mundo en seis meses, nin un día máis nin menos, igual que sucedera coa Volta ao mundo en oitenta días de Julio Verne. Seis meses de liberdade, antes de incorporarse ao traballo e ás obrigas, un tempo iniciático entre os estudos e a vida laboral, un tempo para aprender a facerse grande sen axuda de ninguén, sen titor nin familia, sen amigos nin compañeiros... 

Leo viaxa soa, os tres amigos que se comprometeran á viaxe vólvense atrás e ela decidirá continuar co empeño, cargando o pesar de sentirse traizoada pero disposta a visitar as cidades que eles citaran e aquelas para as que consiga voos baratos en internet. De Santiago a Lisboa, Barcelona, Granada, Marrakech, Estambul... cada cidade coa xente coa que contacta, cada lugar coas sensacións que transmite,... todo pasado pola mirada da viaxeira / turista que a percorre.

Rosa Aneiros sitúase na novela xuvenil seguindo a estela da grandes autores do xénero como Agustín Fernández Paz ou Marilar Aleixandre, pero achegándolle a súa xuventude, a súa visión da mocidade desde a mocidade mesma, un tempo e unhas lecturas.

Ha dar moito que falar (e ler)!  

Novelas xuvenís: novidades

 

Estamos asistindo á presentación pública dun par de novelas xuvenís que, xa antes de ser lidas, nos espertan todos os sentidos. Estamos a falar das últimas obras de Marcos Calveiro e Rosa Aneiros: Todos somos e Ámote Leo A., ambas na colección Fóra de xogo.

Dous autores que nos teñen acostumados a boas obras. 

Autores premiados e grandes expectativas.