Biografías necesarias

María Barbeito. Unha vida ao servizo da escola e dos escolares (1880-1970), de Ana Romero Masiá, publicado por Baía editorial dentro da súa colección Biografías.
Para mostrarnos o perfil dunha destacada educadora, a autora organiza o traballo seguindo un criterio temático-cronolóxico. Unha introdución de contexto, catro capítulos dedicados aos ámbitos básicos da actividade de María Barbeito: o profesional, o benéfico-social, o literario-cultural e o das actividades cívicas e feministas, e un capítulo final dedicado á traxedia que significou a depuración a que foi sometida e que determinou a separación da docencia.

Coñecer a esta muller é unha obriga coa escola e a Historia.

Recoñecemento (Collection of Books for Young People with Disabilities)

A novela Recinto Gris, de Ledicia Costas foi escollida para formar parte da colección dos mellores libros do mundo para rapaces e rapazas con discapacidade, dentro da IBBY Collection 2015 (Collection of Books for Young People with Disabilities). 

Segundo lemos na páxina web da editora, o libro será incluído no Catálogo que se presentará en roda de prensa o 30 de marzo de 2015 na Feira Internacional do Libro de Bologna “Bologna Children’s Book, 2015”. 

A novela realiza unha posta en valor da diferenza e os seus protagonistas son todos persoas peculiares e, estigmatizados e recluídos, e serán precisamente esas diferenzas as que os axuden a liberarse. Nela abórdanse temas como a solidariedade, a opresión, a colaboración, a violencia ou a utopía.  

A obra, publicada por Xerais, vai pola segunda edición.

Finalistas dos premios das edición 2014

PREMIO ÁNXEL CASAL AO LIBRO DE FICCIÓN 2014

Icaro, de Federico Delicado, Kalandraka Editora.

A viaxe de Gagarin, de Agústíon F. Paz. Edicións.  Xerais.

Salseiros, de Suso Lista. Edicións Embora.

Sonámbulos, de Suso de Toro.  Edicións Xerais.

Dende o conflito, de María Reimóndez. Edicións Xerais.

PREMIO ÁNXEL CASAL AO LIBRO DE POESÍA OU TEATRO NO ANO 2014

Onde nunca é mañá, de Manuel Álvarez Torneiro, Kalandraka Editora.

Anamnese, de Eli Rios. Sotelo Blanco Edicións.

Estrela do Norte, de Luís Rei. Kalandraka Editora.

Dun lago escuro, de Marta Dacosta. Edicións  Xerais.

Atravesar o fantasma, de Carlos Callón. Edicións Xerais.

Os privilexios dos sonámbulos, de Pablo Bouza. Alvarellos Editora.

PREMIO ÁNXEL CASAL AO LIBRO DE NON FICCIÓN ANO ANO 2014

O soño galego de Julio Cortazar, de Francisco X. Fernández Naval. Ediciones Linteo

Galleira.Passport. Crónicas viaxeiras do século XXI, de Luís Méndez. Alvarellos Editora

María Barbeito. Unha vida ao servizo da escola e dos escolares ( 1880-1970), de Ana Romero Masía. Baía Edicións.

Á prócura da poesía, de Aurora López e Andrés Pociña. Alvarellos Editora.

PREMIO LOIS TOBÍO Á TRADUCIÓN NO ANO 2014

Cidade de cristal, de Xabier Queipo. El Patito Editorial

Tratado Lóxico-Filolóxico, de Xoán Fuentes Castro. Toxosoutos.

As floriñas de San Francisco, de Dario X. Cabana. Alvarellos Editora.

Ofrenda á tormenta, de Ramón Nicolás. Edicións Xerais.

PREMIO ISAAC DÍAZ PARDO AO LIBRO ILUSTRADO DO ANO 2014

Erik o construtor de soños, de Dani Padrón. Editorial Bululú.

O soño de Esther, de Miguel Ángel Alonso Diz e Luz Beloso. Nova Galicia Edicións.

As floriñas de S. Francisco, de Darío X. Cabana. Alvarellos Editora.

Ovella descarreirada, de Óscar Villán. Edicións Xerais.

O libro dos bicos, de Nuria Díaz. Edicións Embora.

Leviatán, de Ramón Trigo. Kalandraka Editora.

Feroz o lobo, de Leire Salabarria. OQO Editora.

Elefante comillón, de Marc Taeger. Kalandraka Editora.

PREMIO NEIRA VILAS AO MELLOR LIBRO INFANTIL E XUVENIL DO ANO 2014

Reo, de Xesús Fraga. Editorial Galaxia.

A fuxida, de Berta Davila. Biblos

O soño de Esther, de Miguel Ángel Alonso Diz e Luz Beloso. Nova Galicia Edicións.

Miña querida Sherezade, de Andrea Maceiras. Baía Edicións.

A cociñeira do rei, de Soledad Felloza. OQO Editora.

Non hai berce coma o colo, de Magoia Bodea e outros. Kalandraka Editora.

Escarlatina, a cociñeira defunta, de Ledicia Costas. Edicións Xerais.

Ovella descarreirada, de Marilar Aleixandre. Edicións Xerais.

Xique Xoque, Fiu Fiú+ DVD, María Fumaza. Editorial Galaxia.

Cuca e o abrigo marrón, Fina Casalderrey. Edicións Rodeira.

PREMIO XOSEFA IGLESIAS VILARELLE AO MELLOR LIBRO EDUCATIVO DO ANO 2014

"Colección Emocións" ( 9 títulos), de Mireia Canals/ Sandra Aguilar. Baía Edicións.

Historia da Literatura Galega II. De 1853 a 1916. O Rexurdimento, de Xosé Ramón Penas. Edicións Xerais.

Quen falta?, de Arianna Papini. Kalandraka Editora.

Historia das mulleres galegas. Das marchas nómadas á Marcha Mundial das Mulleres. Baía Edicións.

PREMIO ROSALÍA DE CASTRO Á INICIATIVA EDITORIAL DO ANO 2014

Serie audiovisual COCORICO. OQO Editora.

Lemos, cantamos, gozamos... Semana da música galega das Feiras do Libro de Galicia. Editorial Galaxia

"Colección Oeste ( Divulgación & Ensaio) cumpre 10 anos en 2015. Van publicados 18 volumes. En 2014 reactivouse a publicación con cinco títulos novos. Aposta polo xénero moi pouco comercial máis imprescindible, como é o caso do ensaio e a divulgación. Alavarellos editoria

"Colección Rescate". Cumpre 10 anos en 2015. Van publicados 19 volumes. En 2014 publicáronse dous : O rescate ( con máis de 80 poemas inéditos) do poeta Aurelio Aguirre e a biografía de máis de 700 pax de San Francisco de Emilia Pardo Bazán. Estes dous, en coedición co Consorcio de Santiago. En 2008 levara o premio Irmandade do Libro á Mellor Obra editorial do ano. Alvarellos editora

"Proxecto europeo Cociña de Contos". OQO EDITORA

PREMIO XOSÉ MARÍA ÁLVAREZ BLÁZQUEZ AO AUTOR/AUTORA OU COLECTIVO DE AUTORES EN LINGUA GALEGA NO 2014

Begoña Caamaño, María Reimóndez e Xurxo Souto

 

Google apúntase a Rosalía

Google crea hoxe un doole co aniversario de Rosalía de Castro. 

Hoxe hai 178 do nacemento de Rosalía. 

Un libro e unha flor é o agasallo para o día de Rosalía, e google agasállanos cunha recompilación escollida de recursos sobre esta autora.

"Adios ríos, adios fontes,

adios regatos pequenos;

adios vista dos meus ollos 

non sei cando nos veremos."

Grazas a quen o fixo posible e nos dou esta alegría. Grazas, porque entre nós non hai casualidades nin milagres.

Novas da AELG

O escritor Xosé Mª Álvarez Cáccamo será a nova letra E da Asociación de Escritoras e Escritores en Lingua Galega segundo se aprobou na última asemblea da entidade.

Outros premios acordados foron para o xornalismo en galego (o ano pasado fora o teatro o recoñecido). En canto a institucións, a AELG premiará o Colexio Profesional de Xornalistas de Galicia e a Asociación de Medios en Galego. Co galardón, Bos e Xenerosos, recoñecen  a traxectoria de cinco xornalistas pola súa defensa da nosa lingua e a nosa cultura, Margarita Ledo, Tereixa Navaza, Manolo Lombao, Gustavo Luca de Tena e Xosé María Palmeiro.

Da literatura brasileira sae este ano o nome do Escritor Galego Universal para o que foi escollido Luiz Ruffato, autor, entre outros títulos de Eles eram muitos cavalos ou o proxecto Inferno Provisório. Tamén teñen nome xa a categoría de mestres e mestras da memoria que recaeu en Josefa Arias e Emilio do Pando. 

A gala de entrega dos premios terá lugar o 9 de maio na cidade de Lugo.

Vía, páxina da AELG

Premio nacional de tradución para a versión galega do Sir Gawain

A Asociación Española de Estudos Anglo-Norteamericanos outorgoulle ao profesor e investigador da Facultade de Filoloxía e Tradución Jorge Luis Bueno o seu Premio Nacional. O traballo de tradución para o galego do poema inglés medieval Sir Gawain valeulle ao docente da Universidade de Vigo este recoñecemento. Bueno xa obtivera en 2011 con outra versión para a nosa lingua, nesa ocasión do poema Beowulf. Segundo adianta o Diario da Universidade de Vigo, o profesor enfronta agora a tradución dos Contos de Canterbury de Chaucer.

Os nosos tradutores son cada día máis recoñecidos fóra de Galicia; agora só queda confirmar que estamos dispostos/as a crer neles e nas versións que se van publicando.

The Irish Times recoñece a tradución de "Todo é silencio" entre a mellor ficción do 2014

As páxinas do xornal irlandés The Irish Times recolleron a selección (feita pola encargada da crítica literaria do medio) do mellores libros de ficción editados no ano 2014 e, na segunda posición desta lista, situou a tradución do libro Todo é silencio (Edicións Xerais de Galicia) de Manuel Rivas.

Así o explica a crítica Eileen Battersby: "Cun entorno costeiro que podería ser o oeste de Irlanda e un elenco de personaxes que poderían tamén ser irlandeses", con "destellos do mítico escritor americano William Gaddis" (autor relacionado coa corrente "undergroud" e cuxo libro The Recognitions (1955) está segundo noutra lista da xornalista das mellores novelas americanas de todos os tempos). Este libro foi editado en inglés con tradución de Jonathan Dunne polo selo Vintage. 

A novela obtivo en Galicia o Premio Fervenzas Literarias ao mellor libro narrativa para adultos, 2010, Premio Ánxel Casal ao mellor libro do ano 2010 e Premio Asociación de Escritores en Lingua Galega (Narrativa), 2011. 

Esta novela foi levada ao cine por José Luís Cuerda en 2012. 

Acabaremos de crer na calidade da nosa literatura?

Candidatura ao Nóbel de literatura

De Caderno da crítica, entresacamos este comentario acerca da inclusión de Agustín Fernández Paz xunto con X.L. Méndez Ferrín e Luz Pozo Garza, na solicitude para o Premio Nobel de Literatura, por parte da AELG.

Así o explica Ramón Nicolás "Talvez sexa unha obviedade apuntar que Fernández Paz testemuña unha das traxectorias máis brillantes no ámbito da literatura infantil e xuvenil, mais tamén o seu labor narrativo que non se dirixe especificamente a esa franxa do lectorado é, e segue a ser, respaldado unanimamente pola crítica e por quen se achega aos seus libros. Esta escolla é un xesto que, alén das posibilidades reais que poidan existir para a consecución do galardón, resulta moi significativo pois abre máis portas que reforzarán o recoñecemento do talento narrativo dun escritor que idea e abraza historias para ficar na memoria. Ademais recoñece toda unha xeración que puxo e segue a poñer a nosa LIX nun lugar cimeiro internacionalmente. Vaian, desde aquí, os meus parabéns a Agustín."

Premio da Música Martín Códax na categoría de Música Infantil

 O libro-disco de Pablo Díaz, Toc toc, resultou ganador nos Premios da Música Martín Códax 2014, na modalidade de música infantil. este traballo, con ilustracións de Nuria Díaz, impúxose aos finalistas Te, chocolate, café de Golfiños e Xiqui Xoque, Fiú Fiú de María Fumaça.

 

Novidades

A cidade dos nenos de Francesco Tonucci con ilustracións do autor.

A tradución de Mónica Baleirón, Sonia Santos e Rut Vázquez. O limiar de Antón Costa Rico.

Pontevedra é a cidade galega que se sumou  a outras europeas e latinoamericanas que teñen asumido o xeito de pensar a cidade proposto por Tonucci, urbes á medida da infancia que redundan nunha maior calidade de vida para todos os cidadáns. 

Tonucci é un pedagogo que vai máis alá da escola como ben demostra este libro que agora nos chega en galego, unha proposta que se estende á totalidade da vida para convencernos de que só o que está planificado para os máis débiles é válido para todos e todas. É hora de repensar a cidade e repensar a educación, é hora de ler a Tonucci e escoitalo.

Quen falta?

Un poderoso álbum da autoría de Arianna Papini con tradución e adaptación de Ramón Nicolás e Xosé Ballesteros. Unha poética maneira de falarnos daqueles que xa non están, que se foron empuxados polo egoísmo humano. En primeira persoa vanse presentando cada dos animais e con dureza espértannos a conciencia.

Esta é a presentación editorial: "A deforestación, o quecemento do planeta, o furtivismo, a contaminación... O ser humano levou á extinción a moitas especies en todo o mundo. Este libro poético recolle o testemuño dalgúns animais que xamais volverán volar, nadar, correr". 

Premio Estornela

Carlos Labraña ganou o VIII Premio Estornela de teatro para nenos que organiza a Fundación Xosé Neira Vilas coa finalidade de estimular a creación teatral e de proporcionarlles a nenas e a nenos obras que se poidan representar. 
Coa obra titulada A pequena compaña acada, este autor, por terceira vez este galardón.

O xurado do certame valorou a “perfecta caracterización dos personaxes, a tensión dramática e o vibrante ritmo narrativo” da obra gañadora, así como “o adecuado emprego do léxico e o recurso á tradición galega e á mitoloxía clásica”.

Ademáis da obra gañadora, o xurado salientou os traballos: As terapias da doutora ledicia (de Raquel Castro Martínez) e As aventuras de Odiseo (de Xosé Luna Sanmartín) con cadansúa mención de honra.

Carlos Labraña, verá publicada a súa obra na editorial Embora.

Premios ( CookBook Gourmand Award 2014)

O álbum ilustrado Maruxa, de OQO, ven de ser galardoado co CookBook Gourmand Award 2014, que selecciona os mellores libros de cociña de todo o mundo. Maruxa foi premiado na categoría “Best Illustrations CookBook” no estado español, na súa edición en galego. Os gañadores de cada país competirán en Yanyai, na China, polo título “The best in the world” o vindeiro mes de xuño. Os Gourmand coñécense popularmente como os “Oscar” dos libros de cociña e levan máis de 15 anos premiando obras de todo o mundo.

Maruxa, con texto de Eva Mejuto e ilustracións da portuguesa Mafalda Milhões, é a adaptación dunha canción tradicional polaca “Maryna gotuj pierogi” e forma parte do proxecto “Cociña de Contos. Europa á carta”, unha acción de cooperación do programa Cultura 2007-2013 da UE. Esta iniciativa promove distintas actividades que relacionan a literatura e a gastronomía para o público infantil, e que xa chegaron a máis de 20.000 nenos e nenas en España, Portugal e Polonia.

Novidades (1)

Quen é ese becho? de Carmen Queral. Un libro para os máis novos, de pastas duras, con poucas e ben medidas palabras, con ilustracións claras...

"Desde lonxe todos os bechos semellan iguais, pero se te achegas verás que os hai de todos os tipos: pequenos e moi pequenos, de lunares e de raias, cuns e outros gustos e costumes... ata chegar ao becho máis becho de todos... 

Quen será? Pois ti, si, ti mesmo, que has colocar a túa foto ou debuxo nese lugar para ti reservado, bechiño"

Leviatán de Ramón Trigo. Premio Lazarillo 2012. Di a presentaicón editorial:"O océano, unha misteriosa balea, os tripulantes dun barco en ardua persecución. Unha proposta pictórica chea de forza, simbolismo e xogos humorísticos para representar a complexa relación entre o planeta e os seus insensibles habitantes". Un álbum ilustrado para maiores con cores escuras e varias lecturas, con insinuacións e referencias a outras lecturas e medos ancestrais, con cam,iños que van e veñen dun a outro mundo... Non esquezamos que este ilustrador e autor xa ten ganado outros premios de álbum ilustrado como o II Concurso Internacional Álbum Infantil del Cabildo de Gran Canaria e o Premio Internacional de Álbum Ilustrado Ciudad de Alicante con Eu vivía na fin do mundo e Casa vacía.

Novidades

Non hai berce coma o colo é un libro disco que responde ao proxecto de Paulo Nogueira e Magoia Bodega con ilustracións de Mariona Cabassa, publicado por Kalandraka. A nana como canto primixenio e central da vida nas voces de Mini e Navia Rivas, de Merche Rodríguez (Leilía) e Sonia Lebedynski. Ademais da música, non deixan de chamar a atención unhas delicadas ilustracións arredor dun mundo onírico protagonizado por ese neno en pixama collido ao boneco e acompañado por nais e pais que nos abren a visión a unha maternidade/paternidade de todas as cores. Non hai dúbida de que ese primeiro contacto coas palabras e coa tradición vai envolto no afecto e acompañado polas imaxes que nos levan a países que quedan ao leste dos soños.

Historia da bicicleta dun home lagarto de Fina Casalderrey con ilustracións de Laura Súa Campos; unhas imaxes con moito movemento e liñas curvas que nos traen o aire dunha época que coñecemos a través das postais. Unha historia chea de lirismo que nalgún momento pode lembrar as de Juan farias. Un tempo de guerra no que un rapaz de familia de pastores admira a un amigo do pai que traballa colocando postes para a telefonía... esa maneira de subir ao máis alto dos paus e esa bicicleta... polo medio, formando o núcleo do relato a desaparición do pai que ha de fuxir e andar pola cadea antes de volver á casa, pero cando iso sucede xa ten desaparecido ese home lagarto que tanto lles axudara na súa ausencia con alimentos do corpo e do espíritu, con libros e lembranzas de Miguel Hernández. Ese neno esfórzase en manter a respiración para darlle azos á esperanza e nós acompañámolo por eses camiños de Albarracín e Gaudalaviar, por eses tempos tristes dos que aínda queda recordo e escritoras dispostas a contárnolos.

Sobre a edición de libro electrónico

 

Vía blogue da Asociación Galega de Editores (AGE) da nota FGEE-ISBN

No ano 2014 rexistráronse no ISBN 19.077 títulos en formato dixital, un 6% menos da cifra rexistrada polo ISBN no ano 2013, no conxunto das comunidades autónomas. Neste tempo, Galicia duplicou o número de títulos dixitalizados ou creados directamente nese formato, representando o 21 % da totalidade da produción realizada nesta comunidade.

Os libros para soportes electrónicos representaron o 26% da produción total das editorias españolas nese exercicio. Malia esa caída xeral do número de títulos catalogados, a porcentaxe feita pública nunha nota de prensa pola FGEE, evidencia a aposta dos editores polos novos formatos. Dos datos por comunidades autónomas recóllese a situación de Galicia con 2.274 títulos; (3,1%). Nesta comunidade,  a edición electrónico representa o 21 % do total do editado.

O conxunto das editoriais españolas rexistraron  72.416 títulos en todos os formatos e en todas as linguas, segundo os datos recollidos pola Axencia do ISBN. Esta cifra representa un descenso do 2,5% en relación aos datos da mesma entidade do ano 2013. Os datos  non recollen os títulos catalogados por Autores-editores.

Nota FGEE-ISBN 

Os autores falan das súas obras

A canle de youtube da Editorial Galaxia presenta pezas audiovisuais, realizadas e montadas por Noel Queipo e por Pilar Peleteiro, protagonizadas por algúns dos autores que publicaron recentemente novidades nesta editora.

Antón Dobao, Manuel Núñez Singala, Santiago Lopo, Alberto Ramos e Francisco Castro, reflexionan fronte á camara arredor dos seus libros, as motivacións que os levaron a escribilos, etc.

Unha maneira de seguir lendo.

Tamén presenta a combinación Os Quiquilláns + Espantallo amigo.

"Un proxecto teatral e literario: Xosé Neira Vilas soñou un día o Espantallo Amigo. Xaquín Marín puxo a súa arte ao seu servizo para ilustrar unha magnífica historia e Xosé Vizoso encárgase desta volta de darlle forma, cor e realidade aos personaxes desta versión teatral de Os Quinquilláns, que acompañamos coa edición do libro para que ninguén se quede sen el para, con vagar, ler e sorprenderse de como unha idea nacida un día na mente dun escritor, remata sendo debuxo, cor, xesto no escenario, interpretación"

Estrea dunha obra dramática en Istambul baseada no "Made in Galiza" de Séchu Sende

 

Recollido da páxina de Galaxia:
"Ven de estrearse en Istambul a obra "Merheba", unha adaptación teatral do libro "Made in Galiza", de Séchu Sende. Dirixida por Mehmet Atak, a obra é unha adaptación da tradución realizada por Irfan Guler e Pepa Baamonde e publicada pola editorial curda Avesta e combina humor e traxedia para tratar a situación das linguas minorizadas en xeral e, en particular, do curdo no estado turco. 

A obra represéntase en turco, en curdo e, nunha das partes, tamén en galego-portugués, coa inclusión dun audio gravado por Alicia Beatriz López Gallego.
A compañía Sermola Performans estreou a obra no Destar Teatro de Istambul o pasado dia 8 de xaneiro e, aínda que fora ía frio e nevaba, o teatro estaba cheo".
Había un galego na lúa?
Xa nos chamara a atención daquela, cando se publicara a obra traducida ao curdo e tivera tanto éxito que se venderan 3.000 exemplares en tres edicións sucesivas. 

Presentacións editoriais en Culturgal

OQO, tamén se quixo facer presente en Culturgal.

Debo confesar que para daquela xa me tiñan convencido de que podería contar coas presentación e tomei poucas notas desta derradeira. Ben o sinto! Tentarei facelo na medida do posible...

Falou Eva Mejuto do interese da editora na narración no só en formato álbum senón tamén na animación a través do concurso "Nós tamén creamos", das series de animación “Os contos do Camiño” (26 capítulos de 10 minutos de duración, dirixida a un público de 3 a 7 anos nos que cada capítulo corresponde á adaptación dunha historia tradicional ou contemporánea publicada en forma de álbum ilustrado) e "Caracois" (para público de 2 e 4 anos de idade; os capítulos, de seis minutos de duración, e baseados nas historias dos álbums de Caracois  - cinco libriños da colección NanOQOs en cartón duro e pequeno formato-) e a serie da TVG Cocorico. Animación e xogos arredor dos libros publicados pola editora.

Falouse tamén do libro A cociñeira do rei da narradora Soledad Felloza que resultou ganadora do Premio de Narración Oral Cociña de Contos, no que participaron contadores de España, Portugal e Polonia, e que forma parte dun programa europeo.

E rematouse facendo un percorrido polas novidades desta editora, moitas delas reedicións e reimpresións como A viaxe das bolboretas ou Cocorico  e novidades absolutas como Un anaquiño de horizonte (para maiores de 8 anos e da autoría de Arturo Abad e ilustracións de Miguel Cerro) e Quen pode vencer o vento? de Charo Pita con ilustracións de Mariona Arbona.
E rematouse coa proposta de ofertas das que nos fixemos eco, neste blogue.

Presentacións en Culturgal

 Francisco Castro realizou a presentación das novidades da editorial Galaxia.

Ramón Otero Pedrayo. Unha fotobiografía 1888 - 1976 dos autores Patricia Arias Chachero e Afonso Monxardín. "Unha obra divulgativa ilustrada con máis de 400 documentos gráficos, en parte boa parte inéditos ou pouco coñecidos, que contextualizan a traxectoria vital de quen se ten dado en chamar o patriarca das Letras Galegas (...) As imaxes e os textos incluídos son froito dun traballo de escolma e recuperación levado a cabo nos fondos de institucións como a propia editorial Galaxia, a Fundación Otero Pedrayo, a Fundación Penzol de Vigo, a Real Academia Galega, o Museo de Pontevedra, o Arquivo Histórico Provincial de Burgos, o Museo do Pobo Galego e La Región.

A colección Sonárbore de disco libros con Estación Nadal e Xa me tardan estes magos de Mamá Cabra, Lucecús de Pirilampo con ilustracións de Federico Fernández.

Instrucións para tomar café é a última entrega de Núñez Singala, un monllo de microrrelatos co humor como lubricante.

O premio de novela Manuel García Barros 2014, Máscaras rotas para Sebastián Nell de Alberto Ramos, unha xoia a modo de entrevista. O VIII Premio de Narrativa Breve Repsol 2014, A diagonal dos tolos de Santiago Lopo, unha novela na que o correr, a carreira, acada un punto de importancia.

Tes ata 10 de Francisco Castro. "Unha trepidante historia de intriga e suspense, unha trama que contén, á súa vez, moitas historias distintas. A través de correos electrónicos, cartas e outra clase de pistas misteriosas e sorprendentes, o seu pai, morto, ou quen está a facerse pasar por el, vai obrigando a que o protagonista investigue un terrible asunto do pasado que quedou sen resolver. Libros misteriosos, vinganzas dende o Máis Alá, historias de amor que hai que manter ocultas..., todo un mollo de asuntos nunha novela que nos vai levar de viaxe pola historia recente de España e Galicia, mais tamén por dentro do corazón dos namorados que o están de verdade." (da presentación editorial).