8/6/20

Propostas lectoras para o Día Mundial dos Océanos



En decembro de 2008 a Asemblea Xeral das Nacións Unidas resolveu que a partir de 2009, cada 8 de xuño se celebraría o Día Mundial dos Océanos. Esta conmemoración ten como propósito concienciar á opinión pública sobre as consecuencias que a actividade humana ten para os océanos e poñer en marcha un movemento mundial cidadán a favor da xestión sostible destes, xa que son unha fonte importante de alimentos e medicinas e unha parte esencial da biosfera.

​Como di Ana Pêgo, autora do libro Plasticus maritimus. Unha especie invasora, “cada hora que pasa, mil toneladas de plástico van parar aos océanos, o equivalente a un camión cheo de plástico, por minuto! Xa é tempo de facermos algunha cousa.”
Plasticus maritimus. Unha especie invasora vén de ser publicado en galego por Kalandraka. Escrito por Ana Pêgo e Isabel Minhós Martins está ilustrado por Bernardo P. Carvalho. A tradución correu a cargo de Celia Recarey. A obra acadou a mención de honra na Feira do libro de Boloña 2020 e forma parte das lecturas do Plano Nacional de Leitura de Portugal.
O libro, cun formato próximo ao caderno de campo, contén información sobre a relación entre o plástico e os océanos. Tamén conta cunha guía para preparar visitas á praia para recoller e analizar exemplares do plasticus maritimus, co fin de alertar sobre as consecuencias do plástico na vida do planeta e a necesidade de erradicar o seu uso para preservar o ecosistema mariño.


Se os peores prognósticos se cumprisen, en 2050 o peso do plástico nos océanos superaría o dos propios peixes, por iso na novela de Rosa Aneiros Xelís, o guieiro das botellas de mar  o protagonista, xunto co mascato Mult, Ilva e o avó Jonás, emprende a afanosa tarefa de atrapar a illa de plástico para evitar a desfeita ecolóxica do planeta.
Con ilustracións de Andrés Meixide, a obra de Rosa Aneiros acadou en 2019 o Premio Merlín de Literatura Infantil e entrou na Lista de Honra da OEPLI.


Destinadas a un lectorado autónomo e imprescindibles nas nosas bibliotecas escolares para coñecermos  e traballarmos os Obxectivos de Desenvolvemento Sustentable 2030 , en ambas as dúas obras hai unha chamada ao coidado da vida submarina e a acción polo clima.


31/5/20

O Chispas, un músico cósmico

A colección Sopa de Libros, de Edicións Xerais, engade un novo título para lectores expertos, un tramo do lectorado novo que cómpre atender con xeito nas bibliotecas escolares e desde a mediación. O CHISPAS é o último título do escritor Manuel Rivas para xente nova e, abofé que xoga con elementos que poden espertar o interese da rapazada: a música, un ser singular, o poder das palabras, as modas, os mundos paralelos, os robots, o amor... Atraínte ese protagonista que pode levar tras de si ás lectoras e aos lectores, cabalgando na súa Montesa, coa guitarra ao lombo (atractivo personaxe para os varóns, ese grupo de risco lector). Pero a historia é moito máis, pois O Chispas garda algúns segredos, entre eles a da Fonte da Fala, de Estrelampo, a aldea na que naceu, ou o porqué do seu tic espectacular. As ilustracións son de Sonia García, quen ten traballado, entre outros ámbitos, en ilustración científica.

Non está sobrada a LIX galega de textos que conectan coa ciencia ficción pero O Chispas pode ser unha invitación adentrarse no xénero, en contextos de clubs de lectura ou, simplemente na busca individual do lector e da lectora. 



30/5/20

Lecturas para o verán: Vampira de biblioteca de Ledicia Costas

Vampira de biblioteca é o último libro que vén de publicar a escritora Ledicia Costas con ilustracións de Víctor Rivas na colección Merlín de Xerais.
A novela conta a historia de Eleonora, unha vampira un tanto peculiar que vive nunha biblioteca especial como a Biblioteca Joanina da Universidade de Coímbra. Como os morcegos que habitan na biblioteca portuguesa, Eleonora ten que eliminar a todo becho que ameace a conservación dos libros. Acompañada de Xa e Mon, os seus morcegos de confianza e coa complicidade dunha bibliotecaria, un avó e os seus netos, terá que enfrontarse aos insectos bibliófagos para preservar os libros desta importante biblioteca.
Proposta moi acaída para as recomendacións lectoras do verán e destinada a partir dun lectorado autónomo, con Vampira de biblioteca tense asegurada unha lectura divertida, con nomes, personaxes e diálogos moi ocorrentes amais dunha defensa das bibliotecas, dos libros, da lectura e da literatura.

24/5/20

Libros galegos na Lista de Honra 2019 da OEPLI


A OEPLI (Organización Española para o Libro Infantil e Xuvenil) xunto coas súas seccións territoriais: Consejo General de libro (castelán), ClijCat (catalán), Galtzagorri (euskera) e Gálix (galego), e en colaboración co Ministerio de Cultura y Deporte, elaboran todos os anos un catálogo de literatura infantil e xuvenil que contén unha  selección bibliográfica de 200 títulos infantís e xuvenís publicados nese período, obedecendo a criterios de calidade e idoneidade para os tramos de idade en que a miúdo se clasifican as coleccións e que os fai merecedores de formar parte desa lista de honra por consideralos significativos dentro da gran produción existente.

Forman parte desta selección de 2019 os seguintes títulos en galego:

0-6 anos
O país do gran furado. Xerardo Quintiá . Baía Edicións
O veleiro verde. María Fumaça. Editorial Galaxia
Ola! Son un bicho bóla! Elvira Ribeiro. Apiario
Ratos de viaxe. Oli. Kalandraka

A partir de 6 anos
A que cheiran as cores?A esperada guía para coñecer o cerebro. Juan Casto Rivadulla. Editorial Galaxia
Os nosos bosques. Diego García et alii. Miudiño S. Coop. Galega
A pequena compaña. Carlos Labraña. Edicións Embora
Bicos e non balas. Antonio García Teijeiro. Editorial Galaxia

A partir de 9 anos
Lúa en ningures . Beatriz Maceda Abeleira. Xerais
Noé e gato fan teatro. Gloria Sánchez. Oqueleo
Pioneiras 2.Galegas que abriron camiño. Anaír Rodríguez. Xerais
Somos os monstros. Paula Carballeira. Xerais

A partir de 12 anos
Conta nove estrelas .Andrea Maceiras. Xerais
Xelís, o guieiro das botellas do mar. Rosa Aneiros. Xerais

Xuvenil
Be water. Antía Yáñez. Cuarto de inverno
Memoria do silencio. Eva Mejuto. Xerais
O grupo. An Alfaya. Xerais
O home que mercou un libro. Paco Martín. Editorial Galaxia
Os corpos invisibles. Emma Pedreira. Xerais
Parece unha formiga. Pablo Otero. Kalandraka
Penumbra. Daniel Landesa. Xerais

Tamén hai libros que se poden ler no orixinal ou na tradución ao galego, aínda que fosen seleccionados noutra lingua:

0-6 anos
Distinta. Beto Valencia. Kalandraka
O pirata valente. Ricardo Alcántara. Kalandraka
Animais. Antonio Rubio. Kalandraka

A partir de 6 anos
Bechopoemas e outras bestas. Leire Bilbao. Kalandraka
O home que contaba estrelas . Arturo Abad. OQO
Versos e viceversos . Antonio García Teijeiro e Juan Carlos Martín Ramos. Kalandraka

Xuvenil
Iridium . Francisco Castro. Editorial Galaxia
Medo. Care Santos. Edebé

Neste ENLACE pódense consultar todos os libros seleccionados no ano 2019.

20/5/20

Galicia contada aos non galeguistas


Edicións Xerais de Galicia presenta entre as súas novidades desta primavera estraña, un libro ben curioso, pois polo contido e pola súa edición sáese do común e consegue sorprender, sempre que á súa lectura se entre con mirada aberta, procurando atar ben os prexuizos. Pois ben, o xornalista Manuel Veiga Taboada pon nas mans do lector experto e adulto este Galicia contada aos non galeguistas a modo de pequeno manual para desfacer estereotipos (algúns, que quedan outros tantos ou máis) sobre o que vén sendo iso de ser galegos, que vén sendo iso de Galicia e por que pasa o que pasa. 

A través de pequenos capítulos, o autor convídanos a unha viaxe por esa "paisaxe tatuada" que constitúe Galicia, avísanos de que "observar os camiños" levaranos a coñecer o país, que algunha das claves está en saber quen son e quen foron "os donos da terra"; explícanos por que Galicia é unha "fábrica de ministros" ou que "a ambigüidade da escaleira ten explicación", entre outras. Manuel Veiga rende contas das fontes históricas que nutren a súa versión desta Galicia que cómpre recoñecer, o que motiva a buscar novas lecturas e exploracións históricas.

A edición dun tamaño ergonómico garda tamén a sorpresa das ilustracións de autoría de Jano (Alejandro Viñuela Agra).

Desde a óptica das bibliotecas escolares este libro pode motivar debates interesantes en reunións de clubs de lectura de alumnos dos últimos niveis do ensino ou de grupos de adultos, o mesmo que algúns dos seus capítulos poden dar entrada a outras lecturas máis específicas da historia de Galicia; por todo isto é un material a valorar para a súa inclusión na colección das bibliotecas de ensino secundario.

6/5/20

Novidades editoriais sobre Ricardo Carvalho Calero


Moitas son as novidades editoriais en torno á vida, obra e pensamento do polifacético autor homenaxeado nas Letras Galegas 2020, Ricardo Carvalho Calero.

Para primeiros lectores e lectoras

Polo Correo do Vento. Lela Edicións, 2020
Os autores desta banda deseñada toman os personaxes da novela Scórpio, Scórpio e Cleo, que funcionan como fío condutor da súa biografía.
Os debuxos son de Miguel Pérez Ramudo.
 




Para lectores/as  autónomos/as

Héctor Cajaraville. Xerais, 2020.
O libro inclúe un percorrido pola biografía e a obra do autor. Engade sete pequenas pezas teatrais sobre momentos concretos da vida de Carvalho Calero.
  
 








Alberto Ramos. Auga editora, 2020.
Con ilustracións de Antonio Seijas, nesta biografía o autor fai un percorrido pola xeira vital e intelectual de Carvalho Calero.



 
Para lectorado experto, xuvenil e adulto 
 


Charo Baleirón Sóñora,Marta Domínguez Tenreiro e Belén Rodríguez Suárez. Hercules Ediciones, 2020.
O libro conta cunha breve biografía e unha cronobiografía, unha escolma de textos acompañada dunha guía de lectura, un “Paso a palabra” e o xogo-escapada “A caixa de Don Ricardo”, que propón un percorrido por Ferrol.

    





Henrique Dacosta. Xerais, 2020.
Libro divulgativo sobre a vida e a obra do autor das Letras Galegas 2020. 




  

 
Entrevista feita entre os anos 1983 e 1984. Abórdanse nela algúns temas esenciais, como a biografía, a política, a formación intelectual, a crítica literaria, a lingüística, a poesía, a narrativa e o teatro. 
 


 







Neste libro diferentes narradores iluminan o conxunto da obra literaria, lingüística ou filolóxica de Carvalho Calero e as sucesivas etapas biográficas.



Antoloxías poéticas

 
Ricardo Carvalho Calero. Escolma poética e limiar de Pilar Pallarés. Chan da Pólvora, 2020.
 


Ricardo Carvalho Calero. Selección de Paulo Fdez Mirás e prólogo de Carmen Blanco. Através Editora, 2019.

8/4/20

Cociñamos na casa

Estes días que pasamos en casa debido á situación excepcional que estamos vivindo pola pandemia da COVID-19 son unha boa ocasión para aprendermos a cociñar ou para mellorarmos os nosos dotes culinarios. E as crianzas tamén.
Alén de todas as receitas que se poden recoller dos nosos familiares queremos lembrar algúns libros de cociña que de seguro xa están nas nosas bibliotecas escolares.
  

As receitas de Rosaura combina a cociña coa poesía. Publicado por Belagua en 2018 é un álbum de Isabel Blanco, ilustrado por Luz Beloso.
O libro comeza presentándonos a Rosaura, afeccionada á cociña, e facendo unha listaxe co material necesario para a elaboración dos pratos. A continuación recolle media ducia de receitas escritas en verso e pensadas para que os nenos e nenas poidan achegarse ao mundo da gastronomía dun xeito sinxelo.
No seguinte enlace podedes escoitar algunhas das receitas nunha sesión de lectura de Bibliobernardino (Biblioteca do IES As Barxas de Moaña, Pontevedra).


Nicolás cociña sen lume 



Publicado en Kalandraka, con texto de Bata e ilustracións de Alicia Suárez,  Nicolás cociña sen lume, convida a cociñar canapés, macedonia, xeado de plátano, batido de amorodo... seguindo os pictogramas.

Cociñando con Bolboretas no bandullo

O que naceu en 2013 como un proxecto dixital de Diana Fernández e David Díaz , apaixonados da gastronomía mais tamén comprometidos coa lingua e a cultura galegas concretouse no libro de receitas Cociñando con Bolboretas no bandullo, publicado en 2018 por Xerais.
O libro componse de 15 receitas que van acompañadas de ilustracións dos ingredientes, utensilios, graos de dificultade e unhas breves instrucións de como elaboralas. Pódese seguir todo o proceso de elaboración das receitas na súa canle de YouTube a través dos códigos QR que aparecen en cada unha delas.
Tamén podedes consultar o blog.



Cociña infantil e familiar


Desde 2011 a editorial Ouvirmos foi publicando os libros da colección Cociña infantil e familiar que está composta por 10 libros de receitas que ensinan a preparar pratos fáciles e creativos, especificamente concibidos para elaborar en familia. Forman parte da colección: Bocadillos e Sándwichs ,Sobremesas, Pastas e pizzas, Menús para festas, Arroces, Peixes, Carnes, Chocolates, Pratos do mundo e Xeados.
Tamén podedes consultar a entrada en Redelectura.



2/4/20

NOVAS LECTURAS PARA UNHA BIBLIOTECA INCLUSIVA


O 2 de abril celebramos o Día Internacional da Literatura Infantil e Xuvenil pero tamén conmemoramos o Día Mundial da Concienciación sobre o Autismo (#DiaMundialAutismo).

Das nosas lecturas para conformarmos unha biblioteca máis inclusiva queremos recomendar o álbum TEA de Alejandra González e publicado pola editorial Pintacoda.
TEA presenta unha dobre mirada sobre o Trastorno do Espectro Autista, a nosa e a das persoas autistas, por iso nos fornece de dous pares de lentes para entendermos e empatizarmos, tan necesitados estes días, con este colectivo. Poderemos entender por que son hipersensibles a diferentes estímulos auditivos, visuais, táctiles, por que senten ansiedade en espazos ruidosos ou por que teñen dificultades para comprender as nosas bromas ou a linguaxe figurada. Nas últimas páxinas do libro encontramos unha guía didáctica que explica as principais alteracións que presenta unha persoa con TEA.

 

Recentemente Kalandraka publicou na súa colección Makakiños A verdadeira historia de carapuchiña vermella, texto de Bata, a partir da versión de A. R. Almodóvar e con ilustracións de Marc Taeger . Na presentación editorial dinnos que “esta versión de Carapuchiña xa é accesible con pictogramas para que a frescura e a sabedoría dos contos da avoa chegue con toda a súa esencia ás persoas con necesidades de apoio educativo”.
 
Estes recursos son imprescindibles nas nosas bibliotecas escolares porque son ferramentas para entendermos a escola: plural, diversa e accesible.

30/3/20

Novas de Banda Deseñada: Luzbell e o demo bombilla


Luzbell o demo bombilla é un álbum de banda deseñada publicado por Galaxia con guión de Diego Rosales e debuxos de Xosé Tomás. Os creadores recuperan nel un personaxe que vira a luz no congreso Pé de imaxe (a mediados dos noventa), pasando pola revista Golfiño, a páxina dominical do diario El progreso e no Diario de Pontevedra.

O álbum componse de historias humorísticas dunha páxina nas que o protagonista é o demo Luxbell que xunto con outros personaxes como Vatio, Al-Kalina, Oliverius, Slurp e outros, revisitan a Historia Sagrada cun toque de humor para tirarnos o sorriso.

Destinada a un lectorado experto, a banda deseñada é un xénero moi demandado entre os/as adolescentes.

Se queredes consultar recomendacións de cómic en galego, tedes as nosas seleccións nas Maletas viaxeiras ou nos Taboleiros de Pinterest.

27/3/20

27 de Marzo: Día Mundial do Teatro 2020

O 27 de marzo de 1962 o Instituto Internacional do Teatro (ITI) decidiu establecer esta data como Día Mundial do Teatro. O obxectivo é poñer en valor a forma de arte "teatro".  Este ano o dramaturgo pakistaní Shahid Nadeem é o encargado do manifesto baixo o lema: O Teatro como Santuario.

Achegamos dúas recomendacións para coñecer mellor este arte e para interpretala: 


Teatro é un dos Actividarios de Ediciones Ekaré. Un caderno cheo de información e propostas, de comedia, drama e traxedia. Pra traballar na escola e en familia. Un teatro que so pide ollos para ven e mans para aplaudir.





Ricardo Carvalho Calero. A pegada do compromiso de Héctor Cajaraville  editado por Xerais. Unha biografía que achega a nosa rapazada á figura do homenaxeado nas Letras Galegas 2020. O autor inserta 7 pequenas pezas teatrais sobre momentos puntuais da vida de Calero. Unha homenaxe á afición deste polo teatro e ás 7 pezas teatrais que publicou.




20/3/20

20 de marzo:Día Mundial da Narración Oral


Todos os anos, o 20 de marzo conmemoramos o Día Mundial da Narración Oral. Comezou a celebrarse en Suecia coincidindo co equinoccio de primavera e despois foi estendéndose ao resto dos países.

Este ano vai ser moi diferente a súa celebración por causa da pandemia do coronavirus (COVID-19) pero nestes días as asociacións de narradores/as orais Colectivo NOGA e AEDA Narración Oral poñen á nosa disposición contos para ver e escoitar mentres quedamos na casa.







Como novidade bibliográfica, Antonio Reigosa vén de publicar en Xerais con ilustracións de Noemí López a Guía de campo de Galicia Encantada. Dos seres míticos e dos lugares que habitan, unha guía para divulgar a nosa cultura popular chea de mitos, lendas, ritos, contos, saberes e sucedidos, tesouros, lendas urbanas, prodixios, mitoloxía, pontes, camiños... que conforman o noso gran patrimonio inmaterial.

É tempo tamen para revisitar a  súa páxina: Galicia encantada. Enciclopedía da fantasía popular de Galicia, especialmente o apartado de XOGOS (diversións, entretementos, enredos, pasatempos, actividades físicas ou mentais tradicionais de Galicia.)  nestes momentos de acougo forzoso.




18/3/20

Poesía..."irmá paxaro" de Tamara Andrés


Próxima a celebración do Día mundial da poesía o 21 de marzo, neste tempo difícil que nos toca vivir, queremos recomendar irmá paxaro de Tamara Andrés, con ilustracións de María Montes. Este poemario  foi publicado a finais de 2019 na recén creada editorial  Cuarto de Inverno

irmá paxaro é finalista dos Premios da Gala do libro galego 2019 tanto no apartado de poesía, no xuvenil como no de libro ilustrado.

Libro de poemas destinado a un lectorado xuvenil,  en irmá paxaro atopamos "o relato da perda da complicidade entre dúas irmás descoñecedoras de que o golpe máis duro é o paso do tempo". A xove poeta Tamara Andrés "emprega a poesía, nun texto profundamente narrativo, para mostrarnos a dispar evolución de dúas irmás que mantiñan un elo na infancia que lles permitía ser elas mesmas até que quebrou co despregar das ás da irmá pequena: a irmá paxaro".

Lectura que recomendamos para un club de lectura de poesía, para as nosas seleccións poéticas ou para as lecturas en voz alta, aínda que sexan virtuais agora mesmo.
ela pousou a súa ollada sobre min
e vestiume

6/3/20

Poesía... "Porque te quero" de Baldo Ramos

A editorial Galaxia vén de publicar Porque te quero de Baldo Ramos, con ilustracións de Anxo Rodríguez Fariña.
O poeta afirma que se inspirou nas ocorrencias e preguntas que lle facían os seus fillos a medida que ían descubrindo o mundo. Concíbeos como poemas reversibles que se len practicamente igual de esquerda a dereita que de dereita a esquerda, promovendo tamén a lectura como xogo.
Neste mes que celebramos o Día da poesía, temos que apostar pola lectura de poemas nas nosas bibliotecas, nas seleccións de lectura, nas mochilas viaxeiras, nos clubs de lectura... para facermos lectores e lectoras  porque as crianzas non teñen prexuízos e de seguro que quererán seguir lendo poesía.

Velaquí o poema final que nos convida a ler e escribir:

RECEITA PARA ESCRIBIR POEMAS IRRACIONAIS

Le este libro durante
6 días, 6 horas e 66 minutos
Escolle de cada poema unha palabra.
Reméxeas con maña e forza:
a poesía éche o que ten.
Méteas no peto
da túa chaqueta reversible
outros 6 días, 6 horas e 66 minutos.
Nese momento exacto
sentirás que se entenden.
Que teñen vida propia
e que saben convivir.
Entón é o momento
de sacar o poema a pacer.
Compartilo cos que te queren.
escribir é sempre un xeito
de agradecer que nos queiran.

29/1/20

Libros para mediadores/as de lectura I: Da Carapuchiña ao señor Lamote

Miguel Vázquez Freire vén de publicar en Xerais Da Carapuchiña ao señor Lamote.Clásicos da literatura para a infancia e a mocidade en lingua galega.

O autor propón neste libro coñecer  a LIX universal e faino percorrendo a historia da literatura infantil e xuvenil desde a Carapuchiña vermella até o Ramón Lamote de Paco Martín.

Sabedores de que moitos descoñecemos a existencia destas versións ao galego de clásicos universais e tamén na necesidade de coñecermos o canon da LIX, este ensaio é ben oportuno para as bibliotecarias e bibliotecarios escolares e para as mediadoras de lectura porque como di o autor na presentación “ os mellores libros para a infancia e a mocidade son os mellores libros que calquera, incluídos nenos e mozos, poden ler;os libros, logo máis universais, os libros para todos”.

De moito interese son tamén as referencias que fai ao cine nas 32 propostas e a bibliografía que as acompaña.




20/1/20

Para ler en Paz


Cara ao 30 de xaneiro achegamos unha selección de lecturas para traballar no Día Escolar da Non Violencia e a Paz. Diversidade de xéneros para falar de guerras, migracións, tiranos, racismo e mobilizacións (grandes e pequenas) na procura dun mundo mellor. Lecturas que convidan á reflexión, o debate  e o compromiso. Lecturas que axudan a conformar a colección das nosas bibliotecas como auténticos viveiros de cidadanía.

Para primeiros lectores e lectores autónomos:
Ninguén coma min da editorial Kalndraka, unha oportunidade para reflexionar sobre a egolatría e os abusos de poder, para traballar a metáfora e para sorprender cun final que amosa que non todo é o que parece.
Tamén de Kalandraka, Non Stop. A recuperación deste Premio Hans Christian Andersen convida a seguir o camiño seguro fronte ao caos, cara a construcción dun nundo mellor.
De Alba Editorial, na colección Pequeñx & Grande, Anne Frank e Martin Luther King. Dúas biografías que achegan a infancia destes significados personaxes.

Para todos os públicos, lecturas sen palabras:
Migrantes, de Libros del Zorro Rojo. A forza das imaxes para falar do drama da migración e promover a empatía e a solidaridade.
Da mesma editorial, Un camino de flores. Un canto poético á importancia dos pequenos xestos capaces de transformalo todo.

Para lectores expertos:
Todo lo que pudimos, de Kraken Ediciones. Un relato biográfico sobre a traxedia da migración dunha familia que fuxe do Vietnam.
Da Editorial Milenio, Sweet Sixteen. O problema racial nos EEUU na pel dunha adolescente.
Un cómic de Demo  Editorial, Tanta paz leves. Unha reflexión sobre os periodos de posguerra e as feridas que permanecen abertas.
Al sur de la Alameda, de Ediciones Ekaré. Unha novela ilustrada que pon o protagonismo nas revoltas estudiantís, na loita polos dereitos e pola procura dun mundo mellor.




3/12/19

Biblioteca Inclusiva: La Piscina

Hoxe, Día Internacional das Persoas con Discapacidade, queremos reseñar o libro co que foron agasalladas as bibliotecas escolares participantes na xornada de formación Biblioteca inclusiva. Cidadanía e Diversidade.


La piscina de Jy Hyeon Lee, un álbum que convida a mergullarse no mundo da imaxinación, a atopar o lugar propio, a ver 

25/11/19

Novembro: Mes da Ciencia en Galego nas Bibliotecas II

Seguimos recibindo novidades para este mes de novembro que permiten cubrir as necesidades de fondo informativo en galego.

A colección de Kalandraka  Vitamina N, dirixida polo divulgador medioambiental Antonio Sandoval, incorpora un novo título: VitaminaN. Guía esencial  para unha vida rica en natureza. O autor, Richard Louv achega unha serie de creativas e divertidas propostas, aptas para todas as idades, coa finalidade de interactuar coa natureza.


Desde Galaxia chega unha guía para coñecer o cerebro: A que cheiran as cores? do profesor da UDC e divulgardor científico Juan Casto Rivadulla Fernández. Nela se recollen algúns dos descubrimentos científicos máis importantes sobre o funcionamento desta máquina.

#25N: Visibilizar para educar

Dentro das accións que as bibliotecas escolares de Galicia levan a cabo o 25 de Novembro está adquisción de fondos e as recomendacións lectoras, que contribúen a educar en igualdade e a concienciación do problema da violencia de xénero.
Achegamos dúas propostas que falan de mulleres pioneiras, que tratan de visibilizar as súas historias e traballos como exemplo e inspiración para nenas, mozas e mulleres de todas as idades. 

 A editorial Xerais presenta o segundo volume de Pioneiras.Galegas que abriron camiño.


A segunda proposta parte dun proxecto colaborativo que aúna o esforzo e xenerosidade de máis de 150 persoas para dar a coñecer a 100 mulleres que cambiaron a historia e o conto. No me cuentes cuentos ten as súas 100 historias tamén dispoñibles en formato podcast.


4/11/19

Novembro: Mes da Ciencia en Galego nas Bibliotecas

No mes de novembro, as nosas bibliotecas énchense de actividades que promoven o lugar que debe ocupar a ciencia nas mesmas e reclaman a necesidade de textos en galego.
Novidades para primeiros lectores: Os Planetas, unha lectura que convida a investigar e experimentar, achegando, dun xeito lúdico, aos máis pequenos ao mundo do espazo e os planetas.


Para primeiros lectores e lectores autónomos, Conta Comigo, unha divertida forma de ver o mundo a través das matemáticas.



Para lectores autónomos, Viaxe ao futuro unha nova proposta de respostas rápidas para preguntas enxeñosas.


E para lectores expertos, Mate-glifos un percorrido pola historia das matemáticas a través dos seus símbolos.


31/10/19

Novidades en tempo de Samaín

Chegan novidades ás bibliotecas escolares para celebrar o Samáin.
Para primeiros lectores, atopamos en Xerais A araña que lles tiña medo ás arañas. Un conto de medo e humor onde as risas gañan aos arrepíos.



De Zahorí Books El gran libro de los sustos. Un convite a indagar o que hai dentro deses seres aos que lles temos tanto medo.





Para primeiros lectores e lectores autónomos, Mortiña. Un curmán repugnante de Hércules de Ediciones. Unha nova entrega das aventuras da nena zombi que mantén a intriga ate o final. 

 

E para os lectores expertos, Pánico no Bosque dos Corazóns Murchos de Bululú. Agardada tradución ao galego da obra do autor e ilustrador Jack Mircala.