Unha lección de historia: Dende 1880

O álbum Dende 1880 de Pietro Gotusso, publicado en Kalandraka, é o gañador do XIIIPremio Internacional Compostela para álbums ilustrados 2020.

Nesta narración gráfica convídasenos a pasear pola historia destes dous últimos séculos a través dunha cidade occidental que vai mudando co paso do tempo. A lectura deste álbum sen palabras proponnos un xogo de busca das diferentes mudanzas: na libraría, no café, na galería de arte (que nos mostra a historia da pintura), coa chegada da guerra, nos hábitos, nos modelos de negocio, nas familias, nos medios de transporte, nos avances tecnolóxicos ou na tipografía.

Este álbum debería formar parte da colección de todas as bibliotecas escolares.

Novidades da editorial Cuarto de Inverno

A editorial Cuarto de inverno vén de publicar estas dúas novelas na súa colección xuvenil.

En SuperUlex, Susana Sanches Aríns preséntanos a Clara, a primeira " superoína" galega que tras un tratamento de quimioterapia xa non é quen de tolerar as inxustizas que ocorren ao seu redor, especialmente no Instituto. Con traxe de superheroína e coa axuda da avoa Rorita, conseguirá levar ao centro ás mozas e mozos que están na marxe. 

A autora, con cariño e tenrura, móstranos unha adolescencia realista, sen prexuízos nin condescendencias.

En Velloucas e Minchas, III Premio María Victoria Moreno de Literatura Xuvenil, Lorena Conde conta con moito humor como
Sofía, Gabri e a veciñanza terán que resolver un sarillo no que están metidas a avoa de Sofía e as súas amigas do 1º andar.

Unha vez máis a solidariedade e a amizade son quen de amañar os problemas.

Ambos os dous libros, dirixidos a un lectorado experto e xuvenil, acaen ben na colección das bibliotecas escolares con temática inclusiva e poden achegar diferentes miradas sobre a adolescencia nos Clubs de Lectura.

Agasallos de Nadal

Dámoslle a benvida  Belagua Edicións que vén de achegarnos algúns dos seus libros de Literatura infantil e xuvenil.

No Pinterest de Ciencia en galego nas bibliotecas podedes atopar Un mundo para Maruxa.

Na entrada Cociñamos na casa deste mesmo blog propoñemos a lectura d´ As receitas de Rosaura de Isabel Blanco, ilustrado por Luz Beloso.

Por unha biblioteca inclusiva: LECTURA E DISCAPACIDADE. QUE, QUEN E COMO

Parabenizamos á editorial Bululú por publicar en galego LECTURA E DISCAPACIDADE. QUE, QUEN E COMO  da autoría da bibliotecaria Susana Peix e da psicóloga Meritxell Almirall, que xa coñeciamos na súa versión orixinal en catalán.

As autoras achégannos un manual para entender a diversidade funcional, cales son as necesidades lectoras destes nenos e nenas e como se poden normalizar a través dos recursos que existen.

Resulta de interese para as bibliotecas escolares porque nos fornece de información moi útil para conformarmos unha biblioteca escolar inclusiva.

As propostas literarias que nos propoñen as autoras poden ser acrecentadas con títulos en galego.

Xeografías lectoras: Mar de mazá de Elvira Ribeiro Tobío

 

Mar de mazá é un libro de poemas redondo, comeza cun convite e remata cunha despedida, Maradeus. Con este pouso de Rosalía ou Manuel Antonio, Elvira Ribeiro proponnos unha singradura polo Mar de mazá a través de 17 poemas con arrecendo salgado que nos descobren o mar: a carabela, o mar calmo, o mar bravo, as mil cores, o marpalabras, os sete mares, a cantiga das ondas, a nena pirata, os soños, a mariñeira, a nena surfeira, os faros, as illas, os tesouros até chegar ao Maradeus.

Cun léxico moi coidado e con ilustracións evocadoras de Begoña G. Arce, este Mar de mazá ten tamén moitas referencias literarias que convidamos a descubrir.

Ler e recitar os poemas ou viaxar a través das imaxes son algunhas das propostas deste poemario, publicado en Galaxia, dirixido a todo o lectorado e que non debe faltar nas nosas bibliotecas.

Aquí podedes escoitar unha entrevista que lle fixeron á autora no programa Zig Zag da RTVG.

O sentido do abraio

Arranca o mes de novembro, o Mes da Ciencia en Galego nas Bibliotecas e facémolo cunha recomendación que convida a cultivar o sentido do abraio.

Catro Ventos Editora presenta unha cuidada e fermosísima edición da última obra da escritora e bióloga mariña Rachel Carson, pioneira do ecoloxismo: O sentido do abraio. a celebración da natureza para persoas de todas as idades

"Se eu tivese influencia sobre a fada madriña, aquela que se supón que preside o nacemento de todos os nenos, pediríalle que lle concedese a cada neno deste mundo o don do sentido do asombro tan indestructible que lle durase toda a vida (…)." (Rachel Carson)

Para a autora, cultivar a capacidade de asombro infantil é útil porque crea a base sobre a que ancorar o coñecemento que o neno vai adquirindo.

Percorre a lectura a lembranza da marabillosa natureza que nos rodea, sexa grande ou miúda, unha natureza que existe en todo momento e en calquera lugar.

A ter en conta, o rigor científico do traballo de tradución, todo un reto documental e terminolóxico xa que está a falar da natureza da costa leste de Norteamérica.

Quen dixo medo? Lecturas para o Samaín

 Chegan novidades ás bibliotecas para celebrar o Samaín.

Desde a editorial Xerais recibimos unha nova entrega de Astérix en galego: Astérix e os Normandos.Os normandos chegan a nosa coñecida aldea gala dispostos a saber que é o medo, certo é que o conseguen e, como sempre ocorre na Galia, todo acaba cunha canción.

Unha oportunidade para traballar o cómic, a historia, a xeografía e, por suposto, os medos que cada quen sinte e afronta de xeito diferente.

A editorial Bululú  presenta unha nova creación de Xan Eguía: Seres Fantásticos do Camiño. Novamente, o autor e ilustrador achégase ao mundo da mitoloxía. Intentando saír do bosque, o protagonista vai descubrindo seres fantásticos dos diferentes Camiños de Santiago, criaturas da mitoloxía popular misteriosas e divertidas.

Un convite a adentrarnos na mitoloxía galega e a traballar o Camiño desde unha perspectiva diferente.

A viaxe culinaria de Kukinhas

 

A editorial Xerais publica A viaxe culinaria de Kukinhas. A volta ao mundo en 50 receitas.de Elisa Kukinhas. Algo máis que un libro de receitas, unha viaxe polos cinco continentes e a súa gastronomía, porque como dí a autora "A nosa lingua pode falar de calquera gastronomía do mundo" non só da nosa. O libro está dividido en 5 partes e cada unha presenta 10 receitas. 

A presentación tradicional das receitas vese enriquecida polas iconas que aparecen sobre as fotografías sinalando tempos e tipo de molde, ademais ao pé de cada receita aparece unha información adicional.

Fotografías do blog da autora

Unha boa oportunidade para traballar a gastronomía nos proxectos que viaxan polo mundo adiante con receitas que convidan a ampliar informacións.

A ter en conta o artigo de Kukinhas no que nos fala de como fixo este libro.

De interese para ampliar a sección de cociña nos espazos creativos das nosas bibliotecas.

Fábulas contadas

 

Desde a editorial Xerais recibimos Fábulas contadas, de Gonzalo Navaza con ilustracións de Orelí Pello. "As fábulas, que foron incorporadas á tradición popular desde hai milenios, son pequenos relatos de intención moralizante onde personaxes animais encarnan condutas e caracteres humanos."  O autor recrea, actualiza e galeguiza unha decena de fábulas nas que se mantén, sen perder o humor, a denuncia e a crítica, poñendo en valor a vixencia destes textos para traballar co noso alumnado.

As ilustracións, que reflicten o protagonismo dos animais nestos textos, xogan co texto transformándose en metáforas visuais.

Redondea a publicación o prólogo de Antonio Reigosa, un convite a viaxar, desde as primeiras civilizacións, pola historia da fabulación. En A república das fábulas indica que "As fábulas foron e seguen sendo un instrumento divertido, axeitado e moi eficaz contra os abusos dos poderosos e para amainar, xa que non erradicar, a estupidez humana. Tomen nota e gocen das súas ensinanzas!"

Atlas da Galicia Pequeniña

Obra finalista na Gala do libro  galego
2020 na categoría de  libro mellor editado

A editorial allaricense Aira volta a sorprendernos moi agradablemente coa publicación de Atlas da Galicia Pequeniña, unha obra destinada ás crianzas, pero da que tamén gozamos, e moito, as maiores.

César Cequeliños e Jorge Campos (premio da Gala do Libro 2017 polo seu cómic Alter·Nativo) compuxeron un Atlas moi visual, cheo de vocabulario e mapas, pero a través das súas páxinas tamén podemos facer un percorrido pola xeografía humana e a historia que conforman a identidade do noso país.

Un índice ben cheo de contidos.

Toda esta información, como xa dixemos é presentada dun xeito moi visual, ameno e ata divertido.

Fonte: @bandadeseada

Fonte: Domestika.org

Polo tanto, xa temos todos os ingredientes para unha gozosa lectura compartida (en familia, na aula, coas cómplices lectoras...) ou un tempo de viaxes en solitario.

Unha obra imprescindible nas nosas bibliotecas tendo en conta, ademais, o ermo do panorama das obras dista temática na nosa lingua e para crianzas. (Tanto o Atlas temático de Galicia, de Obradoiro-Santillana, de 1999, como o Atlas básico de Galicia da ed Sálvora, de 1982, están xa descatalogados).

En definitiva, unha obra para perderse nas Xeografías Lectoras.

Bo camiño, Valentiño!

 

Bo camiño, Valentiño! é unha novidade de Ediciones Jaguar na colección Miau galego. A autora, Gracia Iglesias, e a ilustradora, Sara Sánchez, convídannos a acompañar a Valentino no seu camiño a Compostela.

A través dunha estrutura repetitiva e rimada, o pimgüín Valentiño vai facendo camiño ao tempo que os seus xenerosos amigos van aumentando a súa equipaxe."Ata que, con tantos "por se acaso", non pode dar nin un paso."

Unha publicación a ter en conta nos proxectos sobre o Camiño que tanto abundan neste curso. Unha lectura que permite, a través do xogo visual e poético, achegar aos máis pequenos a esta experiencia. Importante, tamén, pararnos nas ilustracións das gardas para poñer en valor a importancia do respecto ao medio e o patrimonio.

Na contraportada un código qr da acceso a actividades e pasatempos relacionados coa lectura.

Tempo de outono

A editorial bookolia presenta "Tempo de outono" escrito e ilustrado por Concha Pasamar.

"É doado non reparar; é doado distraerse

en mil pequenas rutinas cotiás:

o tempo é esquivo."

Estamos ante un álbum ilustrado que nos arroupa coa súa poesía e beleza. Un álbum atemporal que convida, a ritmo lento, a andar pola vida cos ollos abertos, a disfrutar dos pequenos detalles. As cores do outono acompañan, e enriquecen, un texto cargado de ritmo e poesía. 

Unha lectura para deixarse levar, unha oportunidade para reflexionar sobre a velocidade das nosas vidas e a necesidade de pararse e ver.

Un convite á creación!

 

Wolfram. Espias, nazis e maquis

 

A editorial Xerais vén de publicar a última obra de Alberto Varela Ferreiro: Wolfram. Espías, nazis e maquis.

O cómic como ferramenta informativa que achega unha parte da historia de Galicia non moi coñecida, o acontecido durante a segunda Guerra Mundial coa presenza dos nazis no noso país.

Un fermoso percorrido visual polas cidades, vilas e aldeas galegas dos anos 40 do pasado século. Unha pequena obra enriquecida cun coidado glosario, mapas e bibliografía. Unha oportunidade para crear unha constelación literaria coas obras publicadas en galego, con esta temática, nestes últimos anos.

Unha lectura que convida a explorar, investigar... seguindo o lema deste curso "Xeografías lectoras na biblioteca escolar"

Miña Guía, Meu Capitán

 

A editorial Kalandra vén de publicar "Miña Guía, Meu Capitán" unha historia de Gonzalo Moure, ilustrada por María Girón, cargada de emoción, sensibilidade e cor.

 

A capacidade transformadora e sanadora do amor entre un pai e unha filla. A superación das dificultades a través da imaxinación. Todo esto narrado e ilustrado con sensibilidade e sen dramatismo.

 

O autor achéganos á historia mesturando diálogos e reflexións persoais e a ilustradora convida a un paseo coa mirada da imaxinación e a seguir a historia a través do xogo das cores.

 

Un pequeno ser azul acompaña este paseo desde a portada...

Novidades para o inicio do curso: cómic e exploración artística

Desde a editorial Bululú chegan novidades para empezar o curso con creatividade.

Chega a segunda parte de Unha mestra en apuros con texto de Pilar Serrano Burgos

e ilustración de Jorge Campos "Ilustratecto". A nosa mestra de infantil lembra as situacións que vive día a día cun alumnado capaz de crear situacións imposibles. Un convite para que os adultos valoren o traballo do noso profesorado e para que o alumnado véxase reflectido no seu día a día. Un cómic cargado de humor e surrealismo.

Alén. A arte de explorar  é un álbum ilustrado de Liébana Goñi que invita a mergullarse nas súas páxinas e explorar as referencias á creación artística e os seus protagonistas que nelas se agochan. Un recurso para ampliar os fondos dos espazos creativos das nosas bibliotecas.

Carabela

Paula Carballeira achéganos unha pequena peza teatral cargada de contido. Carabela é a historia dunha cociñeira que naufraga na Illa Pequena de Plástico.

Unha oportunidade para concienciar sobre o uso e abuso dos plásticos e as súas consecuencias para o noso planeta. Para falar de reutilización e reciclaxe, como fai a protagonista ao construír a súa boneca.

A ter en conta para aumentar os fondos deses recunchos verdes que están agromando nas nosas bibliotecas, comprometidas cos Obxectivos de Desenvolvemeto Sustentable da Axenda 2030.

Un rico pastel

A editorial Kalandraka achega unha nova e divertida historia de Christian Voltz. Un rico pastel

narra a disparatada elaboración dun pastel que pronto deixa de selo, entrelazando o diálogo con esas estruturas acumulativas das que tanto gosta o autor. 

Unha oportunidade para achegar ao alumnado maís novo ao mundo das receitas, tanto as dos cadernos das avoas como as que podemos buscar na rede.

Un básico para os nosos espazos creativos, non só polo traballo coas receitas senón tamén pola calidade e creatividade das ilustracións ás que o autor nos ten acostumados. Un convite para aprender a crear figuras con materiais reutilizados e o collage.

A proba de auga

A proba de auga, de Anémona de Río, (Aldara Álvarez García) é a obra gañadora do I Premio de Banda Deseñada O Garaxe Hermético, convocado por Xerais e O Garaxe Hermético.

Un cómic de carácter científico e informativo, que axuda a descubrir o funcionamento do noso corpo da man da súa protagonista, unha novata pinga de auga. Os virus, as bacterias e as vacinas que axudan a combatilas abren fiestras para a investigación. 

Un básico a incluir nas nosas coleccións de banda deseñada de carácter divulgativo.

Propostas lectoras para o Día Mundial dos Océanos

En decembro de 2008 a Asemblea Xeral das Nacións Unidas resolveu que a partir de 2009, cada 8 de xuño se celebraría o Día Mundial dos Océanos. Esta conmemoración ten como propósito concienciar á opinión pública sobre as consecuencias que a actividade humana ten para os océanos e poñer en marcha un movemento mundial cidadán a favor da xestión sostible destes, xa que son unha fonte importante de alimentos e medicinas e unha parte esencial da biosfera.

​Como di Ana Pêgo, autora do libro Plasticus maritimus. Unha especie invasora, “cada hora que pasa, mil toneladas de plástico van parar aos océanos, o equivalente a un camión cheo de plástico, por minuto! Xa é tempo de facermos algunha cousa.”

Plasticus maritimus. Unha especie invasora vén de ser publicado en galego por Kalandraka. Escrito por Ana Pêgo e Isabel Minhós Martins está ilustrado por Bernardo P. Carvalho. A tradución correu a cargo de Celia Recarey. A obra acadou a mención de honra na Feira do libro de Boloña 2020 e forma parte das lecturas do Plano Nacional de Leitura de Portugal.

O libro, cun formato próximo ao caderno de campo, contén información sobre a relación entre o plástico e os océanos. Tamén conta cunha guía para preparar visitas á praia para recoller e analizar exemplares do plasticus maritimus, co fin de alertar sobre as consecuencias do plástico na vida do planeta e a necesidade de erradicar o seu uso para preservar o ecosistema mariño.

Se os peores prognósticos se cumprisen, en 2050 o peso do plástico nos océanos superaría o dos propios peixes, por iso na novela de Rosa Aneiros Xelís, o guieiro das botellas de mar  o protagonista, xunto co mascato Mult, Ilva e o avó Jonás, emprende a afanosa tarefa de atrapar a illa de plástico para evitar a desfeita ecolóxica do planeta.

Con ilustracións de Andrés Meixide, a obra de Rosa Aneiros acadou en 2019 o Premio Merlín de Literatura Infantil e entrou na Lista de Honra da OEPLI.

Destinadas a un lectorado autónomo e imprescindibles nas nosas bibliotecas escolares para coñecermos  e traballarmos os Obxectivos de Desenvolvemento Sustentable 2030 , en ambas as dúas obras hai unha chamada ao coidado da vida submarina e a acción polo clima.

O Chispas, un músico cósmico

A colección Sopa de Libros, de Edicións Xerais, engade un novo título para lectores expertos, un tramo do lectorado novo que cómpre atender con xeito nas bibliotecas escolares e desde a mediación. O CHISPAS é o último título do escritor Manuel Rivas para xente nova e, abofé que xoga con elementos que poden espertar o interese da rapazada: a música, un ser singular, o poder das palabras, as modas, os mundos paralelos, os robots, o amor... Atraínte ese protagonista que pode levar tras de si ás lectoras e aos lectores, cabalgando na súa Montesa, coa guitarra ao lombo (atractivo personaxe para os varóns, ese grupo de risco lector). Pero a historia é moito máis, pois O Chispas garda algúns segredos, entre eles a da Fonte da Fala, de Estrelampo, a aldea na que naceu, ou o porqué do seu tic espectacular. As ilustracións son de Sonia García, quen ten traballado, entre outros ámbitos, en ilustración científica.

Non está sobrada a LIX galega de textos que conectan coa ciencia ficción pero O Chispas pode ser unha invitación adentrarse no xénero, en contextos de clubs de lectura ou, simplemente na busca individual do lector e da lectora. 

Lecturas para o verán: Vampira de biblioteca de Ledicia Costas

Vampira de biblioteca é o último libro que vén de publicar a escritora Ledicia Costas con ilustracións de Víctor Rivas na colección Merlín de Xerais.

A novela conta a historia de Eleonora, unha vampira un tanto peculiar que vive nunha biblioteca especial como a Biblioteca Joanina da Universidade de Coímbra. Como os morcegos que habitan na biblioteca portuguesa, Eleonora ten que eliminar a todo becho que ameace a conservación dos libros. Acompañada de Xa e Mon, os seus morcegos de confianza e coa complicidade dunha bibliotecaria, un avó e os seus netos, terá que enfrontarse aos insectos bibliófagos para preservar os libros desta importante biblioteca.

Proposta moi acaída para as recomendacións lectoras do verán e destinada a partir dun lectorado autónomo, con Vampira de biblioteca tense asegurada unha lectura divertida, con nomes, personaxes e diálogos moi ocorrentes amais dunha defensa das bibliotecas, dos libros, da lectura e da literatura.

Libros galegos na Lista de Honra 2019 da OEPLI

A OEPLI (Organización Española para o Libro Infantil e Xuvenil) xunto coas súas seccións territoriais: Consejo General de libro (castelán), ClijCat (catalán), Galtzagorri (euskera) e Gálix (galego), e en colaboración co Ministerio de Cultura y Deporte, elaboran todos os anos un catálogo de literatura infantil e xuvenil que contén unha  selección bibliográfica de 200 títulos infantís e xuvenís publicados nese período, obedecendo a criterios de calidade e idoneidade para os tramos de idade en que a miúdo se clasifican as coleccións e que os fai merecedores de formar parte desa lista de honra por consideralos significativos dentro da gran produción existente.

Forman parte desta selección de 2019 os seguintes títulos en galego:

0-6 anos
O país do gran furado. Xerardo Quintiá . Baía Edicións
O veleiro verde. María Fumaça. Editorial Galaxia
Ola! Son un bicho bóla! Elvira Ribeiro. Apiario
Ratos de viaxe. Oli. Kalandraka

A partir de 6 anos
A que cheiran as cores?A esperada guía para coñecer o cerebro. Juan Casto Rivadulla. Editorial Galaxia
Os nosos bosques. Diego García et alii. Miudiño S. Coop. Galega
A pequena compaña. Carlos Labraña. Edicións Embora
Bicos e non balas. Antonio García Teijeiro. Editorial Galaxia

A partir de 9 anos
Lúa en ningures . Beatriz Maceda Abeleira. Xerais
Noé e gato fan teatro. Gloria Sánchez. Oqueleo
Pioneiras 2.Galegas que abriron camiño. Anaír Rodríguez. Xerais
Somos os monstros. Paula Carballeira. Xerais

A partir de 12 anos
Conta nove estrelas .Andrea Maceiras. Xerais
Xelís, o guieiro das botellas do mar. Rosa Aneiros. Xerais

Xuvenil
Be water. Antía Yáñez. Cuarto de inverno
Memoria do silencio. Eva Mejuto. Xerais
O grupo. An Alfaya. Xerais
O home que mercou un libro. Paco Martín. Editorial Galaxia
Os corpos invisibles. Emma Pedreira. Xerais
Parece unha formiga. Pablo Otero. Kalandraka
Penumbra. Daniel Landesa. Xerais

Tamén hai libros que se poden ler no orixinal ou na tradución ao galego, aínda que fosen seleccionados noutra lingua:

0-6 anos
Distinta. Beto Valencia. Kalandraka
O pirata valente. Ricardo Alcántara. Kalandraka
Animais. Antonio Rubio. Kalandraka

A partir de 6 anos
Bechopoemas e outras bestas. Leire Bilbao. Kalandraka
O home que contaba estrelas . Arturo Abad. OQO
Versos e viceversos . Antonio García Teijeiro e Juan Carlos Martín Ramos. Kalandraka

Xuvenil
Iridium . Francisco Castro. Editorial Galaxia
Medo. Care Santos. Edebé

Neste ENLACE pódense consultar todos os libros seleccionados no ano 2019.

Galicia contada aos non galeguistas

Edicións Xerais de Galicia presenta entre as súas novidades desta primavera estraña, un libro ben curioso, pois polo contido e pola súa edición sáese do común e consegue sorprender, sempre que á súa lectura se entre con mirada aberta, procurando atar ben os prexuizos. Pois ben, o xornalista Manuel Veiga Taboada pon nas mans do lector experto e adulto este Galicia contada aos non galeguistas a modo de pequeno manual para desfacer estereotipos (algúns, que quedan outros tantos ou máis) sobre o que vén sendo iso de ser galegos, que vén sendo iso de Galicia e por que pasa o que pasa. 

A través de pequenos capítulos, o autor convídanos a unha viaxe por esa "paisaxe tatuada" que constitúe Galicia, avísanos de que "observar os camiños" levaranos a coñecer o país, que algunha das claves está en saber quen son e quen foron "os donos da terra"; explícanos por que Galicia é unha "fábrica de ministros" ou que "a ambigüidade da escaleira ten explicación", entre outras. Manuel Veiga rende contas das fontes históricas que nutren a súa versión desta Galicia que cómpre recoñecer, o que motiva a buscar novas lecturas e exploracións históricas.

A edición dun tamaño ergonómico garda tamén a sorpresa das ilustracións de autoría de Jano (Alejandro Viñuela Agra).

Desde a óptica das bibliotecas escolares este libro pode motivar debates interesantes en reunións de clubs de lectura de alumnos dos últimos niveis do ensino ou de grupos de adultos, o mesmo que algúns dos seus capítulos poden dar entrada a outras lecturas máis específicas da historia de Galicia; por todo isto é un material a valorar para a súa inclusión na colección das bibliotecas de ensino secundario.

Novidades editoriais sobre Ricardo Carvalho Calero

Moitas son as novidades editoriais en torno á vida, obra e pensamento do polifacético autor homenaxeado nas Letras Galegas 2020, Ricardo Carvalho Calero.

Para primeiros lectores e lectoras

Ricardo Carvalho Calero.

Polo Correo do Vento. Lela Edicións, 2020

Os autores desta banda deseñada toman os personaxes da novela Scórpio, Scórpio e Cleo, que funcionan como fío condutor da súa biografía.

Os debuxos son de Miguel Pérez Ramudo.

 

Para lectores/as  autónomos/as

Ricardo Carvalho Calero. A pegada do compromiso

Héctor Cajaraville. Xerais, 2020.

O libro inclúe un percorrido pola biografía e a obra do autor. Engade sete pequenas pezas teatrais sobre momentos concretos da vida de Carvalho Calero.

  

 

Carvalho Calero, fronte ao espello da memoria.

Alberto Ramos. Auga editora, 2020.

Con ilustracións de Antonio Seijas, nesta biografía o autor fai un percorrido pola xeira vital e intelectual de Carvalho Calero.

 

Para lectorado experto, xuvenil e adulto 

 

De Carballo Calero a Carvalho Calero. Biografía, escolma de textos,guías de lectura, actividades e xogos. 

Charo Baleirón Sóñora,Marta Domínguez Tenreiro e Belén Rodríguez Suárez. Hercules Ediciones, 2020.

O libro conta cunha breve biografía e unha cronobiografía, unha escolma de textos acompañada dunha guía de lectura, un “Paso a palabra” e o xogo-escapada “A caixa de Don Ricardo”, que propón un percorrido por Ferrol.

    

Carvalho Calero, vida e obra dun ser polifacético

Henrique Dacosta. Xerais, 2020.

Libro divulgativo sobre a vida e a obra do autor das Letras Galegas 2020. 

  

 

Conversas con Ricardo Carballo Calero

CarmenBlanco. Galaxia, 2020

Entrevista feita entre os anos 1983 e 1984. Abórdanse nela algúns temas esenciais, como a biografía, a política, a formación intelectual, a crítica literaria, a lingüística, a poesía, a narrativa e o teatro. 

 

 

Ricardo Carvalho Calero. O anxo da terra.

HenriqueRabuñal. Galaxia, 2020.

Neste libro diferentes narradores iluminan o conxunto da obra literaria, lingüística ou filolóxica de Carvalho Calero e as sucesivas etapas biográficas.

Antoloxías poéticas

 

Beleza,Verdade.

Ricardo Carvalho Calero. Escolma poética e limiar de Pilar Pallarés. Chan da Pólvora, 2020.

 

Antologia da poesia em galego

Ricardo Carvalho Calero. Selección de Paulo Fdez Mirás e prólogo de Carmen Blanco. Através Editora, 2019.