Unha lección de historia: Dende 1880

O álbum Dende 1880 de Pietro Gotusso, publicado en Kalandraka, é o gañador do XIIIPremio Internacional Compostela para álbums ilustrados 2020.

Nesta narración gráfica convídasenos a pasear pola historia destes dous últimos séculos a través dunha cidade occidental que vai mudando co paso do tempo. A lectura deste álbum sen palabras proponnos un xogo de busca das diferentes mudanzas: na libraría, no café, na galería de arte (que nos mostra a historia da pintura), coa chegada da guerra, nos hábitos, nos modelos de negocio, nas familias, nos medios de transporte, nos avances tecnolóxicos ou na tipografía.

Este álbum debería formar parte da colección de todas as bibliotecas escolares.

Novidades da editorial Cuarto de Inverno

A editorial Cuarto de inverno vén de publicar estas dúas novelas na súa colección xuvenil.

En SuperUlex, Susana Sanches Aríns preséntanos a Clara, a primeira " superoína" galega que tras un tratamento de quimioterapia xa non é quen de tolerar as inxustizas que ocorren ao seu redor, especialmente no Instituto. Con traxe de superheroína e coa axuda da avoa Rorita, conseguirá levar ao centro ás mozas e mozos que están na marxe. 

A autora, con cariño e tenrura, móstranos unha adolescencia realista, sen prexuízos nin condescendencias.

En Velloucas e Minchas, III Premio María Victoria Moreno de Literatura Xuvenil, Lorena Conde conta con moito humor como
Sofía, Gabri e a veciñanza terán que resolver un sarillo no que están metidas a avoa de Sofía e as súas amigas do 1º andar.

Unha vez máis a solidariedade e a amizade son quen de amañar os problemas.

Ambos os dous libros, dirixidos a un lectorado experto e xuvenil, acaen ben na colección das bibliotecas escolares con temática inclusiva e poden achegar diferentes miradas sobre a adolescencia nos Clubs de Lectura.

Por unha biblioteca inclusiva: LECTURA E DISCAPACIDADE. QUE, QUEN E COMO

Parabenizamos á editorial Bululú por publicar en galego LECTURA E DISCAPACIDADE. QUE, QUEN E COMO  da autoría da bibliotecaria Susana Peix e da psicóloga Meritxell Almirall, que xa coñeciamos na súa versión orixinal en catalán.

As autoras achégannos un manual para entender a diversidade funcional, cales son as necesidades lectoras destes nenos e nenas e como se poden normalizar a través dos recursos que existen.

Resulta de interese para as bibliotecas escolares porque nos fornece de información moi útil para conformarmos unha biblioteca escolar inclusiva.

As propostas literarias que nos propoñen as autoras poden ser acrecentadas con títulos en galego.

Miña Guía, Meu Capitán

 

A editorial Kalandra vén de publicar "Miña Guía, Meu Capitán" unha historia de Gonzalo Moure, ilustrada por María Girón, cargada de emoción, sensibilidade e cor.

 

A capacidade transformadora e sanadora do amor entre un pai e unha filla. A superación das dificultades a través da imaxinación. Todo esto narrado e ilustrado con sensibilidade e sen dramatismo.

 

O autor achéganos á historia mesturando diálogos e reflexións persoais e a ilustradora convida a un paseo coa mirada da imaxinación e a seguir a historia a través do xogo das cores.

 

Un pequeno ser azul acompaña este paseo desde a portada...

Propostas lectoras para o Día Mundial dos Océanos

En decembro de 2008 a Asemblea Xeral das Nacións Unidas resolveu que a partir de 2009, cada 8 de xuño se celebraría o Día Mundial dos Océanos. Esta conmemoración ten como propósito concienciar á opinión pública sobre as consecuencias que a actividade humana ten para os océanos e poñer en marcha un movemento mundial cidadán a favor da xestión sostible destes, xa que son unha fonte importante de alimentos e medicinas e unha parte esencial da biosfera.

​Como di Ana Pêgo, autora do libro Plasticus maritimus. Unha especie invasora, “cada hora que pasa, mil toneladas de plástico van parar aos océanos, o equivalente a un camión cheo de plástico, por minuto! Xa é tempo de facermos algunha cousa.”

Plasticus maritimus. Unha especie invasora vén de ser publicado en galego por Kalandraka. Escrito por Ana Pêgo e Isabel Minhós Martins está ilustrado por Bernardo P. Carvalho. A tradución correu a cargo de Celia Recarey. A obra acadou a mención de honra na Feira do libro de Boloña 2020 e forma parte das lecturas do Plano Nacional de Leitura de Portugal.

O libro, cun formato próximo ao caderno de campo, contén información sobre a relación entre o plástico e os océanos. Tamén conta cunha guía para preparar visitas á praia para recoller e analizar exemplares do plasticus maritimus, co fin de alertar sobre as consecuencias do plástico na vida do planeta e a necesidade de erradicar o seu uso para preservar o ecosistema mariño.

Se os peores prognósticos se cumprisen, en 2050 o peso do plástico nos océanos superaría o dos propios peixes, por iso na novela de Rosa Aneiros Xelís, o guieiro das botellas de mar  o protagonista, xunto co mascato Mult, Ilva e o avó Jonás, emprende a afanosa tarefa de atrapar a illa de plástico para evitar a desfeita ecolóxica do planeta.

Con ilustracións de Andrés Meixide, a obra de Rosa Aneiros acadou en 2019 o Premio Merlín de Literatura Infantil e entrou na Lista de Honra da OEPLI.

Destinadas a un lectorado autónomo e imprescindibles nas nosas bibliotecas escolares para coñecermos  e traballarmos os Obxectivos de Desenvolvemento Sustentable 2030 , en ambas as dúas obras hai unha chamada ao coidado da vida submarina e a acción polo clima.

Cociñamos na casa

Estes días que pasamos en casa debido á situación excepcional que estamos vivindo pola pandemia da COVID-19 son unha boa ocasión para aprendermos a cociñar ou para mellorarmos os nosos dotes culinarios. E as crianzas tamén.

Alén de todas as receitas que se poden recoller dos nosos familiares queremos lembrar algúns libros de cociña que de seguro xa están nas nosas bibliotecas escolares.

  

As receitas de Rosaura combina a cociña coa poesía. Publicado por Belagua en 2018 é un álbum de Isabel Blanco, ilustrado por Luz Beloso.
O libro comeza presentándonos a Rosaura, afeccionada á cociña, e facendo unha listaxe co material necesario para a elaboración dos pratos. A continuación recolle media ducia de receitas escritas en verso e pensadas para que os nenos e nenas poidan achegarse ao mundo da gastronomía dun xeito sinxelo.
No seguinte enlace podedes escoitar algunhas das receitas nunha sesión de lectura de Bibliobernardino (Biblioteca do IES As Barxas de Moaña, Pontevedra).

Nicolás cociña sen lume 

Publicado en Kalandraka, con texto de Bata e ilustracións de Alicia Suárez,  Nicolás cociña sen lume, convida a cociñar canapés, macedonia, xeado de plátano, batido de amorodo... seguindo os pictogramas.

Cociñando con Bolboretas no bandullo

O que naceu en 2013 como un proxecto dixital de Diana Fernández e David Díaz , apaixonados da gastronomía mais tamén comprometidos coa lingua e a cultura galegas concretouse no libro de receitas Cociñando con Bolboretas no bandullo, publicado en 2018 por Xerais.
O libro componse de 15 receitas que van acompañadas de ilustracións dos ingredientes, utensilios, graos de dificultade e unhas breves instrucións de como elaboralas. Pódese seguir todo o proceso de elaboración das receitas na súa canle de YouTube a través dos códigos QR que aparecen en cada unha delas.
Tamén podedes consultar o blog.

Cociña infantil e familiar

Desde 2011 a editorial Ouvirmos foi publicando os libros da colección Cociña infantil e familiar que está composta por 10 libros de receitas que ensinan a preparar pratos fáciles e creativos, especificamente concibidos para elaborar en familia. Forman parte da colección: Bocadillos e Sándwichs ,Sobremesas, Pastas e pizzas, Menús para festas, Arroces, Peixes, Carnes, Chocolates, Pratos do mundo e Xeados.

Tamén podedes consultar a entrada en Redelectura.

NOVAS LECTURAS PARA UNHA BIBLIOTECA INCLUSIVA

O 2 de abril celebramos o Día Internacional da Literatura Infantil e Xuvenil pero tamén conmemoramos o Día Mundial da Concienciación sobre o Autismo (#DiaMundialAutismo).

Das nosas lecturas para conformarmos unha biblioteca máis inclusiva queremos recomendar o álbum TEA de Alejandra González e publicado pola editorial Pintacoda.

TEA presenta unha dobre mirada sobre o Trastorno do Espectro Autista, a nosa e a das persoas autistas, por iso nos fornece de dous pares de lentes para entendermos e empatizarmos, tan necesitados estes días, con este colectivo. Poderemos entender por que son hipersensibles a diferentes estímulos auditivos, visuais, táctiles, por que senten ansiedade en espazos ruidosos ou por que teñen dificultades para comprender as nosas bromas ou a linguaxe figurada. Nas últimas páxinas do libro encontramos unha guía didáctica que explica as principais alteracións que presenta unha persoa con TEA.

 

Recentemente Kalandraka publicou na súa colección Makakiños A verdadeira historia de carapuchiña vermella, texto de Bata, a partir da versión de A. R. Almodóvar e con ilustracións de Marc Taeger . Na presentación editorial dinnos que “esta versión de Carapuchiña xa é accesible con pictogramas para que a frescura e a sabedoría dos contos da avoa chegue con toda a súa esencia ás persoas con necesidades de apoio educativo”.
 
Estes recursos son imprescindibles nas nosas bibliotecas escolares porque son ferramentas para entendermos a escola: plural, diversa e accesible.

Lectura e diversidade: novos títulos en galego

Acaban de publicarse novos libros en galego que facilitan a lectura en pictogramas ou con textos de lectura fácil. Estes recursos son imprescindibles nas nosas bibliotecas escolares para facelas plenamente inclusivas.

Kalandraka vén de publicar A verdadeira historia de carapuchiña vermella, texto de Bata, a partir da versión de A. R. Almodóvar e con ilustracións de Marc Taeger.

Tamén en Kalandraka, con texto de Bata e ilustracións de Alicia Suárez, aparece Nicolás cociña sen lume, que convida a cociñar, seguindo os pictogramas.

A editorial La mar de fácil verque ao galego dous títulos seguindo as pautas de lectura fácil (textos para ser leídos e entendidos por persoas con dificultades de comprensión lectora).

O primeiro título é Trampa de lume de Núria Martí Constans. Nesta novela cóntasenos a historia das loitas laborais das mulleres que se produciron en EE.UU nos primeiros anos do século XX , provocadas polo incendio dunha fábrica onde traballaban mulleres en condición pésimas e que acabou coa vida de 146 destas mulleres.

Moito ruído e poucas noces, de William Shakespeare, adaptada por Núria Martí Constans é unha comedia romántica, onde a verdade e o amor triunfan finalmente por enriba dos enganos e os malentendidos.

Unha ollada a estes títulos pode dotar de recursos aos clubs de lectura inclusiva.

LÚA EN NINGURES, a voz dos sen voz.

Xerais publicou na súa colección Merlín Lúa en Ningures de Beatriz Maceda  con ilustracións de Laura Veleiro.

Lúa e a súa familia vense na obriga de fuxir do horror da guerra e instálanse en Ningures, un campo de refuxiados onde semella que xa non queda esperanza. Porén, vai ser nese lugar onde Lúa descubra cales son os valores realmente importantes na vida das persoas ás que lle dá voz: Un refuxiado é unha persoa que se ve obrigada a abandonar o seu país por causas políticas, por unha guerra...

Destinado a lectores autónomos achéganos os dereitos da infancia que se cuestionan en toda a novela: Xa ninguén lembra a Declaración de Dereitos da Infancia?Xa ninguén lembra que todos os seres humanos somos iguais?

E tamén atopamos, como se sinala en Versos e aloumiños,  a homenaxe a O Principiño de Saint Exupery: ...e lembrei esa frase do Principiño que di: Pregúntome se as estrelas se iluminan co fin de que algún día cada un poida atopar a súa.

DÍA INTERNACIONAL DO LIBRO INFANTIL

O 2 de abril conmemoramos o Día Internacional do Libro Infantil,  data  de nacemento  de Hans Christian Andersen.
Achegamos  nesta data algúns títulos que deben formar parte da colección das nosas bibliotecas escolares.

O segredo do avó de Pedro Mañas, con ilustracións de Zuzanna Celej (Kalandraka, 2019), é un fermoso canto á chegada da primavera e do espertar da natureza. Este álbum é unha fonte de inspiración estética para o noso alumnado xa que as imaxes dialogan co texto, non o completan. Ao tempo ofrece recursos para a creación artística pola mestura de técnicas.

Agora non, Bernardo de David McKee (Kalandraka, 2019), un clasico que podemos ler en galego grazas á tradución de Xosé Manuel González. A temática do álbum é moi acaída co lema da edición do Día Internacional do Libro de deste ano"Os libros fannos acougar" pois necesitamos parar para escoitar.

Algúns recursos no Día Mundial da Radio

Como cada 13 de febreiro desde o ano 2013 celebramos o Día Mundial da Radio por ser a data da creación de Radio Nacións Unidas no ano 1946.

"Os obxectivos da xornada son concienciar ao público e aos medios de comunicación acerca da importancia da radio; alentar aos encargados de tomar decisións a crear e ofrecer acceso á información a través da radio; así como mellorar as redes e a coperación internacional entre os organismos de radiodifusión."

Este ano celébrase co lema:"Diálogo, tolerancia e paz" e o poder da radio para promover o entendemento e o empoderamento das comunidades.

Lembramos algúns recursos que non debería faltar nas nosas bibliotecas escolares.

RADIO BULEBULE de Paco Nogueiras con ilustracións de David Pintor, editado por Kalandraka.

"Unha ducia de cancións divertidas, pegadizas e inspiradas nas ondas herztianas conforman a grella de programación dunha emisora comunitaria onde "o falar non ten cancelas".

Ruído de Pablo Albo, con ilustracións de Guridi e editado en Narval.

Nesta historia é prender a radio e montar un grande barullo...

En RADIO PICARIÑA podedes acceder a  unha canle de música infantil  en galego á carta.

"Cándido e os demais", Premio Internacional Compostela para álbums ilustrados 2018

Cándido e os demais,  de Fran Pintadera no texto e Christian Inaraja nas ilustracións e publicado por Kalandraka recibe hoxe o XI Premio Internacional COMPOSTELA para álbums ilustrados 2018.

Este potente texto sinxelo convida a reflexionar sobre a diferenza, a poñerse en lugar de quen se sente ignorado e tenta pasar desapercibido, e a compartir a súa ollada do mundo.

Cándido e os demais ten que formar parte da colección das nosas bibliotecas porque nel estamos incluídos todos e todas.

As ilustracións do álbum ofrecen unha oportunidade para traballar o poder comunicativo da imaxe, que pode dicir tanto coma as palabras.

Por unha biblioteca inclusiva: Elisa no mundo das marabillas

No ano 2017 a editorial Galaxia xunto con APAMP (Asociación de familias de persoas con parálise cerebral) editaron o libro Elisa no mundo das marabillas.

Este álbum ilustrado xestouse nun Obradoiro Artístico de APAMP, cando  un día decidiron escribir e ilustrar a historia de Elisa, unha nena que padece parálise cerebral e móvese nunha cadeira de rodas.

A través desta historia de superación atopamos realidades moi próximas, as das persoas que padecen parálise cerebral pero tamén as que sofren múltiples atrancos na súa vida cotiá.

Destinado a primeiros lectores, este álbum axuda a conformar unha biblioteca escolar inclusiva e as múltiples actividades que se poden facer nela para visibilizar a diferencia.

Neste vídeo podedes ver un contacontos de Elisa no mundo das marabillas dirixido aos rapaces e rapazas do CEIP Alfonso Rodriguez Castelao de Vigo.

"O año que é un PORQUIÑO" de Hércules Ediciones

Nas novidades de Hércules Ediciones atopamos O año que é un PORQUIÑO de Pim Lammers e Milja Praagman. A tradución ao galego é de María Alonso Seisdedos.

Destinado a primeiros lectores, con este álbum podemos traballar o xénero e a afirmación da propia identidade.

Este álbum ben podería estar nunha mochila de Lectura e diversidade, nunha selección de libros sobre coeducación e, por suposto, conformando a colección da biblioteca escolar.

Iniciamos " Unha longa viaxe"

Entre as últimas publicacións de Kalandraka está Unha longa viaxe  de Daniel H. Chambers, ilustrado por Federico Delicado e traducido por Xosé Ballesteros.

Destinado a primeiros lectores, o álbum entrelaza dúas viaxes: a das aves e a dos refuxiados. Ambas teñen en común o medo dos viaxeiros máis mozos fronte a esperanza dos adultos.

Imprescindible nas bibliotecas escolares para sensibilizar no tema das migracións, os refuxiados ou os dereitos humanos.

Novidades na colección Fóra de Xogo de Xerais

Unha das novidades de Xerais é a novela O que sei do silencio de Andrea 

Maceiras,  que foi finalista do Premio Raíña Lupa en 2017.

No inicio da novela Delia, a protagonista, di dela mesma "Chámome Delia e son unha covarde. Esta é a historia de como acosamos a Silke durante os meses que estudou no noso instituto. E de como todo se nos foi das mans. Das miñas mans inútiles". E crea un blog para contar esta historia de acoso pasivo e cómplice.

Destinada a un lectorado xuvenil, a novela é ben interesante para tratar o tema do acoso, e se se fai como lectura compartida nun club de lectura dará para reflexionar sobre este problema tan grave entre os e as adolescentes e mudar o rumbo das relacións interpersoais nos centros de ensino.

Con Fóra do normal  María Reimóndez acadou o Premio Agustín Fernández Paz de Narrativa Infantil e Xuvenil pola Igualdade 2017. Ilustrada por Antonio Seijas, a novela trata do conflito entre identidade e corpo que ten André, o mozo protagonista. Acompañado de amigas, como Mucha e a Patrulla Trans, e da lectura de cómics intentará superar o problema porque "no medio da treboada, a única heroicidade é resistir".

Destinada tamén a un lectorado xuvenil, é unha novela moi acaída para a selección de lecturas sobre igualdade e coeducación, onde se nos fala de tecer redes de afectos, máis alá do xénero e que posibilitará a moitos mozos e mozas atopar referentes... novela espello mais tamén xanela ao mundo.

Títulos ambos,  imprescindibles tamén, nas suxestións lectoras para o verán.

Lectura fácil en galego: 20.000 leguas baixo dos mares de Jules Verne.

Parabenizamos a publicación do libro de Jules Verne 20000 leguas baixo dos mares que vén de editar Galaxia segundo as pautas de lectura fácil.

A lectura fácil vén atender a un lectorado con dificultades de lectura ou de comprensión e facilita o disfrute da lectura, facendo unha biblioteca, unha escola e, por extensión, unha sociedade máis democrática e inclusiva.

Imprescindible para a normalización linguística, este título (primeiro dunha serie), non debe faltar nas bibliotecas escolares galegas, sobre todo nas de secundaria, para incentivar a creación de clubs de lectura fácil ou para favorecer a alfabetización en galego de lectorado con dificultades de aprendizaxe.

Ë destacable tamén o título que inicia esta serie, pola vinculación da obra e de Jules Verne a Galicia.