ÁLBUM PREMIADO

La noche del Marramiau de Xan López Domínguez publicado por Edelvives acadou o Premio CCEI de Ilustración 2012.

O ilustrador galego é, neste caso, tamén autor, como sucedera con Voces na lagoa do espantallo, Baile de colores, La gallina churra, El Rally de los locos, Gago por merenda, O xigante e a lúa (con Gloria Sánchez), A princesa e o dragón, Antoloxía da poesía galega para nenos, Teodomiro soña con dragóns, Mis historias perdidas...

Que pasa cun gato que pode converterse en rato e de novo en gato ... e de novo en rato? Unha vida difícil, sen dúbida ¡e moito que aprender!

DE NENAS E DE LIBROS

Esta é a páxina que dentro de Álbum de mulleres (Consello da Cultura Galega) recolle unha serie de artigos e recursos para poñer en relación muller e literatura infantil. 

Artigos de Agustín Fernández Paz, Marilar Aleixandre, María Reymóndez  ou Montse Penas. Monográficos das revistas Andaina ou Festa da palabra silenciada. Ligazóns a páxinas de interese no tratamento do tema.

Unha páxina a ter en conta, aínda cando non estea actualizada ou algún dos enlaces non funcione, porque moito do que aí se di segue vixente e pendente de logro.

A favor das nenas e dos nenos non estereotipados!

Premio para FANTASMAS DE LUZ

Fantasmas de luz de Agustín Fernández Paz, foi Premio de Creación Literaria dos Premio da Crítica 2012.

Así se nos conta na sección de actualidade da AGE (Asociación Galega de Editores):

"O xurado desta modalidade acordou outorgar por unanimidade o premio a Fantasmas de luz de Agustín Fernández Paz publicado por Edicións Xerais de Galicia. O xurado apuntou como razóns para premiar esta obra "a súa capacidade de enfiar cine e literatura na arquitectura da novela, unha das marcas poéticas do autor; o tratar problemas da sociedade de hoxe que levan á invisibilidade dos excluídos, aínda que a historia se sitúe nunha etapa anterior á crise; o facelo con humor, fina ironía e unha ollada atenta aos problemas profundos da nosa sociedade; e, por último, pola súa mensaxe final que, malia as denuncias, está cargada de optimismo e esperanza nun futuro mellor."

Esta obra tamén acadou o Premio AELG ao Mellor Libro Infantil e Xuvenil, 2012

As ilustracións de Miguelanxo Prado complementan de maneira inmellorable unha obra editada con todo o detalle ao alcance. Prado podería considerarse o ilustrador de cabeceira dos libros de Fernández Paz. Unha parella a ter moi en conta!

CONTOS NA REDE

Galaxia acaba de abrir unha páxina (GalaxiaTales) de contos interactivos  que se poden adquirir e ler dende calquera dispositivo. Son contos en galego español e inglés, que conteñen animación, música e locución. de cada un deles pódese ver previamente ao redor dun 20 por cento do seu contido. O proxecto arranca con Unha sorpresa para Goruk de Daniel Landesa con ilustración de María Longa e Así comezaron as aventuras da Rosa dos Ventos e Xan Pericán de Joel Franz Rosell con ilustración de Luis Castro Enjamio.

Así nolo contan na presentación editorial.

Podemos entrar e ver.

COMER... COMER DE PREMIO

"Os prestixiosos premios Gourmand Beste in the world veñen de galardoar Os cogomelos na cociña e outras cousas, editada por Baía Edicións, na categoría "Best Single Subject Cookbook", sendo a gañadora de España en galego. Tamén foi recoñecida a obra da mesma editorial Sopas frías e quentes, na categoría "Best Translation Cookbook", sendo a gañadora de España en galego.

Asemade, o libro de Ideaspropias Editorial, Inglés profesional para servicios de restauración, foi o gañador dos prestixiosos premios Gourmand World Cookbook en España na categoría de Mellor Libro para Profesionais da Alimentación. O título optará, o próximo 23 de febreiro de 2013 no evento Gourmand Best in the World que se celebrará en París, ao Premio ao Mellor Libro do Mundo.

Os gañadores de cada país compiten contra os gañadores na mesma categoría doutros países polo "Best in the World". Os resultados anunciaranse o sábado 23 de febreiro de 2013 no teatro Le Carrousel du Louvre de Paris. Todos os detalles do evento da Paris Cookbook Fair do 22 ao 24 de febreiro 2013 estarán disponibles na páxina web www.cookbookfair.com."

Así se nos conta na páxina da Asociación Galega de Editores

Sabíamos que a gastronomía era unha das razóns polas que o turismo che achegaba a Galicia, pero fomos un pouco máis alá, son os nosos libros os que tamén resultan coñecidos en todo o mundo. A por eses premios e moitos máis! 

POESÍA E FOTOGRAFÍA

Xardín de inverno, o novo libro de Ledicia Costas, é unha boa mostra de fotografía poética ou poesía fotográfica. Nel danse a man Ledicia e DNL, o mesmo que ilustrara Páxinas de carricanta ou Mans, sempre con fotografías.
Xardín de inverno é o que temos en Galicia. Xardíns de camelios que florecen nesta epoca, de camelias que estran os chans das hortas e parques. Este é o meu xardín, di unha muller que ben o merece, cando pasa por un dos parques da cidade. "Xardín de inverno" ten algo de tristeza escrita nos xenes, de muller que expresa os seus silenzos, de aí que non nos sorprendan poemas como este:

"fálanme ao oído e son máis de unha:
a conciencia da miña nai,
a voz da miña avoa
(hoxe soñei que estaba viva
pero aparecía con cara de morta),
as palabras desgarradas das que me escoitan

a moitas outras non as coñezo de nada,
pero sei que teñen 14 cordas vocais

       todas elas recítanme versos de lobishomes
                                                      e de mundo

      tantas voces levo ao lombo
(mulleres de palabra viva
mulleres de carne)
que ás veces nácenme antenas no corazón

escóitoas en estéreo
teñen o costume de falarme á vez,
unhas sobre outras

      son surtidores de verdades"
        

                                               

TITOÁN. BANDA DESEÑADA CON PREMIO

Titoán recibiu o premio Castelao de banda deseñada 2011.

Certamente trátase dunha boa entrega, que nos achega a figura de Castelao e a súa obra dunha maneira clara e interesante. Non podería dicir o mesmo do segunda entrega, Castelao. O pobre tolo, que resulta escura e confusa -ao meu entender- ata o punto de considerar que se trata dunha oportunidade perdida, que se debería remediar se o obxectivo é continuar a colección dedicada ao artista e político galego. Como o tempo non pasa en balde, como os coñecementos que temos sobre estas figuras do noso pasado non son tantas nin de tanta calidade... faise necesario que as referencias sexan claras e as actitudes reflexionadas (dentro do posible).

NOVAS EDITORAS (E NON TAN NOVAS)

Cada vez que unha nova editora se atreve a sacar a cabeza alegrámonos, é unha nova posibilidade, e confiamos en que non nos defraude.

Así, recibimos a Patasdepeixe hai un tempo, e lemos os seus libros (O incrible neno devorador de libros, O gran libros dos medos de rato pequeno, Perdido?, A vaca que puxo un ovo...) con gusto. Agora, preséntase Bululú da man de títulos como O Crebanoces, As estrambóticas viaxes de Gulliver, ... tamén temos noticia de Quequeres Edicións. aínda que non fumos quen de atopar ningún dos seus libros ata a data.

EXPOSICIÓNS desde BDBanda

BDBanda acaba de presentar dúas novas exposicións didácticas dirixidas a centros de ensino. Unha delas,  As bases da banda, unha reedición dunha exposición anterior que, neste caso, se presenta coa escola de cómic O Garaxe Hermético, dentro das súas propostas de accións formativas. Un folleto informativo recollido da páxina de Bdbanda dá idea do que imos atopar.  

A segunda, Cantigas de Santa María. Arte BDieval, xira en torno a esta obra medieval como narración gráfica. Está elaborado xunto coa Associaçon Galega da Língua, que se encargará da distribución.Un folleto acompaña a presentación na páxina xa citada.

Cada vez máis, as exposicións están a demostrar a súa potencialidade á hora de visibilizar determinados xéneros e aprendizaxes. De aí que nunca veña mal o seu coñecemento. A este respecto, tamén debemos lembrar outras que teñen en marcha a Secretaría Xeral de Cultura (As orixes do cómic en Galicia...) e El Patito Editorial 

DÍA DA LIBRARÍA - CALENDARIO DO LIBRO E DA LECTURA

30 DE NOVEMBRO DÍA DA LIBRARÍA.

Un tempo para pasar por esa tenda que sempre nos debe acoller no barrio, para mirar novidades e clásicos, para poñerse ao día das actividades que organizan, para escoller o que queremos levar á casa ou á biblioteca escolar na que traballamos.

Un calendario para ter presente todas as datas relacionadas co libro e a lectura, para lembrar que autores andan cumprindo anos, para non esquecer os días D (aqueles no que desembarcan os xéneros e aspectos minorizados). Libros, sempre libros, saíndonos ao paso. Lecturas para todos os días e para cada ocasión. 

Lecturas e libros, acompañándonos nos camiños da vida. 
Parabéns á Secretaría Xeral de Cultura por este novo cartaz no que aparecen reflectidas as datas a celebrar.

NOVA FANTASÍA. Segundas partes

Da man da biblioteca do CEIP Os Casais, facémonos eco desta nova achega.

Lembramos a aparición da primeira entrega da seria arredor do mundo secreto do profesor Basilius Hoffman, O ladrón de soños. Agora, fai a súa entrada a segunda parte baixo o título Un faro na escuridade. Fantasía que sae do forno peza a peza, a demanda, para cubrir esa necesidade de soños. Urco é a editora que lle dou saída a esta aposta, dentro da súa colección Alcaian. 

Da presentación editorial recollemos:

"A serie do mundo secreto de Basilius Hoffman comprende un ambicioso proxecto de fantasía que abrangue vários medios artísticos, centrados todos eles arredor dunha serie de cinco novelas escritas por Fernando M. Cimadevila e ilustradas por Iván Valladares coas que nos mergullamos nun mundo estraño e complexo, un universo onde o profesor Hoffman: arqueólogo, historiador, lingüista e, sobre todo, explorador de mundos ocultos, serve de guía ao seu novo sobriño Peter nunha viaxe na que as lendas e os mitos de moi diferentes culturas do noso propio mundo conflúen cara a unha única e asombrosa revelación que marcará o destino da humanidade."

PREMIOS E PREMIADOS

No marco da xornada estatal de ciencia ficción (XXX Hispacon) foi entregado o  premio Ignotus de banda deseñada a  David Rubín. pola obra El héroe. Este premio é outorgado por Pórtico, a Asociación española de Fantasía, Ciencia Ficción e Terror á mellor obra de cómic no 2012. 

Un novo premio para os nosos creadores

De culturagalega.org recollemos a seguinte nova:

"A obra Leviatán valeulle ao galego Ramón Trigo o Premio Lazarillo de Álbum Ilustrado. O galardón, convocado pola Organización Española do Libro Infantil e Xuvenil, está dotado con 7.000 euros e considérase un dos máis importantes no seu campo a nivel estatal. O premio destaca a orixinalidade da proposta pictórica do autor e a capacidade de crear unha historia anovadora con referencias clásicas."

Trigo xa tiña acadado varios premios entre os que destacamos o Ciudad de Alicante (co álbum Casa vacía, publicado en Anaya e o premio Internacional Álbum Ilustrado Biblioteca Insular Cabildo de Gran Canaria 2007 con A casa da fin do mundo.

LECTURAS EN ABERTO

Na páxina da Biblioteca Virtual Galega podemos atopar unha entrada a unha listaxe de obras de literatura infantil e xuvenil ás que podemos acceder directamente. Ben é certo que nalgún dos casos se trata de textos de autores de LIX, máis que de literatura destinada á infancia ou mocidade, pero nunca virá mal dar un paseo por ese itinerario posible.

Agradecemos a xenerosidade e o papel sempre facilitador desta biblioteca á que acudimos unha e outra vez.

Para catar... aquí tedes un poema de Xoán Babarro:
"Eu brandín a lanza de don Quixote
e levei o escudo de don Lanzarote.
Eu percorrín Francia, África e Constantinopla co Tirant,
estudei a máxica palabra de Chilam Balam,
vin no Camiño das Estrelas florece-la lanza de Roldán,
loitei no bando de Sandokán
e colgueime nunha liana con Tarzán.
Atravesei Suecia voando,
pasei mil e unha noites con Xerezade contando,
entrei na illa dos demos con Rama loitando
e na de Robinson Crusoe, buscando... e buscando...
Sufrín prisión con Ollantai
e cantei na China con Li Ioucai.
Fíxenme amigo de Huckleberry Finn,
co último mohicano convivín,
collín no colo o can de Tintín
e con Gulliver en ananiño me convertín.
A beberaxe de Panorámix tomei,
polo espello de Alicia pasei
e en Tutira carneiros maorís criei.
Dei con Phileas Fogg a volta ó mundo
e coñecín o vello contador vagabundo."

Nova recomendación

Novamente, desde o CEIP Os Casais, se nos recomenda o seguinte libro O rastro que deixamos de Agustín Fernández Paz, apoiándose na páxina de lanzamento. De aí recollemos a descrición que segue:

O libro "(...) mostra dúas liñas de traballo esenciais (na súa obra), a memoria da infancia e o oficio da escrita. Na primeira parte, baixo a epígrafe «As paisaxes da memoria», reúnense escritos onde predominan as vivencias da nenez e da mocidade, naqueles anos en que asistiu á creación do mundo na súa Vilalba natal. Os textos da segunda, titulada «O oficio de escribir», fálannos da súa paixón pola lectura e pola escrita, así como da súa fe na forza das palabras para cambiar o mundo e cambiar a vida."

Presentación mundial dunha obra de Miguelanxo Prado na Coruña

Da man do CEIP Os Casais chéganos unha boa nova. Fala o autor de Ardalén:

“Tardei moito en poder ver unha obra miña en galego. E agora, ver que esta se edita ao tempo, e que sae mesmo antes que as versión internacionais, e que a presentación mundial se fai na Coruña, é unha satisfacción. É como unha cadea que se fecha, e non foi sen tempo”, sinala Prado, que en diferentes ocasións, ao longo de anos, amosara o seu descontento por non poder ter a súa obra publicada na súa lingua orixinal. El Patito Editorial corre coa versión en galego dun volume que edita Norma en castelán e que está xa dispoñible nas librarías de todo o país.

Ardalén supón ademais o debut do autor no formato de novela gráfica, abandonando o habitual álbum europeo. “Hai anos que tiña as liñas básicas da historia, e posiblemente o feito de que se estivese cocendo tan a lume lento foi en parte por esa cuestión. A narración esixía un espazo para desenvolver e non funcionaba nun álbum nin sequera de 64 ou 80 páxinas. A previsión inicial era de 180 e acabei facendo 256. Vin que era a historia idónea para facer cousas a nivel de elementos narrativos, que xa levaba tempo querendo tentar”.

LIBROS SOLIDARIOS

As que rubimos montañas é un libro solidario, promovido por Implicadas/os no desenvolvemento, e no que se recollen poemas de autoras etíopes (Yemoddish Bekele; Mihret Kebede; Tigist Mitiku; Misrak Tefere; Azeb Yosef; Abebech Diriba) e galegas (María Reimóndez; Antía Otero; Lucía Aldao; Estíbaliz Espinosa; Marga do Val; María Lado; María do Cebreiro).

Tod@s as persoas creadoras, que elaboran o libro, participaron de xeito totalmente desinteresado, de forma que as ganancias do produto irán directmaente a proxectos de cooperación. Para máis información pódese escribir a info@implicadas.com.

GATIÑOS DE SERIE

Gatiño e o balón, Gatiño e a neve... Títulos que van aparecendo nunha nova serie da editorial Kalandraka, dirixida aos máis pequenos. Texto mínimos e sinxelos acompañados de ilustracións limpas con liñas suaves e cores intensas, un verdadeiro gusto!

Dúas historias mínimas nas que os valores se presentan sen aditamento, porque veñen ao caso; no primeiro deles ese balón será a ocasión de descubrir a necesidade de compartir, tamén para ser feliz; no segundo, gatiño negro e coelliña branca darannos ocasión para relativizar a cor propia (branca e negra) en base á de fondo (neve e carbón).

Ao texto Joel Franz Rosell e ás ilustracións Constanze V. Kitzing.

ESCRITA A CATRO MANS

O neno can, un título sorprendente: afea dicilo… como que neno can? A quen se lle ocorre?

Pois si, un título ben posto. Un libro dedicado “a todos os nenos e nenas de calquera recuncho do mundo. E a ti, claro...”. Unha obra escrita por Fina Casalderrey e Francisco Castro e publicada pola editorial Galaxia. “A favor de UNICEF”, á que a editora lle doará parte dos beneficios das vendas.

Adaptacións de artigos da Convención dos Dereitos da Infancia abren cada conto. Un monllo de contos protagonizados por rapaces e rapazas de diferentes lugares do planeta que ven vulnerados os seus dereitos.

(...)

"Ela, fascinada co enredo, continúa a arrincar cachos do bocadillo e a guindarllos polo aire. Aakesh captúraos ao voo cunha habilidade asombrosa.

As gargalladas da nena alertan os seus amigos, que se achegan para presenciar o espectáculo.

- Anda, un neno can!

(...)

- Como te chamas? -pregunta á fin.

- Aakesh. E ti?

- Lanka -responde- Cantos anos tes, Aakesh?

- Dez, creo que dez... -dubida el.

- Dez! pero se es máis baixo ca min e veño de facer hoxe nove! Será porque es un neno can?

- Só son un neno. O meu can é este -responde Aakesh mentres lle pasa a man polo lombo a Choiva.

- E quen che ensinou a coller a comida polo aire?

- A fame, creo..."

Pódese dicir doutra maneira pero nunca tan claro e contundente.

Un libro necesario neste momento, no que moita rapazada está no albor da pobreza. Un neno que ten por amigo a un can e pode coller a comida coma el, ao voo, porque a fame é "neghra".

Cinco relatos de calidade escritos coa solidariedade por bandeira e a sensibilidade por himno. Fina e Fran unidos nun bo proxecto que seguramente teña continuidade. Agora tócanos lelo e mirar de ilustracións de Patricia Castelao.

A modo de diccionarios

Tres libros, tres. O terceiro deles acaba de saír e merece a pena ler, igual que os dous anteriores. Pode que sexa literatura para adultos á que a mocidade lle resulte difícil acceder totalmente, pero o que non se pode negar é que unha liña de traballo moi interesante para traballar a escrita creativa.

Da man de Manuel Veiga, chéganos esta novidade... 

Do G ao Z. Diccionario indignado e humorístico. "O diccionario máis completo para os momentos máis apurados" esa é a súa frase de enganche, e non lle falta razón. Unha entrada, na que se incorporan as bibliotecas escolares e que queremos traer a esta páxina (aínda que non sex apara nada das máis logradas "Títulos. Certa experiencia nas bibliotecas esoclares indica que moitos nenos pobres lían, nos anos sesenta, Un mundo feliz de Huxley; algunhas nenas intentaban facer o mesmo con Casa de bonecas de Ibsen. Un dos títulos que máis leva a engano é O bo soldado de Ford Madox Ford, posto polo editor, durante a Primeira Guerra Mundial. pensando que animaría as vendas. Na obra non aparece ningún soldado e, lonxe dunha intención moralista, o que ofrece é unha relación de parella, rica, contraditoria e nada convencional." 

Este libro dános a ocasión de citar outros dous, indispensables. Elucidario de Gonzalo Navaza e Abelcebú de Carlos Negro. Un bo momento para dar unha volta por estes interesantes diccionarios.  

Benvido ao mundo dos premios

Si, queremos darlle a benvida a ese lugar de honor a Bandada que acaba de saír á luz, despois de conseguir o V Premio Internacional Compostela de álbum ilustrado. Esta obra de María Julia Díaz Garrido e David Daniel Álvarez Fernández é dunha calidade sobresaínte, tanto na creación como na edición, no contido e no continente. Unha fábula, da que se nos di na presentación editorial "que propón unha profunda reflexión sobre a historia da humanidade: o desenvolvemento dunha sociedade que inicialmente busca o coñecemento, o progreso técnico e científico, o benestar e un bo porvir, pero que neste tránsito perverte os seus principios xerando violencia e dominación dos fortes sobre os débiles".

Bandada é un produto inesperado, que nos lembra outros tempos nos que a literatura era máis comprometida. O resultado da obra, en branco e negro e gran formato, fai que abramos as mans, igual que a mente ao que sempre estivo aí, nos libros e na realidade, a necesidade de pensar sobre o que facemos e o que sucede. Imos lendo eses textos mínimos e escollidos con verdadeira pracer, imos admirando as imaxes que nos remiten ao debuxo primordial e intelixente, imos seguindo a trama e semella que todo vai a peor... pero aínda nos peores momentos, a esperanza aparece e sempre hai un grupiño no que se garda o tesouro dun futuro distinto e mellor. 

A FAVOR DAS NENAS

Nese empeño de Kalandraka por recuperar textos que xa se consideran clásicos na literatura infantil e traelos á nosa lingua, aparece agora Rosa caramelo o célebre libro con texto de Adela Turín e ilustracións de Nella Bosnia.

Esta obra que xunto con Artur e Clementina forman parte da colección, que no seu día publicara Lumen co nome, “A favor de las niñas”, consituiuse nunha literatura pioneira no empeño por facer visible a muller (nena ou adulta) que asume roles diferentes aos establecidos naquel momento, propoñendo modelos diferentes. Algo que continúa a ser necesario, a pesar dos anos transcorridos... por iso seguimos recoñecendo o traballo desta editora.

ANTOLOXÍAS

Miña casiña, meu lar. Rosalía de Castro. Colección Ardentía de Tambre.

O libro está composto dunha breve introdución biobibliográfica seguida dunha escolma de medio cento de textos aproximadamente, clasificados en apartados temáticos aos que anteceden unhas sucintas liñas explicativas. Os textos van acompañados de colaxes que achegan unha nova lectura dos poemas.

Neste caso, a antoloxía e introdución corre a cargo de Elsa Baluja. As ilustracións son de  Jacobo Muñiz, nun estilo que lembra a Elena Odriozola.

NOVIDADE

CARTAS DE INVERNO, esa novela de Agustín Fernández Paz que é record no número de edicións, acaba de ser pasada a banda deseñada.

O autor, fala así desta nova versión:

“Este Cartas de inverno de Antonio Seijas recolle a historia, os personaxes e os ambientes que creei no seu día, comezando pola omnipresente mansión onde todo sucede. Trátase da mesma historia, narrada a través da linguaxe do cómic e a través doutra mirada. A capacidade de suxerir que teñen as palabras trasládase aquí ás elipses narrativas. A tensión creada coas palabras trasládase ás imaxes e á montaxe das viñetas. Os estados de ánimo atopan a súa correspondencia na paleta de cores utilizada polo autor. Todas as pezas encaixan para conformaren unha obra con valor de seu. De aí que declare a miña alegría ante a publicación destas novas Cartas de inverno.”

PREMIO NACIONAL DE LITERATURA INFANTIL E XUVENIL

Laura Gallego, acaba de ser premiada pola novela Donde los árboles cantan. Unha novela épica que se sitúa dentro do xénero fantástico, como a meirande parte da súa produción.

Lembramos que esta autora comezou a súa carreira con obras como Finis Mundi ou La leyenda del rey errante, conta coa saga Memorias de Idhún e unha trintena de títulos máis. Unha das creadoras con máis éxito no momento actual. Esta obra xa foi número un de ventas. 

... POR ENTREGAS

A punta de pistola, é o  relato ganador do Premio de Novela por Entregas de La Voz de Galicia. Unha historia contada en 31 episodios que agora se publica da man de Edicións Xerais de Galicia., na colección xuvenil "Fóra de xogo".

O seu autor, Fran Alonso, conta cunha boa traxectoria dentro da literatura infantil e xuvenil con obras como Cidades, O brillo dos elefantes, A casa da duna, O brillo dos elefantes, Cartas de amor, Poetízate. Antoloxía da poesía galega, A vida secreta de María Mariño, A araña e máis eu, Folerpas de Novoneyra e O meu gato é un poeta.

"A punta de pistola ábrese cunha escena de ritmo trepidante: un delincuente de pouca monta, coñecido como O Varas, e a súa muller, Rica, acoden a un punto de encontro familiar para ver aos seus fillos, baixo tutela dos servizos sociais. Pero unha vez alí os secuestran e os levan a punta de pistola. Así comeza unha frenética fuxida por Vigo e a súa contorna, narrada con axilidade e un pulso que recolle o ritmo das mellores persecucións cinematográficas", así nolo contaba o xornal o día que facía público o premio.

Paralela a esta historia, que podería ser de sempre, unha historia de actualidade, a dunha camioneira doctorada, dona da empresa e que neste momento recibe a proposta dunha universidade americana para traballar un tempo; as súas dúbidas e a volta unha e outra vez á historia de Celia Rivas (unha muller de Fisterra que en 1932 se converteu na primeira muller camioneira de España) corren parellas á fuxida deses pais e fillos pechados nun coche roubado.

ACHEGÁNDOSE AO SAMAÍN

O Centro Galego de Arte Contemporánea (CGAC) programa para a véspera do samaín un obradoiro co artista Jack Mircala. Nesta actividade, sen custo, que se realizará o 31 de outubro, poderán inscribirse un total de 20 nenos e nenas de 7 a 12 anos. Poderán facelo ou ben por teléfono ou enviando un correo a cgac.educacion@xunta.es

Posteriormente terá lugar a presentación do libro Baixada a esquela.

Lembremos que este artista é un dos ilustradores máis orixinais do panorama actual, realizando un traballo de construción con papel en tres dimensións que posteriormente se fotografa, sempre dentro dun imaxinario propio, que bebe do universo gótico e romántico.

Con El acertijo de Valpul conseguiu o Premio Lazarillo de Ilustración. Tamén é moi coñecida a súa colección de contos O baúl das sombras.

Nesta páxina tamén podedes acceder a algunhas imaxes da exposición Compostela Iconográfica que se pode visitar no palacio de Xelmírez.

NOVA COLECCIÓN. Banda deseñada para a infancia

A banda deseñada, Marcopola, a illa remeira, xa fora editada en castelán, catalán ou francés por Bang! Edicións e ve agora a luz na nosa lingua da man de Xerais. Segundo adianta a editora, este é o primeiro número da nova colección Merlín Cómics, centrada nos lectores máis novos que comeza con As orixes de Marcopola e continuará co título Marcopola e os piratas da Lúa, do mesmo autor, Jacobo Fernández Serrano.

Unha illa que quere moverse e que o logrará, coa axuda de quen?
Cal é papel das bolboretas?

Cales son os amigos da illa?

Que lle pasa?

Estas e moitas máis preguntas terán a súa resposta neste volume.

O facer de Jacobo, o seu humor surreal... que aparece claro no título do segundo capítulo “O día de mañá” desta entrega, ou no nome que lle pon Libro “Illa sen nome”. A imaxinación desbordante dun creador que non lle pon límites á fantasía ... e que nos trae lembranzas de Cunqueiro, como sempre que a imaxinación reina.

OUTROS SOPORTES (III)

MARÍA FUMACA!!! … cantar e bailar para ser máis feliz

CD+DVD+ libro todo nun lote, presentado por Galaxia na colección Sonárbore.

Un proxecto literario e audiovisual que xira arredor do tema da felicidade e da festa.

Un neno, Rui, que a pesar das súas dificultades pode gozar da música, cantar e bailar, é o centro deste proxecto. Un traballo realizado por moitos músicos galegos reunidos con este bxectivo. Música, vídeo e karaoke para defender o que hai que defender, a marabilla que supón ter unha lingua e unha cultura propias, a ledicia de estar xuntos unhas e outros, cada unha e cada un de nós distintos, coas nosas capacidades e discapacidades.

As ilustracións de P. Pastor tamén nos traen ese ambiente festeiro que necesitamos todos/as, e máis nestes tempos.

OUTROS SOPORTES (II)

Así fan os bailadores… de Sergio de la Osa, Xabier Iglesias, János Fügedi e Juan Parga. Un conxunto de CD+DVD+libro que nos trae unha compilación de bailes e danzas que nos servirán de iniciación ao baile galego. Editado por Dos Acordes.
Unhas veces cantamos e outras bailamos, e de cando en cando facemos de todo.
Quen dixo complexo?
A bailar que toca!
A bailar que alguén toca!

OUTROS SOPORTES (I)

Que gusto dá que alguén se dea conta das nosas necesidades e nos axude a satisfacelas, ou non?
Pois si, alguén creou este material para que poidas acostumarte a cantar canda todos e non te quedes sen notas nin letra.
GALEOKE. A música que levas dentro.
Xogo de karaoke para ordenador. Dísenos que serve para practicar o coñecemento da música galega, o canto e a lectura. Ademais, e sobre todo neste caso, divertirémonos en calquera ocasión que antes nos podía producir certa inseguridade, gustaremos do noso e utilizarémolo. Mostraremos a competencia na lingua e a música galega...
Que ben que alguén se dea conta deste marabilloso método para a instalación na lingua e a cultura.
Non hai desculpa para non telo xa, do xeito máis legal e solidario posible. Na páxina aparecen os lugares onde conseguilo.

OLA!!!!!!!!!!!!!!!!!!

Que tal estás? é unha das últimas publicacións de Kalandraka, da man de Anthony Browne. Trátase dunha desas traducións que aparecen na colección Tras os montes. Neste caso, a versión ao galego é de Silvia Pérez Tato. 

A esta pregunta, "que tal estás?" contéstase no libro:

"Ben, pero ás veces estou aburrido

e ás veces síntome só. 

Ás  veces estou moi contento...

e outras veces estou triste."

Ata finalizar cunha nova pregunta: "E ti, que tal estás?" nun encadeado que nos vai levando duns a outras. Podemos dicir como estamos guiándonos polos contrarios ou non, pero sempre acompañando as palabras coas imaxes desas expresións. 

Un libro para ler e mirar, para observar e opinar; un libro para as emocións e os sentimentos que nos dará pé para facer o noso propio libriño co mesmo título ou algún outro semellante. Un libro para ler, para crear e para pasarlle a pregunta a un novo protagonista que tamén se verá empuxado a crear o seu propio libro...   

Poucas palabras que só lle poñen nome ás ilustracións, que campean por si mesma. A sinxeleza en estado puro, porque o breve cando é bo ...

VII PREMIO IBEROAMERICANO S.M. DE LITERATURA INFANTIL E XUVENIL 2012

Ana Mª Machado acadou o novo Premio Iberoamericano de literatura infantil e xuvenil. Despois de Agustín Fernández Paz, chegou –de novo- o momento da literatura brasileña da man dunha muller que xa conseguira o máximo galardón deste ámbito, o Ándersen. É o tempo dos escritores dignos, daqueles que nos poden ensinar o amor polo libros e o valor da lectura ao longo da vida. Non hai máis que ver a súa conferencia inaugural no Congreso Iberoamericano de las Lenguas en la Educación y la Cultura.

Vexamos cales foron os autores e autoras anteriormente premiados: Juan Farias (2006), Montserrat del Amo y Gili (2007), Bartolomeu Campos de Queirós (2008), María Teresa Andruetto (2009), Laura Devetach (2010) e o galego Agustín Fernández Paz (2011).

OUTUBRO, MES DA BIBLIOTECA ESCOLAR

                                                                                                                                       Recuncho do CEIP A Sangriña

Que celebramos neste mes?

A biblioteca escolar, a chegada do outono, o magosto, o samaín,... moito se move nas bibliotecas ao longo neste outubro.

Hoxe detémonos na biblioteca e nos libros. Nos libros que falan de biblioteca e de libros, ¡de lectura!

Libros que nos levan a outros libros como Catro cartas, O único que queda é o amor, El secuestro de la bibliotecaria, O pequeno señor Paul, A guía fantástica, ...

PREMIO A UNHA EDITORA GALEGA

Kalandraka acaba de obter o PREMIO NACIONAL AO MELLOR LABOR EDITORIAL 2012, concedido polo Ministerior de Educación e Cultura.

Segundo informa a prensa,  este premio responde ao "seu compromiso coa literatura infantil, destacando o coidado dos textos, xunto coa calidade da ilustración e a dedicación a xéneros maís complexos como a poesía. É, por iso, un referente en España e no estranxeiro".

Un galardón que a editora estende "ao traballo colectivo, ao catálogo que temos, aos autores presentes, ao traballo dos ilustradores e ao da imprenta coa que traballamos". E que nós ampliamos aos lectores e lectoras, aos profesores e profesoras, ao conxunto da sociedade lectora que sente orgullo de que Kalandraka se atope en Pontevedra e a súa imprenta en Poio. Non é chauvinismo senón poñernos contentas da calidade dos produtos culturais galegos.

Ogallá nos caia algún premio máis!  

Hai quen dixo tres e hai quen di catro

Catro amigos pillabáns de Ramón Caride, semella unha homenaxe a aquela marabillosa serie de Tres amigos de Helme Heine, tamén publicados por Xerais. Como nisa, estes amigos (un porco, un gato, un caracol e un rato) son ben distintos, pero iso non lles impide entenderse e correr grandes aventuras xuntos.  

Cunhas magníficas ilustracións de Manuel Uhía, cóntase a historia de catro amigos que rematan sendo cinco: Manporquiño, Murrigato, Caracol Col e Murrato... e Verdegarto. Adiviña de que animal se trata e cales son as súas aventuras na escola, no zoo, no cine, co bastón máxico, no mar ou no circo. Lonxe ou de volta á casa... os amigos son amigos.

Leamos:

“E os bastóns máxicos, coma as lámpadas máxicas e todos os obxectos máxicos en xeral, teñen a propiedade de encoller o tempo para os que están fóra e estiralo para os que están dentro.

Pensade nun libro, que é un chico máxico. Nun libro calquera, que ledes por vez primeira. Mesneste se cadra: a que, cando vos gustamoito, estades dentro del e pasan moitas cousas? E a que, cando saídes do libro, o tempo fíxose curto de máis? Pois entón.”

PARA TEMPOS DE CHUVIA

O paraugas amarelo, con texto de Joel Franz Rossell e ilustracións de Giulia Frances, traducido por Xosé Ballesteros na colección Maremar de Kalandraka.

Un mundo gris no que os paraugas e as vidas teñen esa cor. Nunha fábrica de paraugas, un operario ten unha idea: tocar a panca “tinta amarelo pito” para que poida verse un paraugas cor de sol baixo a chuvia. Non é éxito o que lle agarda a este paraugas... despois de ser ocultado e posteriormente permanencer no escaparate xunto con outras cousas rebaixadas, será escollido por un paiaso que o leva ao circo. A pesar de que esa non é a vida que el soñara, acabará feliz porque atopou un mundo que ten cores e a xente despois da función “volve á súa casa contenta, coma quen leva un xirasol a moverse dentro do seu peito.”

DUN TEMPO E DUNHA TERRA

Dun tempo é unha terra, publicado na colección Ardentía de Tambre.  Este título, que se recolle da cita de Salvatore Quasimodo que encabeza a edición de Longa noite de pedra:

"Ser dun tempo e dunha terra. Eis o segredo da

poesía máis humana e verdadeira."

Unha selección dos poemas máis representativos de Celso Emilio Ferreiro realizada por Gonzalo Navaza e ilustrada por David Pintor neste ano no que se celebra o centenario do poeta.

Recollemos esta entrada de BLIX (Biblioteca de Literatura Infantil e Xuvenil) porque non se pode dicir mellor, en tan pouco espazo:

Logo dunha breve introdución biográfica, reúnense 44 poemas agrupados en apartados temáticos:

"O descontento co presente" recolle nove poemas sobre a sociedade do seu tempo, dende a Ditadura franquista á guerra de Vietnam.

En "O tempo, a nostalxia do paraíso, o desacougo" aparecen a infancia e a mocidade sentidas como un tempo edénico e feliz.

"O compromiso cos que sofren a historia" presenta ao poeta que sente como propios os padecementos dos outros.

"O amor" pola muller, Moraima, ou filial-materno.

"A esperanza" nun futuro de liberdade, que nun momento da súa vida cre ver na emigración, e xustiza.

"A terra" natal, que conforma o paraíso perdido da infancia, e o seu país, cunha lingua de seu coa que o escritor pon de manifesto o seu compromiso.

"A sátira, o escarnio": o humor e a vea satírica de longa tradición na literatura galega, presentada ás veces anonimamente ou baixo pseudónimos.

Acompañan os textos unhas breves introducións contexturalizadoras e unhas mínimas notas lingüísticas.