Desde Dante ata Hemingway
ou García Márquez, moitos escritores teñen escrito sobre Santiago, teñen citado a cidade e o camiño que a ela conduce nos seus libros.
O Concello de Santiago de Compostela quere recoller e resaltar estas
citas e para iso a céntrica Alameda compostelá acollerá un "paseo
literario" entre a Porta dos Leóns e a Estatua de Rosalía.
A iniciativa Paseo da
literatura consistirá na instalación, ao longo do paseo dos Leóns, de
pedras gravadas coas citas máis relevantes. As dúas primeiras serán unha de
Dante en Vita Nuova ("Pero en verdade se chaman peregrinos en canto van á casa
de Galicia porque a sepultura de Santiago fíxose máis lonxe da súa patria que a
de ningún outro apóstolo") e unha de Rosalía sobre o Pórtico da Gloria ("¿Estarán
vivos? / ¿Serán de pedra? / Aqueles sembrantes tan verdadeiros, /aquelas túnicas
maravillosas, / aqueles ollos de vida cheos?"), ao pé da súa estatua. Serán polo
tanto dous paseos, un no que se recollan as citas de autores galegos e noutro,
do resto do mundo.
Pero a integración da literatura non só se cinguirá á
Alameda, senón que sairá a outras partes emblemáticas da cidade. Deste xeito
colocarase un busto de Valle-Inclán na praza de Galicia, lembrando a súa
presenza en Compostela o seu último ano de vida e os seus faladoiros no vello
Derby. E non podería faltar a cita atribuída a Goethe "Europa fíxose
peregrinando a Compostela", que se localizará na Porta do Camiño, onde xa
se atopa unha placa coa declaración do Camiño como Patrimonio da Humanidade, e
que poderá lerse en seis idiomas.
Esta actuación complétase
co libro Compostela, mil anos de literatura, que recolle todas as citas
e textos dos grandes autores da literatura universal sobre a cidade de
Compostela e o Camiño.
