29/9/14

GALICREQUES. Festival Internacional de Títeres en Santiago

Levan anos organizando esta cita anual e xa van pola décimo novena edición (Festival Internacional de Títeres Galicreques) e facéndoo cunha calidade digna dunha resposta realmente contundente.
É a xente de Cachirulo, un par de promotores culturais e teatrais que chegados de lonxe adoptaron o noso idioma e fixeron de Galicia a súa casa. Así a coidan!
Agora, baixo o paraugas da Asociación Barriga Verde presentan o programa deste festival 2014 para levar a cabo en distintos espazos de Santiago (Teatro Principal, Zona “C”, o SGAE-Fundación Autor, ademais das prazas de San Martiño Pinario, Toural e Praterías, Praza Roxa, Paseo Central da Alameda e A Regadeira de Adela) entre o 27 de setembro e o 5 de outubro coa participación de 21 compañías galegas e de fóra de Galicia. Nesta ocasión presenta un ciclo dedicado ao autor Julio Cortázar, ademais de 65 representacións de 28 espectáculos para todos os públicos, obradoiros e exposicións arredor do mundo das marionetas.
Representacións para pequenos e grandes.
Non as perdades!!!!!!!!!!!!!!!!!!
Aquí podemos acceder ao programa.

24/9/14

O libro e os días: "Venres nas librarías"

Acaba de presentarse esta campaña de promoción do libro por parte da Federación de librarías de Galicia e a Asociación Galega de Editores. "Venres nas librarías" será un encontro cos libros e os seus autores na tarde dos venres.
Nalgúns países tense reivindicado o venres cultural, nalgunhas vilas tense levado a cabo durante un tempo, agora as librarías convidarannos ao encontro nesas tardes dos meses de outono. Unha boa alternativa para saír da casa e volver cun libro na man para facer máis rico o fin de semana.
Parabéns pola iniciativa e aporoveitemos esta nova oportunidade. Tamén os pequenos e as pequenas da casa están convidados.
Aquí está o programa.

22/9/14

Finalistas XI premio literario Frei Martín Sarmiento

 Xa se fixeron públicos os finalistas do XI premio literario Frei Martín Sarmiento. A característica principal deste premio é que son os propios alumnos de varios centros os que escollen as obras gañadoras, divididas envarias categorías, según rangos de idade.
1ª categoría: 1º e 2º de Educación Primaria

2ª categoría: 3º e 4º de Educación Primaria

3ª categoría: 5º e 6º de Educación Primaria
Os Sabuxos entran na casa co pé esquerdo de Jaureguizar.

4ª categoría: 1º e 2º de ESO

5ª categoría: 3º e 4º de ESO

18/9/14

Os "hit parade" do libro galego

                                                                                 Imaxe de Alicia Martín
Ramón Nicolás acolle no seu blogue "Caderno do crítica" unha sección que recibe o nome de "Taboleiro do libro galego" onde por categorías (Narrativa, Poesía, Ensaio-Teatro, Literatura Infantil e Xuvenil, Banda Deseñada e mais Álbum Ilustrado) imos poñéndonos ao día dos máis vendidos en determinadas librarías do país, neste caso trátase de trece:  Paz,  Trama, Suévia, Miranda,  Biblos,  Andel,  Cartabón, Aira das Letras,  Pedreira, Libros para soñar, Á lus do candil,  Casa do Libro (Vigo) e Lila de Lilith.

17/9/14

Literatura xuvenil galega en inglés

 

Será que necesitamos que outros lean e valoren a nosa literatura para crer que realmente ten calidade?
Pois ben, unha nova demostración para descridos!
A editorial Small Stations está a mostrar esta literatura en inglés. 
Títulos como Dragal, O pintor con sombreiro de malvas, Aire negro, A pomba e o degolado... aparecen nos fondos desta editora. Pódese entrar e ler ata un capítulo en inglés.
 É o mercado libre, sen subvencións nin trato de favor, sen discriminación positiva; o mercado en estado puro.
Jonathan Dunne é o responsable deste reto e forma parte dese grupo de estranxeiros que defenden o noso, moitas veces a pesar de nós mesmos. 


15/9/14

Sempre en Galiza

Desde Fervenzas literarias:
"O Consello da Cultura Galega e a editorial Galaxia acaban de publicar, co gallo do 70 aniversario da edición do Sempre en Galiza, unha aplicación coa obra cumio de Castelao para dispositivos Android, Tablets e dispositivos móbiles.
A aplicación Sempre en Galiza está estruturada en diferentes apartados. Os usuarios que se descarguen a app terán acceso tanto ao libro completo como a contidos complementarios, como estudos sobre o proceso de elaboración, o pensamento político de Castelao e as ideas lingüísticas realizados por Alfonso Mato, Henrique Monteagudo, Ramón Maíz e Xusto Beramendi; os cadernos manuscritos; material sobre Castelao, que inclúe unha biografía, unha fotogalería e un interesantísimo video gravado por Elixio González en Bos Aires a partir de 1940.
Sempre en Galiza supón unha das obras máis importantes sobre a identidade galega. Publicouse no ano 1944 en Arxentina, país onde se exiliou Castelao tras o alzamento militar. O libro inclúe artigos, ensaios, conferencias, discursos xunto a material pensado especificamente para a obra por parte do político e escritor rianxeiro."
Aquí, na páxina do Consello, está o enlace para a descarga.

11/9/14

Plataforma para o préstamo de libros nas bibliotecas públicas

O Ministerio acaba de presentar a plataforma eBiblio para o préstamo de libros en formato dixital. 
Co carnet da biblioteca pública e un dispositivo (libro electrónico, tablet, smartphone...) os usuarios terán acceso a un catálogo de 1.500 títulos, por medio dunhas 200.000 licencias, de forma que se poderá prestar unhas 28 veces cada libro e ao longo de 21 días. 
As categorías incluídas nestes fondos son: «Ficción para adultos», «Ciencia e Tecnoloxía», «Ciencias Sociais e Humanidades», «Saúde, Desenvolvemento Persoal, Lecer, Deporte...», «Ficción infantil e xuvenil», «Non ficción infantil e xuvenil» e «Audiolibros».
A partir deste momento serán as comunidades autónomas as que engadan as obras propias a esta colección.

9/9/14

As bibliotecas e os recursos


As bibliotecas municipais da Coruña dan acceso a unha wiki na que se recollen materiais dos que dispón esta rede en relación á temática LGTBq, e detrás das tipoloxías de cine, cómics, divulgación, literatura, música e recursos de interese.
Así a presentan:
"Os fondos das bibliotecas son (e deben ser) un fiel reflexo da sociedade e moi especialmente das comunidades ás que prestan servizo de proximidade.
Como bibliotecas, e como bibliotecarixs, debemos ser partícipes, e mesmo impulsorxs, dos procesos de erradicación de toda manifestación excluínte, optando sempre por unha vía integradora da diversidade.
Calquera persoa que se achegue a unha biblioteca pública buscando información sobre o feito homosexual, bisexual e transexual require de nós unha resposta eficiente. Esta resposta debe traducirse nunha integración total de materiais que toquen a temática LGTB nas nosas estanterías e, ademais, no ciberespazo."


8/9/14

Libros con memoria

 
Cos ollos do avó, de Concha Blanco, fala da transmisión da memoria ás xeracións máis novas, desa relación sempre rica entre avós e netos e de espazos asulagados. Como nas vellas lendas das cidades submarinas, a permanencia e riqueza das relacións entre maiores e menores... para ler, mirar e pensar!

Publicado pola ferrolá editora Embora, está ilustrado por Xosé Tomás

5/9/14

A literatura galega en inglés

O portal web Portico of Galician Literature, que foi posto en marcha en 2012, ofrece un breve percorrido pola historia de Galicia e da súa literatura. 
O obxectivo desta iniciativa é promover a proxección internacional das letras galegas a través da rede. Está   promovida pola Secretaría Xeral de Cultura e pretende converterse nun referente da literatura galega para o ámbito anglófono e, en xeral, para a proxección internacional das letras galegas.
promover a proxección internacional das letras galegas a través da rede.  
Ademais da información sobre os escritores, das sinopses e da tradución dalgúns fragmentos, o portal tamén serve de escaparate para a difusión de títulos da literatura galega publicados en inglés, entre os que se inclúen ‘Merlín e familia’, de Álvaro Cunqueiro; ‘A lingua das bolboretas’ e ‘O lapis do carpinteiro’, de Manuel Rivas; ‘Memorias dun neno labrego’, de Xosé Neira Vilas; ou ‘Bestiario dos descontentos’, de Miguel Anxo Murado.
En 2013, o portal exterior da literatura galega integrou fragmentos de obras de novos escritores, engadindo ao catálogo extractos textuais de Suso de Toro, Xavier Alcalá, Teresa Moure ou Antón Riveiro. Marilar Aleixandre, Fina Casalderrey, Agustín Fernández Paz, Miguel-Anxo Murado, Anxo Rei Ballesteros e Manuel Rivas completan a relación de autores deste portal das letras galegas en inglés.
No 2014, incorpóranse ‘Dime algo sucio’, ‘Ámote Leo A. Destino Xalundes’, ‘Dragal I: A herdanza do dragón’, ‘Papaventos’ e ‘Así nacen as baleas’, a través dunha breve sinopse en inglés de cada obra e mais dunha mostra de 40 páxinas traducidas a esta lingua de cada unha delas.
Así se conta no portal educativo

4/9/14

Libros que ensinan... a camiñar

Manual do bo paseante, subtitulado "Descrición en vinte puntos" do escritor catalán Raimon Juventeny, traducido por Xosé Ballesteros e publicado por Factoría K


Un libro que ha de relacionarse co movemento slow,  porque é Carl Honoré, un dos teóricos desta filosofía e autor do libro Eloxio da lentitude quen o prologa pero tamén porque se presenta como "unha panorámica do devandito movemento aplicado a algo tan próximo e familiar como é o paseo, operativa tanto para recuperar ese pracer no caso que se teña perdido como para convencer, a quen non o practica, dos seus inestimables beneficios. 
Unha proposta articulada en vinte secuencias que ofrece unha sinxela terapia para combater présas e urxencias, se cadra para ver as cousas dun xeito diferente, e ofrecida nun soporte ben atractivo para todas as idades."
Este tempo aínda é unha boa época para a práctica, así que leamos para camiñar.

3/9/14

De libros e exposicións (II)


Tamén, en Santiago, neste caso na Casa do Cabido, a un paso do Museo das Peregrinacións pode visitarse a exposición "Santiago cidade ilustrada".   
O Consorcio de Santiago e El Patito Editorial organizan esta mostra que reflicte, a través de máis de 60 debuxos e ilustracións, o protagonismo que a cidade compostelá foi adquirindo na literatura infantil e xuvenil, nos cadernos de viaxe e nos cómics nos últimos anos. Son obras de autores nacionais e internacionais, cunha sección dedicada aos debuxantes norteamericamos que nas súas historietas incorporaron imaxes de Santiago.

2/9/14

De libros e exposicións (I)

Ata o 31 de decembro pode visitarse no Museo das Peregrinacións (Santiago de Compostela) unha exposición antolóxica de Miguelanxo Prado. Lembremos que o último recoñecemento que recibiu, este creador, foi o Premio Nacional de Banda Diseñada.
"A exposición reúne 59 obras orixinais de toda a carreira de Miguelanxo Prado.  Divídese en dúas partes. A sala grande do museo está dedicada ao mar, unha constante na traxectoria do artista e nela poden verse obras de De Profundis, Ardalén, Trazo de Tiza, xunto con distintas ilustracións que teñen en común esta temática. Nesta mesma sala móstranse ilustracións da cidade de Santiago de Compostela, pola que Prado sente unha especial debilidade. Ademais, en tres vitrinas recóllese unha selección das súas obras en distintas linguas, xa que é un dos autores galegos máis traducidos, ata a 17 idiomas.
Noutra sala pódese ver un compendio dos seus primeiros traballos no mundo do cómic e ilustracións que ten realizado para outros escritores galegos e de fóra. Neste espazo tamén se lle rende unha pequena homenaxe ao Xabarín, que Miguelanxo Pradou creou nos noventa. E proxéctase Os Vixilantes do Camiño, a serie de animación en 2D que produciu para a Televisión de Galicia en 1999, inspirada no Camiño de Santiago e que protagonizan os personaxes do Xabarín Club."
Así se recolle na páxina do concello.


1/9/14

Libros traducidos. Culturas en contacto.

A casa de Mango Street de Sandra Cisneros, traducido por Alicia Meléndez e publicado por Sushi Books
Sandra Cisneros, é unha escritora moi representativa dunha literatura/cultura como a chicana, marcada pola mestura de dous mundos, o da orixe sureña e o de residencia no norte. Neste libro móstranos, desde a perspectiva dunha adolescente, as claves dun universo contado dunha maneira especial e que mostra a discriminación exercida cara a un colectivo, un xénero, unha clase social e unha identidade.