Libros e antiutopías

Ledicia Costas, ganadora do premio Merlín de literatura infantil 2014, cunha obra que agardamos ter nas mans o antes posible, tense caracterizado ata este momento pola escrita xuvenil. Dela é Unha estrela no vento, O corazón de Xúpiter en Recinto gris, todas elas publicadas na colección Fóra de xogo de Xerais.

A última, Recinto gris, ambiéntase nunha distopía. Unha sociedade organizada arredor do medo e a uniformidade onde semella que o totalitarismo será permanente e non vai ter saída. Un ambiente asfixiante e pechado, un mundo sen futuro... e un final que conteén unha gran ensinanza que nos chega a modo de agasallo co lazo da sorpresa.

Teredes que lelo!

Libros de teatro e poesía. Teatro e poesía infantil.

 

  

 

O teatro é un xénero en desvantaxe e o teatro infantil está na marxinalidade da marxinalidade. Aínda así, conta co apoio decidido da Fundación Neira Vilas que continúa a convocar o seu premio Estornela para textos teatrais que está a publicar a editorial ferrolán Embora, seguindo a estela que comezara edicións do Castro na época -sempre lembrada- de Isaac Díaz Pardo.

Embora publica a obra premiada, e moitas veces tamén as finalistas (ou que obteñen unha mención especial do xurado). Así está a ser, tamén, cos premios Arume de poesía, convocados pola mesma fundación e dos que acaba de ser publicada a obra Versos e bicos ou O libro dos bicos de Xosé Luna.

Á última das pezas distinguidas co Premio Estornela, Arlequino Viceversa, é unha obra de Diana Varela Puñal que "dispón toda a loxística escénica de xeito tal que resulta doada a súa adaptación ás táboas sen necesidade de grandes esforzos". E tamén, "ofrece unha lectura en valores, con marcado acento para cuestións como a defensa das tradicións propias, a convivencia interxeracional, a esperanza e a ilusión por vivir, a capacidade para soñar e emocionarse e a importancia da solidariedade a a amizade", en palabras da crítica.

Kiko da Silva premiado

 

O IX Premio de Banda Deseñada Castelao que anualmente convoca a Deputación da Coruña, foi para Kiko da Silva pola obra O infernodo debuxante. Este premio conleva, ademais da cantidade económica establecida nas bases do concurso, a publicación da obra gañadora.

O xurado do certame, formado por Miguelanxo Prado, Ángel de la Calle e CarlosPortela, valorou especialmente o traballo de Kiko da Silva entre os 13 orixinais presentados, o que supón un récord de participación nesta convocatoria.

O relato ideado por Kiko Da Silva conta a historia de Manuel Pardo, un debuxante que nunca é quen de publicar ningunha das súas creacións porque sempre se atopa con que algunha outra persoa xa o fixera antes.

Kiko, autor da mil e unha propostas arredor da banda deseñada e o humor merece este e mil premios máis!

Libros que son continuación de outros. Libros de autoras moi premiadas

 

 

María Reimóndez anda a demostrar o seu bo momento creativo. Despois do Premio Xerais, acaba de acadar o premio de novela por entregas de La Voz de Galicia. 

Pero non é da autora da que queremos falar, senón do seu libro Volvo! O regreso de Usha que é a continuación de Usha, onde se nos relata a historia dunha nena que vive lonxe do seu país e nunha situación ben especial. Desde a nena protagonista, enfróntanse asuntos que preocupan nesas idades como a amizade, a aparición dos cambios do corpo na adolescencia, a atracción física ou o entendemento da sexualidade e a reprodución, e todo isto desde outras realidades que ensinan a estar no mundo atendendo á diversidade. Volve Usha e recibímola con alegría. 

Como todas as historias de María Reimóndez, esta tamén está ilustrada por Iván Sende, achegándolle esa identidade que fala do bo entendemento destes creadores.

Libros trilingües para practicar a tradución

 Un neno na emigración / Un niño en la emigración / An immigrant child é o título do primeiro libro para nenos e nenas de Francisco Álvarez - Koki, con  ilustracións de Marta Iglesias Rodríguez, publicado por Edicións do Cumio.

Recollemos da presentación editorial:

"(...) recrea con sinxeleza e efectividade, en boa parte  a través das reviravoltas protagonizadas por un neno chamado Breogán, realidades que calquera persoa que viviu o esgazamento que supón a emigración puido experimentar. Breogán, no seu caso particular, chega ao barrio neoiorquino de Astoria con tres anos, saltarica e brinca por el, por espazos da terra de acollida como son as rúas e os parques próximos á súa casa, como o zoo de Nova York, ao que contrapón ou suma máis ben as impresións e todo aquilo que aprende nunha viaxe na que percorre Galicia, lugar sempre presente na súa educación e formación.

Alén destas vivencias Breogán resulta operativo para pensar e repensar asuntos como a propia emigración, os valores que representan o fomento e  o  respecto á multiculturalidade ou o poder que a lingua  propia posúe como depositaria da identidade, do que supón para sermos e estarmos, con autenticidade, no mundo."
O autor, radicado en Nova York desde hai anos,  é coñecido pola súa obra Ratas en Manhattan (Sotelo Blanco Edicións, 2007), e tamén por unha ampla obra poética en castelán e en galego con títulos como  Lexanías (1980),  Maruxía (1989) ou Máis aló de Fisterre (1991 e 2000).

    

Libros para a infancia

Everest Galicia, dentro da súa colección Ler é vivir, achega un novo libro de María Canosa con ilustracións de Dani Padrón, Ana xa chegou, que dá a benvida a un novo membro familiar. Ademais da familia, hai alguén especial agardando por ela, un compañeiro que viaxou desde lonxe para estar sempre ao seu carón. E xuntos irán descubrindo o que a existencia brinda.

Por outra banda, Manel Cráneo continúa coa serie Planeta Mincha mediante unha nova entraga, DiaRio de PiChüK. O longo longöbio de Longölia, todo el deste creador multifacético que achega a esta proposta infantil todo o seu saber, orixinario da banda deseñada. Nesta nova aventura, percorreremos xunto a Pichük e Riböt a rexión de Longölia, na procura dunha das máis grandes e enigmáticas especies do Planeta Mincha. Moita creatividade ao servizo dunha historia de gran imaxinación, coa invención dun mundo absolutamente fantástico de planeta e seres, de paisaxes e obxectos que abre as fronteiras do coñecido. 

Cráneo, ademais,ten unha web propia para o Planeta Mincha e unha tenda a través da que facer chegar os produtos, que con ese motivo crea.

Libros no taboleiro dos máis...

Unha das seccións máis interesantes do blogue de Ramón Nicolás, Caderno da crítica, é o taboleiro do libro galego, que recolle os datos de quince librarías consultadas, as novidades editoriais máis vendidas...
Nel, aparecen os máis vendidos por xénero; neste caso recollemos os que corresponden a literatura xuvenil, infantil, LIBROS cd-dvd:

XUVENIL

1º-. Ámote, Leo A. Terminal de…chegadas?, de Rosa Aneiros, Edicións Xerais.

2º-. Recinto gris, de Ledicia Costas, Edicións Xerais.

3º-. Dragal III, de Elena Gallego, Edicións Xerais.

INFANTIL

1º-. O soño de Esther, de Miguel Ángel Alonso e Luz Beloso, Nova Galicia Edicións.
2º-. O Dragón que cambiaba de conto cada vez que esbirraba, de David Aceituno e debuxos de Miguelanxo Prado, El Patito Editorial.
3º-.  A burra Ramona, de Paula Carballeira (ilustracións de Xosé Tomás), Baía Edicións.

LIBROS CD-DVD

1º-. Brinca vai!, de Paco Nogueiras, ilustracións de David Pintor,  Kalandraka.
2º-. Na lingua que eu falo, de Najla Shami e Rosalía de Castro, Editorial Galaxia.
3º-. Pitusa semifusa, de Olga Brañas, ilustracións de Leandro Lamas, Editorial Galaxia.
4º-. Pan de millo, de Migallas, ilustracións de Dani Padrón, Kalandraka.

BANDA DESEÑADA

1º-. O bichero IV, de Davila, edición do autor.
2º-.  Ardalén, de Miguelanxo Prado, El Patito Editorial. 

Lecturas para a merenda e libros que a facilitan

 

"Os libros da merenda", publicados por Urco editora, son libros de carácter popular en canto ao seu prezo, apenas 2,5 euros a unidade, o seu pequeno formato convérteos nunha sorte de mini-libros nos que a calidade e o coidado dos textos, a cargo de Martinho Terrafría, e o tratamento acaído das ilustracións, responsabilidade de Vladimir Zatonski, resulta ben palpable. Os universos que se recrean e as historias que se relatan nestas catro entregas -Señor Fiz, o repolo feliz, Don Bento, o porco fedorento, Fariñeiro, o burro larpeiro e mais Xoana, a ra lacazana- mergúllanse en referentes constituídos por elementos propios da  flora e dos animais domésticos humanizados, recurso a priori atractivo para protagonizar sinxelas voltas e reviravoltas argumentais, que procuran conscientemente manter o ritmo narrativo e certa musicalidade baixo a vontade, a meu entender, de desacralizar a idea da lectura, de procurar o divertimento e de non dar nunca as costas ao humorismo. Á concepción inicial destes libros engádese a posibilidade de interactuar co mesmo incorporando deseños que posibilitan ser completados e coloreados polo lectorado."

Así os presentaba o Caderno da crítica.
E porque eles son “nutritivos coma un bocadillo, doces coma unha onza de chocolate, divertidos coma un ovo kinder e ao alcance de todos os petos”, animámosvos a metelos no peto e darllos na man a eses pequenos que tanta necesidade teñen deste alimento na nosa lingua.
 

Libros en serie

Conan o Bárbaro é un personaxe que naceu nos relatos e novelas de Robert E. Howard, que con Conan (creado no ano 1932), e o seu precedente, o atlante rey Kull de Valusia, estableceu a base para as historias de fantasía, o chamado xénero de espada e bruxería.

Levado despois á banda deseñada e máis tarde ao cinema, Conan representa o estado esencial da humanidade, salvaxe e libre, fronte aos enganos da civilización. Neste volume preséntanse catro historias deste personaxe, continuando a cronoloxía interna da obra que comezamos co primeiro volume desta colección.

Urco editora presenta o terceiro volume da historia de Conan, en galego.Unha boa ocasión para lelo!

Literatura transmedia, libros que medran noutros formatos e soportes

As meigas de Lupa é unha novela de María Solar, da que xa falamos noutra entrada deste blogue.

O que agora nos chama a atención é o feito de que ese libro dou lugar a unha serie de produtos que seguen a falarnos dese imaxinario creado pola autora.

Ela mesma nolo conta desta maneira:

"É a historia máis linda que vivín na literatura porque medrou en moitos campos grazas ao traballo desinteresado de lectores.
Naceu como un libro xuvenil, pero leuno un compositor de música de cine que vive en Lugo e que eu non coñecía, David Alonso Garzón. Él criouse nos espazos do Pico Sacro dos que fala o libro. Así que inspiroulle unha Banda Sonora Orixinal"

Esta banda sonora foi recollida nun CD que acompañou a segunda edición do libro, publicado por Edicións Xerais de Galicia. Banda sonora que resultou finalista dos prestixiosos premios Jerry Goldsmith de musica de cine. Podedes escoitala neste enlace.

E segue a contar María:
"Despois o mesmo compositor cun compañeiro (teñen unha productora) pedironme usar o libro para probar unha técnica audiovisual nunca feita en Galicia mesturando actores reais con escenarios recurtados en papel e sombras chinescas. Así implicaron a un artista plástico, a productora e o grupo de teatro Achádego de Lugo e naceu o booktrailer. E a web As meigas de Lupa onde contan o proceso que seguiron.

E despois aínda se fixo unha exposición preciosa e moi exitosa no Museo de Historia interactiva de Lugo cos proscenios usados para o audiovisual."

Sería xenial poder contar con esa expo rulando por toda Galicia, a que si?

De todo isto se dá noticia na páxina de María Solar.

Un libro que medra nunha BSO, un audiovisual, unha web e unha expo

Libros de monstros para comezar as vacacións

Sushi Books, o selo editorial do Morrazo presenta dous títulos que teñen como protagonistas aos monstros, na colección álbum. Ambos creados por autores e ilustradores islandeses como son Áslaug Jónsdóttir, Rakel Helmsdal,  Kalle Güettler e Áslaug Jónsdóttir.

Os seus títulos son Os monstros grandes non choran e Monstro pequeno di non, traducidos ao galego polo denominado «Equipo Sushi».

A personificación dos monstros con comportamentos case "demasiado humanos", o papel do poder pero tamén da amizade, a posibilidade de modificar os roles, son aspectos que aí aparecen para motivar o comentario, para animar a opinión. 
Para darlle unha volta a este mundo tan monstruoso!

Booktráilers de libros galegos (II)

Miremos algún dos que anuncian os libros dun dos nosos: Manuel Rivas e os seus libros Todo é silencio, Os libros arden mal,...

E... aínda máis booktráilers

Si, cada día aumenta o número de booktráilers de libros escritos en galegos, e cada día apetece máis velos, seguilos, observar como "falan" deles, como os presentan desta maneira, como adoptan esta linguaxe publicitaria...
Como esquecer o de Ámote Leo A, de Rosa Aneiros. Unha triloxía da que pedimos continuación, porque queremos saber qué vai pasar nese triángulo Galicia (toda Galicia) - Berlín, ou non?
Asasinato no Consello Nacional de Diego Ameixeiras

Máis booktráilers para libros galegos

O
O booktráiler como obxecto publicitario na rede, como porta de entrada a un libro, como produto audiovisual dun libro...
Cronoloxía de urxencia de Dores Tembras.
A illa de todas as illas de Xabier P. Docampo
Cartas de inverno de Agustín Fernández Paz

Booktrailers para libros galegos

Os booktráilers son ferramentas cunha gran capacidade para promocionar libros. No caso do libro galego, é fundamental ter en conta esta nova linguaxe audiovisual e a súa potencialidade.

De aí que queiramos visualizalos, tal como fai o blogue de Xerais: 

"Booktráiler da novela A viaxe de Gagarín de Agustín Fernández Paz, realizado por David Rodríguez. O booktráiler pode verse tamén no blog de Gagarín, unha bitácora que o autor abriu para informar do proceso de documentación da novela: «precisei documentarme antes sobre diferentes temas, que se foron ampliando a medida que avanzaba na redacción. Foi un proceso interesantísimo, onde descubrín verdadeiras alfaias: libros, páxinas web, películas, cancións…». Trátase, iso si, dun blog «que ten data de caducidade: nun cálculo aproximado, sáenme entre vinte e vinte e cinco entradas de interese. Esas serán as que desenvolva; cando as acabe, poñereille o ramo a esta iniciativa. A un ritmo de dúas por semana, en menos de tres meses estará rematado».

Outro booktrailer a ter en conta é o de Os televisores estrábicos, un libro de relatos de Ramón Vilar Landeira.

Libros que tentan axudar

Da presentación...

"O novo libro dos Bolechas busca concienciar sobre o acollemento familiar. 

Os Bolechas aumentan a familia, presentan a coversión desta comunidade en familia de acollida de dous cativos, Noela e Vintil, e do seu can, Sudoku. Deste xeito quérese impulsar a divulgación do acollemento familiar, un recurso que ofrece aos menores que o necesitan un fogar e unha familia coas que viviren mentres se solucionan os problemas da súa.

A serie dos Bolechas, creada por Pepe Carreiro, caracterízase por mesturar unha parte didáctica e outra de humor e lecer, unha combinación para poder chegar aos nenos e nenas e aos seus pais e familias e que leva triunfando xa 14 anos en Galicia."
Lembremos outro libro no que se recoillía esta temática Milu

Sabías que...?

Hugin e Munin acaba de traducir O afundimento do Titán, unha novela curta, escrita polo estadounidense Morgan Robertson, catorce anos antes do afundimento do Titanic. Semella que a ficción adiviña ou predí o futuro 

Así a presetna a editora: "A novela, pensada para o gran público, mais cun adecuado manexo da intriga que mantén vivo o interese do lector e que manexa ingredientes de distintos xéneros, desde o relato de catástrofes ata a aventura a través da natureza aterradora dos polos (...)Só nos queda sinalar que a noveliña, mais de cen anos despois de ser escrita e editada, segue a resultar entretida e fainos revivir a catástrofe do Titánic desde a pespectiva de quen a imaxinou catorce anos antes de que acontecese. Para os estudosos da literatura serve para que mediten sobre como foi xurdindo nos Estados Unidos unha literatura popular, de baixo custo, pero de calidade, que é a antecesora directa das grandes películas comerciais de éxito así como dos telefilmes e series que hoxe contempla tanta xente en todo o mundo.»

A tradución ao galego é de Alejandro Tovar.