OUTROS SOPORTES (I)

Que gusto dá que alguén se dea conta das nosas necesidades e nos axude a satisfacelas, ou non?
Pois si, alguén creou este material para que poidas acostumarte a cantar canda todos e non te quedes sen notas nin letra.
GALEOKE. A música que levas dentro.
Xogo de karaoke para ordenador. Dísenos que serve para practicar o coñecemento da música galega, o canto e a lectura. Ademais, e sobre todo neste caso, divertirémonos en calquera ocasión que antes nos podía producir certa inseguridade, gustaremos do noso e utilizarémolo. Mostraremos a competencia na lingua e a música galega...
Que ben que alguén se dea conta deste marabilloso método para a instalación na lingua e a cultura.
Non hai desculpa para non telo xa, do xeito máis legal e solidario posible. Na páxina aparecen os lugares onde conseguilo.

OLA!!!!!!!!!!!!!!!!!!

Que tal estás? é unha das últimas publicacións de Kalandraka, da man de Anthony Browne. Trátase dunha desas traducións que aparecen na colección Tras os montes. Neste caso, a versión ao galego é de Silvia Pérez Tato. 

A esta pregunta, "que tal estás?" contéstase no libro:

"Ben, pero ás veces estou aburrido

e ás veces síntome só. 

Ás  veces estou moi contento...

e outras veces estou triste."

Ata finalizar cunha nova pregunta: "E ti, que tal estás?" nun encadeado que nos vai levando duns a outras. Podemos dicir como estamos guiándonos polos contrarios ou non, pero sempre acompañando as palabras coas imaxes desas expresións. 

Un libro para ler e mirar, para observar e opinar; un libro para as emocións e os sentimentos que nos dará pé para facer o noso propio libriño co mesmo título ou algún outro semellante. Un libro para ler, para crear e para pasarlle a pregunta a un novo protagonista que tamén se verá empuxado a crear o seu propio libro...   

Poucas palabras que só lle poñen nome ás ilustracións, que campean por si mesma. A sinxeleza en estado puro, porque o breve cando é bo ...

VII PREMIO IBEROAMERICANO S.M. DE LITERATURA INFANTIL E XUVENIL 2012

Ana Mª Machado acadou o novo Premio Iberoamericano de literatura infantil e xuvenil. Despois de Agustín Fernández Paz, chegou –de novo- o momento da literatura brasileña da man dunha muller que xa conseguira o máximo galardón deste ámbito, o Ándersen. É o tempo dos escritores dignos, daqueles que nos poden ensinar o amor polo libros e o valor da lectura ao longo da vida. Non hai máis que ver a súa conferencia inaugural no Congreso Iberoamericano de las Lenguas en la Educación y la Cultura.

Vexamos cales foron os autores e autoras anteriormente premiados: Juan Farias (2006), Montserrat del Amo y Gili (2007), Bartolomeu Campos de Queirós (2008), María Teresa Andruetto (2009), Laura Devetach (2010) e o galego Agustín Fernández Paz (2011).

OUTUBRO, MES DA BIBLIOTECA ESCOLAR

                                                                                                                                       Recuncho do CEIP A Sangriña

Que celebramos neste mes?

A biblioteca escolar, a chegada do outono, o magosto, o samaín,... moito se move nas bibliotecas ao longo neste outubro.

Hoxe detémonos na biblioteca e nos libros. Nos libros que falan de biblioteca e de libros, ¡de lectura!

Libros que nos levan a outros libros como Catro cartas, O único que queda é o amor, El secuestro de la bibliotecaria, O pequeno señor Paul, A guía fantástica, ...

PREMIO A UNHA EDITORA GALEGA

Kalandraka acaba de obter o PREMIO NACIONAL AO MELLOR LABOR EDITORIAL 2012, concedido polo Ministerior de Educación e Cultura.

Segundo informa a prensa,  este premio responde ao "seu compromiso coa literatura infantil, destacando o coidado dos textos, xunto coa calidade da ilustración e a dedicación a xéneros maís complexos como a poesía. É, por iso, un referente en España e no estranxeiro".

Un galardón que a editora estende "ao traballo colectivo, ao catálogo que temos, aos autores presentes, ao traballo dos ilustradores e ao da imprenta coa que traballamos". E que nós ampliamos aos lectores e lectoras, aos profesores e profesoras, ao conxunto da sociedade lectora que sente orgullo de que Kalandraka se atope en Pontevedra e a súa imprenta en Poio. Non é chauvinismo senón poñernos contentas da calidade dos produtos culturais galegos.

Ogallá nos caia algún premio máis!  

Hai quen dixo tres e hai quen di catro

Catro amigos pillabáns de Ramón Caride, semella unha homenaxe a aquela marabillosa serie de Tres amigos de Helme Heine, tamén publicados por Xerais. Como nisa, estes amigos (un porco, un gato, un caracol e un rato) son ben distintos, pero iso non lles impide entenderse e correr grandes aventuras xuntos.  

Cunhas magníficas ilustracións de Manuel Uhía, cóntase a historia de catro amigos que rematan sendo cinco: Manporquiño, Murrigato, Caracol Col e Murrato... e Verdegarto. Adiviña de que animal se trata e cales son as súas aventuras na escola, no zoo, no cine, co bastón máxico, no mar ou no circo. Lonxe ou de volta á casa... os amigos son amigos.

Leamos:

“E os bastóns máxicos, coma as lámpadas máxicas e todos os obxectos máxicos en xeral, teñen a propiedade de encoller o tempo para os que están fóra e estiralo para os que están dentro.

Pensade nun libro, que é un chico máxico. Nun libro calquera, que ledes por vez primeira. Mesneste se cadra: a que, cando vos gustamoito, estades dentro del e pasan moitas cousas? E a que, cando saídes do libro, o tempo fíxose curto de máis? Pois entón.”

PARA TEMPOS DE CHUVIA

O paraugas amarelo, con texto de Joel Franz Rossell e ilustracións de Giulia Frances, traducido por Xosé Ballesteros na colección Maremar de Kalandraka.

Un mundo gris no que os paraugas e as vidas teñen esa cor. Nunha fábrica de paraugas, un operario ten unha idea: tocar a panca “tinta amarelo pito” para que poida verse un paraugas cor de sol baixo a chuvia. Non é éxito o que lle agarda a este paraugas... despois de ser ocultado e posteriormente permanencer no escaparate xunto con outras cousas rebaixadas, será escollido por un paiaso que o leva ao circo. A pesar de que esa non é a vida que el soñara, acabará feliz porque atopou un mundo que ten cores e a xente despois da función “volve á súa casa contenta, coma quen leva un xirasol a moverse dentro do seu peito.”

DUN TEMPO E DUNHA TERRA

Dun tempo é unha terra, publicado na colección Ardentía de Tambre.  Este título, que se recolle da cita de Salvatore Quasimodo que encabeza a edición de Longa noite de pedra:

"Ser dun tempo e dunha terra. Eis o segredo da

poesía máis humana e verdadeira."

Unha selección dos poemas máis representativos de Celso Emilio Ferreiro realizada por Gonzalo Navaza e ilustrada por David Pintor neste ano no que se celebra o centenario do poeta.

Recollemos esta entrada de BLIX (Biblioteca de Literatura Infantil e Xuvenil) porque non se pode dicir mellor, en tan pouco espazo:

Logo dunha breve introdución biográfica, reúnense 44 poemas agrupados en apartados temáticos:

"O descontento co presente" recolle nove poemas sobre a sociedade do seu tempo, dende a Ditadura franquista á guerra de Vietnam.

En "O tempo, a nostalxia do paraíso, o desacougo" aparecen a infancia e a mocidade sentidas como un tempo edénico e feliz.

"O compromiso cos que sofren a historia" presenta ao poeta que sente como propios os padecementos dos outros.

"O amor" pola muller, Moraima, ou filial-materno.

"A esperanza" nun futuro de liberdade, que nun momento da súa vida cre ver na emigración, e xustiza.

"A terra" natal, que conforma o paraíso perdido da infancia, e o seu país, cunha lingua de seu coa que o escritor pon de manifesto o seu compromiso.

"A sátira, o escarnio": o humor e a vea satírica de longa tradición na literatura galega, presentada ás veces anonimamente ou baixo pseudónimos.

Acompañan os textos unhas breves introducións contexturalizadoras e unhas mínimas notas lingüísticas.

ALMANAQUE

Almanaque musical, da autoría de Antonio Rubio e David Pintor en tradución de Xosé Ballesteros, publicado por Kalandraka.
Cada mes un poema e unha ilustración na que unha orquestra -con músicos de diferentes fasquía- se adapta ao tempo que corresponde.
A modo de exemplo:

ABRIL
Cando chove abril

os músicos cantan

negras e corcheas,

semifusas, brancas.

A celosa chuvia

bate no paraugas

con pingas agudas:

pizzicato de auga.

Son notas de nube,

salmodias aladas

que ao caer entoan

primavera de auga.

Un almanaque para ler, ver e escoitar, porque ao remate, se nos recomendan concertos de corda cunha unha serie de pezas.

CÓMICS EN SERIE

Castelao. O pobre tolo con guión de Inacio Vilariño e  debuxos de Iván Suárez  é o primeiro dunha serie na que se recolle a vida deste home fundamental na historia e na cultura de Galicia. Pintor, escritor e político... Castelao representa a personalidade máis rica dunha das mellores épocas históricas deste país.

O título do cómic débese á obra do mesmo nome de Teixeira de Pascoaes, que Castelao estaba a ler nos tempos que se recollen neste volume.

Esta obra foi editada conxuntamente por Demo editora e KÓMIC, que celebraba así os 25 anos de libraría especializada no mundo dos cómics.

Os autores recibiron o Premio de BD Castelao da Deputación da Coruña en 2011 por Titoán, que fai parte desta serie biográfica.

Arredor da literatura xuvenil

"(...) sei que hai moitos libros para adultos que están pensados para xente con máis vivencias, experiencias e unha forma de ver o mundo que aínda non é a que teño eu; sei que teño que esperar para saber saborealos plenamente. Por outra banda están os libros catalogados como literatura xuvenil, nos que é moi difícil atopar algún que mereza a pena (que os hai), porque os que máis éxito adoitan ter son todos iguais, cos mesmos temas, (...)"

  

Esta é a opinión da alumna dun IES. Unha opinión a ter en conta para os mediadores acheguen libros xuvenís realmente de calidade sen deixarse levar por modas nin reclamos editoriais ou de calquera outro tipo. É triste ver que a maioría dos libros xuvenís que esta moza tivo nas mans coincidiron cos aqueles que na literatura de adultos serían os máis comerciais. Pero hai ...máis mundo, moito máis. E para mostra, un botón...

2012 ANO CELSO EMILIO FERREIRO, tamén para @s peques

O meu primeiro Celso Emilio Ferreiro é un libro con Cd ou un Cd con libro, como prefirades; o asunto é que conta cos dous soportes para achegarnos a este poeta que está de aniversario (ou mellor dito, de centenario). Hai cen anos que naceu e cincuenta que publicou o poemario Longa noite de pedra, un motivo máis que suficiente para que as editoriais publiquen obras interesantes en torno a este autor. Esta é unha delas, e no noso caso unha das imprescindibles.

Sorprende saber que as ilustracións son de María Manuela, a cantante que dou voz a parte destes poemas, e da que non coñecíamos esta interesante faceta coa que logra moi bos resultados. Non sorprende tanto, que a edición sexa de Xosé Lastra (profesor moi coñecido polo seu traballo no movemento de renovación pedagóxica: Nova Escola Galega, coautor dos textos do grupo Avantar, codirector da colección Merlín de Xerais...) e da súa filla Xiana Lastra (tamén coñecida polo traballo en Nova Escola Galega e na Revista Galega de Educación, así como cantante). Ambos, escriben unha pequena biografía e antoloxía do poeta de Celanova e participan na gravación deses oito poemas nos que tamén colaboran María Manuela, Mini e Mero,... e moitos outros que percorren o campo dos cantautores ao folclore e jazz de maneira colectiva e "con sumo gusto" pois así vai a boa xente.

Leamos e escoitemos esta pequena xoia mentres o 2112 non remata e nos anos que han de vir.

LIBRO CON CURTA

Dúas letras, unha curta de Eloi Varela con guión de Fina Casalderrey, acaba de ser publicada pola editorial Galaxia. O volume recolle un DVD (coa curta e os seus extras en forma de entrevistas con director, guionista, primeira actriz, making off, localizacións…) e un libro no que acompañan o relato de Fina un par de textos de Víctor Freixanes e Francisco Castro sobre a emigración.
Unha película que xa recibiu varios premios (nos Festivais de Cine de Bueu, Primavera de Vigo e Cans onde recolleu o Premio do xurado dos veciños de Cans á mellor curtametraxe de ficción, Premio do público á mellor curtametraxe de ficción, e o Premio do xurado á mellor interpretación feminina)  e está realizada en branco e negro. Nela, nin os actores nin as actrices son profesionais pero conseguen facer real unha historia triste de emigración na que nai e fillo se comunican a través desas dúas letras que atravesan o Atlántico.
Vale a pena vela, por moitas razóns pero especialmente polo que supón de superación de obstáculos cando hai unha historia que contar e se quere facer a través dun medio tan caro coma o cine. Todo se pode superar cando se parte da creatividade, era a mensaxe do editor na presentación, e neste caso demóstrase de sobra. Con iso debemos contar e coa novidade de que por unha vez, se escriba o relato a partir dunha película e non ao revés, como é común.

ROBERTO VIDAL BOLAÑO e AS LETRAS

A Real Academio Galega na última reunión aprobou dedcicarlle as Letras do ano 2013 a Roberto Vidal Bolaño. Un home de teatro que colocará a este xénero e arte no centro de todas as miradas. Roberto foi autor, director e actor. Como actor tamén traballou no cine, pero o teatro foi a súa pasión.

Creador de grupos e obras, naceu co teatro aficionado para converterse nun profesional como a copa dun pino.

Obras súas son A burla do galo, A ópera de a patacón,  Agasallo de sombras, Animaliños, As actas escuras, Bailadela da morte ditosa, Cochos, Criaturas,  Daquel Abrente, Días sen gloria, Doentes, Integral; Laudamuco, Señor de Ningures - Ledaíñas pola morte de meco,  Mar revolto, As actas escuras,  Perspectivas do teatro galego actual, Rastros, Saxo tenor, Touporroutou da lúa e do sol ou Ruada das papas e do unto o Romance dos figos de ouro dirixida aos máis pequenos.

Un ano para o teatro!

DE TRAILERS E TRILOXÍAS

As sagas comparten coas series a facilidade para facerse querer, para animar a ler. Abres o primeiro libro e adéntraste nun mundo que continuará contigo ao longo do tempo: a ambientación espacio temporal, as personaxes e a súa caraterización,... Seguiralos, porque xa serán algo teu e quererás saber que lles pasa, como van medrando... e así te vas enganchando.

A LECTURA E A VIDA

Foise Emili Teixidor. O escritor que ademais de múltiples historias de ficción (como Pa negre, que dou lugar á premiada película) escribiu ese libro de referencia para os mediadores La lectura y la vida. Cómo incitar a los niños y adolescentes a la lectura: una guía para padres y maestros,  e o artigo "Estrategias del deseo o trucos para leer" publicado no suplemento Culturas do diario La Vanguardia, que resultou ganador do VI Premio Xornalístico da Fundación Germán Sánchez Ruipérez no 2005.

Emili Teixidor acompañaranos nunha das actividades de formación de bibliotecas escolares, os "Encontros de bilbiotecas escolares de Galicia" no 2006. As súas palabras resultaron sabias e poderosas, igual que a súa presenza.

Hai unhas semanas volveunos acompañar, neste caso a través do libro citado que formaba parte dos materiais entregados ao profesorado participante na V Xornada dos Clubs realizada o 9 de xuño no Palacio de Congresos. Así de forte é o vínculo que nos unía e nos une a alguén que tanto dixo e escribiu sobre eses temas que tanto nos interesan. Un bo momento para volver ás súas obras, para seguir os seus consellos...  

A LITERATURA INFANTIL E XUVENIL A DEBATE

Sirvan estas declaracións do último premio Merlín (Marcos Calveiro) para abrir a reflexión:

"A xente segue a ver a LIX coma unha literatura de segunda división. Para min é o contrario. A mellor literatura que se fai en Galicia agora mesmo é a LIX. Hai libros extraordinarios, con moitísimo máis nivel que moita da literatura para adultos. Supoño que ten moito que ver con que os medios poñen moito máis o foco na literatura de adultos. Pero realmente a LIX é a que está a formar lectores, a que máis vende e a que máis traducións ten no mundo adiante. En fin, a min tanto me ten. Eu non escribo un libro pensando se vai ir a unha colección infantil, adolescente ou de adultos." 

VIDEOS PROMOCIONAIS

Unha boa maneira de promocionar a lectura!

Que faría SE EU FOSE UN GATO?

Se eu fose un gato con texto de Paloma Sánchez  Ibarzábal e ilustracións de Anna Lienas, está publicado na colección O de OQO editora.

Trátase dunha proposta moi interesante na que o protagonista se vai colocando na pel dun gato, por un lado, e que por outro no sitúa na situación hipotética de seguir xogando a ser diferentes animais ou, incluso, cousas.

A técnica empregada foi a da colaxe con papeis e cartóns pintados previamente en acrílico. Deste xeito, incorpora volume ao debuxo plano co obxecto de que se perciba o rústico do material. Para este traballo, aproveitou recortes de caixas de transporte, de cereais, envoltorios... para compor a ilustración tipo diorama ou escenario teatral.

A ilustración está realizada a base de colaxes e introduce personaxes dos que non se fala no texto

Unha maneira divertida de traballar a diferenza, o respecto ao outro e afondar na vida deses seres que nos rodean.

SEGUIMOS CON NOVAS de prensa

Ray Bradbury, que naceu en Illinois o 22 de agosto de 1920, xa ten data final (Os Ánxeles, 5 de xuño de 2012)

El, é un autor imprescindible que nos achegou as mellores historias de ciencia ficción, con títulos como Farenheit 451 ou Crónicas marcianas.

451 son os grados Farnenheit, aos que arde o papel, pero o título é a referencia esencial á salvagarda dos libros e das ideas, á lembranza de que nos peores momentos quéimanse libros e sempre hai alguén que os rescata aínda que sexa por medio da memoria, axudándonos a gardar a esperanza. En Farenheit 451 aparece tamén esa contradición fundamental de que son os bombeiros os que queiman e que nos fan pensar en certa teoría psicolóxica que explica que cada un busca a profesión onde poder redimir a íntima e secreta tendencia á maldade.  

Historias que desacougan pero que tamén dan lugar a accións que nos reconfortan como a das persoas libro ou a das bibliotecas vivas; xentes que lembran textos de memoria e llos van dicindo aos demais en calquera momento e lugar; persoas que relatan a súa vida porque constitúe unha biblioteca que se perderá cando morra.  Así fixeron alumnas e alumnos do IES Sanxenxo, IES de Poio, IES de Vilalonga, IES Manuel García Barros e IES de Mugardos.

Unha páxina de RTVE móstranos a súa faceta de escritor cinematográfico. 

"A galaxia está de luto" escribía o ABC Cultura.

No blog Ciudad Seva podemos seguir lendo a Bradbury.

Grazas a Xerais, por esas dúas obras en galego, na colección Fóra de xogo.

PREMIO MERLÍN DE LITERATURA XUVENIL

                                                                       

O sábado 9 de xuño, na illa de San Simón, tivo lugar a entrega dos premios Xerais e Merlín, por parte de Edicións Xerais de Galicia.

O ganador do Merlín deste ano foi Marcos Calveiro, esa descuberta da nosa literatura que conta con múltiples galardóns e do que agardamos aínda moitos máis no futuro.

Este é o listado dos recibidos ata agora:

Premio de poesía Concello de Carral no 2006, por Cartas do terceiro día.

Gañador do XVIIIº Premio Ala Delta de Literatura Infantil no 2007, por O carteiro de Bagdad.

Premio da Crítica de narrativa galega no 2008, por Festina lente.

Premio Barco de Vapor no 2008, por O canto dos peixes.

Premio White Ravens no 2008, por O carteiro de Bagdad.

Premio Fervenzas Literarias ao Mellor Libro de Narrativa para adultos no 2008, por Festina lente.

Premio Irmandade do Libro no 2009 ao Mellor Libro Galego do 2008, por Festina lente.

Premio Lazarillo no 2009, por O pintor do sombreiro de malvas.

Premio Fervenzas Literarias ao Mellor libro Xuvenil no 2010, por O pintor do sombreiro de malvas.

Premio Raíña Lupa no 2010, por Centauros do Norte.

Premio de literatura infanto-xuvenil 2011 da Asociación de Escritores en Lingua Galega, por O pintor do sombreiro de malvas.

Mención como finalista do xurado do Premio da Crítica Galicia de Creación literaria no 2011, por O pintor do sombreiro de malvas.
Premio Merlín no 2012, por Palabras de auga.

Literatura e arte

Pequeno Azul e Pequeno Amarelo.

Dunhas poucas verbas e uns anacos de papel, válese Leo Leonni, para contarnos unha boa historia que destaca a dulzura e a creatividade. Esta é a súa ópera prima, un conto que nace cando quere amenizar unha viaxe en tren aos seus netos e que se publicou, por primeira vez, en 1959.

Azul e Amarelo fúndense nun abrazo e transformánse nunha nova cor, iso entristéceos e ao chorar volven a aparecer de novo as cores primarias. Daquela, cóntanllo ás outras cores e comeza o xogo de fundirse entre eles con apertas e separarse por medio das bágoas. A mestizaxe é posible aos afectos  e a amizade, e cando nos separamos embárganos a tristeza. Desde o minimalismo unha ensinanza artística plena de valores. 

Temos que agradecer a Kalandraka que, unha vez máis, recupere estas historias que xa son clásicas.    

Foise SENDAK

Así o contan na páxina de Asociación Galega de Profesionais da Ilustración (AGPI)...

"O célebre autor de literatura infantil estadounidense Maurice Sendak, considerado un dos ilustradores de contos infantís máis importantes do século XX, morreu hoxe nun hospital de Connecticut aos 83 anos, segundo The New York Times.

Sendak saltou á fama en 1963 coa publicación de Onde viven os monstros, obra que foi adaptada nos últimos anos á gran pantalla. Os contos deste escritor e ilustrador, que introduciron o lector nun mundo máxico de grandes riquezas visuais e narrativas, foron unha parte fundamental da infancia estadounidense desde os anos sesenta."

Unha mágoa!

ACOLLERSE Á ESPERANZA

O principio é un álbum ilustrado con texto de Paula Carballeira e ilustracións de Sonja Danowski.

Unha historia de guerra, contada con tenrura desde a voz dun pequeno. Unha historia de moi poucas palabras, que malia tratar un tema tan duro remata coa esperanza leda que caracteriza á rapazada. 

Porque se che derriban a casa sempre poderás vivir no coche e así serás cidadán do mundo, cando vaias quedando sen roupa terás menos que lavar... e sempre aparecerá algo co que poder xogar, algo que provoque a risa e encha o ar de estrelas luminosas. 

Haberá que poñer as gafas de mirar positivamente, de ver os cousas boas incluso na peor das situacións. 

O principio de reconstrución está aí, cando se estrea a risa provocando unha fervenza de sons que cambia a expresión das caras.

A favor das nenas

Artur e Clementina de Adela Turín e Nella Bosnia, traducido por Eva Almazán.

Un libro de referencia publicado hai máis de trinta anos, que Kalandraka recupera e pon na nosa lingua e dentro da colección Tras os montes. Unha fábula para traballar valores democráticos ao tempo que lemos palabras e imaxes de calidade, un libro para a igualdade, para desbotar roles sexistas e discriminatorios.

Érase unha vez a historia dunha tartaruga que cando atopou parella soñaba con aventuras, pero a realidade foi outra. Cando ela quería ir a clase de pintura Artur mercáballe unha obra de arte que colocaba sobre a súa cuncha (en plena casa), cando quixo aprender música mercoulle un gramófono, ... e obxecto a obxecto foi cargando Clementina sobre as súas costas ata que cansou e ... daquela tirou con todo e botouse ao mundo, por aí anda, coa súa casiña baleira e facendo da vida unha obra de arte. 

Artur e Clementina, xunto con Rosa Caramelo e outros relatos formou parte da colección A favor das nenas.

DE ... LETRAS

Letras nos cordóns é un álbum que nos trae a saudade doutros tempos, doutras letras e outros cadernos, doutros mundos nos que só se calzaban cando ían á escola (e para entrar nela). Moita necesidade había, si, pero tamén moita valoración da educación. Diso vai, dunha familia numerosa; sete pequenos ao coidado dunha avoa, que reciben a visita da nai de vez en cando. Tantas ganas teñen de compartila que se deitan na cama de tal maneira de todos eles poidan tocala ¡e son sete!

En primeira persoa váísenos contando o día a día, desde a perspectiva dun deses nenos que asiste ao gozo da irmá máis vella ante a lectura.

Ilustracións dun realismo delicado envolto nunha atmosfera de tempo de lembranzas. O xogo das capitulares a modo de aros para xogar, asentos ou cabalos para sentarse, balcóns nos que apoiarse, mesa sobre a que colocar algo, ... auga que cae nun caldeiro ou nun vaso. Así son as letras que nas gardas se cosen con fíos ou cordóns.

Cristina Falcón Maldonado (texto)

Marina Marcolin (ilustración)
Manuela Rodríguez (traducción)

Outro recurso máis ... que chega pola mesma canle

"Datos e datas para lembrar... en pé de igualdade... e non esquecer o resto do ano"

É unha publicación editada pola Concellería de Igualdade do Concello de Vigo e nela podemos atopar unha moi boa selección de materiais de documentación, propostas de actividades, videos sobre cada tema e exemplos de experiencias levadas a cabo".

Coordinado por Mercedes Oliveira, da que lembraremos moitos materiais relaiconados con Educación para a Igualdade ou o proxecto Batas do IES Alexandre Bóveda. 

PÁXINAS CON RECURSOS

Queremos visibilizar unha serie de páxinas que contan con recursos interesante para as bibliotecas escolares.

Páxinas que nos chegan, neste caso, a través do blogue Lecturo LiteraTuro da biblioteca do CPI O Progeso de Catoira.

Trátase da páxina Galicinema (O cine tamén fala galego) onde poder atopar películas na nosa lingua. Así se presentan: "Galicinema é un blogue de cine galego e tamén de cine en galego. Comentaremos noticias de cine, críticas, especiais, tops e todo o que se nos ocorra neste blogue, iso si, sempre en galego. De momento é un pequeno proxecto, que esperamos que creza e creza ata convertirse nun grande"

E tamén un novo espazo de Música infantil creado pola Coordinadora Galega de ENDL. "Unha boa recompilación da música infantil en galego onde tamén podedes atopar videos e outros materiais premendo nos enlaces"

NOVIDADES...

Novidades ... que non son tales ou si o son. Trátase de dous libros publicados hai xa tempo peor que continúan a estar vivos.

A nena de auga e o príncipe de lume de Xabier P. Docampo, aparece de novo na colección Merlín, unha versión integramente correxida polo autor e con novas ilustracións de Xosé Cobas, realizadas de novo para esta edición, que sería a 5ª
Por outra banda, Aire negro de Agustín Fernández Paz, pasa da colección xuvenil "Fóra de xogo" á Xerais narrativa dirixida ao público adulto. Esta novela de misterio e terror, seleccionada na Lista de Honra do IBBY no ano 2002 e na dos White Ravens 2001 tamén conseguira o Premio Protagonista Jove en 2001. Agora, sae á busca de novos lectores e de seguro que os atopará. Desta maneira demóstrase, tamén a lixeireza das fronteiras entre a literatura de adultos e a xuvenil, nese ir e vir dunha a outra.

Inventarios varios

Inventario ilustrado de animais con texto de Virginie Aladjidi, ilustracións de Emmanuelle Tchoukriel e tradución de Fernando Moreiras.

Un inventario no que se recolle un cento de animais da fauna representativa de todo o mundo; animais de todo tipo clasificados xeograficamente pola zona na que viven... desde os bosques tropicais ás rexións polares pasando polos desertos, as sabanas, as montañas e bosques das zonas templadas, os océanos, as costas e ribeiras ou aquelas habitadas coma as granxas.

De un dos animais recóllese o debuxo naturalista coloreado con acuarelas, o nome científico e común e unha pequena descrición.

Un libro para mirar, aprender e incluso xogar ás adiviñas. Un verdadeiro catálogo con saber antigo e actual.