Un novo libro de poesía para primeiros lectores

Acaba de saír publicado en Xerais o  Poemas birollos para ler cos ollos de Fran Alonso, quen se encarga tamén das ilustracións. O poeta vén de recibir o Premio ao mellor proxecto literario na rede na I Gala do Libro Galego en 2016, por Poétic@.gal.

Este  libro combina poesía e imaxes nun xogo lúdico  que convida aos nenos e nenas a gozar e á vez achegarse a este xénero literario porque "a poesía non morde". Tamén ten unha presenza importante a oralidade,  a través de cancións infantís, arrolos e sortes.

Como xa sucedía en O meu gato é un poeta, a lectura pode continuar na rede xa que inclúe a ligazón a un videoxogo.

Neste enlace  tedes unha pequena mostra do libro.

Indicado para primeiros lectores, ben pode formar parte dunha selección de lecturas para o verán. 

Necesaria a poesía para nenos e nenas e tamén necesaria a poesía visual. Fran Alonso é un innovador no campo da literatura transmedia e multisoporte no panorama literario actual.

Premios Xerais 2016

O sábado 4 de xuño de 2016 resolvéronse os Premios Xerais na Illa de San Simón (Redondela). Na XXXIIIª edición do Premio Xerais resultou gañador Manuel Esteban coa novela A ira dos mansos, na VIIIª edición do Premio Jules Verne de literatura xuvenil Iria Misa con Xa non estou aquí e na XXXIª edición do Premio Merlín de Literatura Infantil David Pérez Iglesias con Todo o tempo do mundo.

A escritora Ledicia Costas, quen recibirá o próximo venres o Premio dos Clubs de Lectura, foi a mantedora literaria do acto, co discurso Todas as constelacións do mundo, que dedicou á Xeración Lamote por abrir o camiño da esperanza, lembrando a súa experiencia como lectora dende cativa.

Con Tango son tres

Kalandraka vén de publicar en galego  Con Tango son tres,  

premiado álbum de Justin Richardson e Peter Parnell, con ilustracións de Henry Cole. A tradución para o galego é de Sandra e Óscar Senra Gómez.

Cóntasenos a historia real dunha parella de pingüíns do zoo de Central Park en Nova York , que gozaron da oportunidade de teren unha cría, Tango, a primeira pingüín en ter dous pais.

Destinado para primeiros lectores, fálanos dos diferentes modelos de familia apelando á tolerancia e o respecto, valores que se promoven desde as nosas bibliotecas co programa de voluntariado, entre outros.

Este álbum é un exemplo de como unha selección coidada dos fondos da biblioteca pode contribuír á educación emocional, máis alá da denominada "autoaxuda".

Moita poesía

Como nas escolas se le moita poesía, achegamos un poemario, recén chegado ás librarías e indispensable nas nosas bibliotecas.

Poemar o mar  pecha a triloxía do mar de Antonio García Teijeiro , da que forman parte ademais Palabras do mar, editado por Embora, e En la cuna del mar, editado por Creotz ediciones.

O autor indicou na presentación do libro que concibe «o mar como un sentimento íntimo», «sinto que o mar me chama, como me chaman os poetas do mar como Alberti, Mendiño ou Martín Codax».

Publicado en Xerais, na súa colección Merlín e destinado a partir de lectores autónomos, este mar de García Teijeiro ronca, molla cos poemas, ten trenzas, anda murcho, chora por dentro e cala por fóra...nese xogo poético inundado de lirismo.

As fermosas ilustracións son de Xan López Domínguez.

1ª GALA DO LIBRO GALEGO

O pasado 14 de maio celebrouse no Teatro Principal de Santiago a primeira edición da Gala do Libro Galego, promovida pola AELG, AGE e a Federación de Libreiros, onde se recoñeceron os mellores traballos do ano 2015.

O premio ao Escritor Galego Universal foi concedido pola asemblea xeral da AELG, que decidiu outorgarllo a Pere Gimferrer, o Honorífico á libraría foi concedido pola directiva da Federación de Librarías de Galicia á Libraría Pedreira e o Honorífico á editora correspondeu á directiva da AGE, quen distinguiu os 25 anos de labor editorial de Laiovento.

Estas foron as obras gañadoras dos Premios da Gala do Libro Galego 2016:

Ensaio

Poesía Hexágono. Ollada e experiencia. Proposta e resposta nas aulas, VV. AA. Apiario

Tradución

Mocidade (Joseph Conrad), en tradución de Alejandro Tobar. Hugin e Munin

Proxecto literario na rede

Poétic@, de Fran Alonso

Literatura infantil e xuvenil

O meu pesadelo favorito, de María Solar (ilustracións de María Lires). Galaxia

Iniciativa bibliográfica

Lendo lendas, digo versos, de Antonio G. Teijeiro e Antonio Reigosa (ilustracións de Xosé Cobas). Xerais

Iniciativa cultural ou de fomento da lectura

Espazo Lectura

Libro ilustrado

Cadros dunha exposición. Modest Mussorgsky, de Xosé Cobas (texto de José Antonio Abad Varela). Kalandraka

Teatro

Xogando con gatos, de Antón Cortizas. Xerais

Xornalismo Cultural

Sermos Galiza

Narrativa

O último día de Terranova, de Manuel Rivas. Xerais

Poesía

oso, mamá, si?, de María Lado. Xerais

Obras finalistas da literatura infantil e xuvenil

• O home que sabía voar, de Xabier López López (ilustracións de Jacobo Muñiz). Tambre
• O meu pesadelo favorito, de María Solar (ilustracións de María Lires). Galaxia
• Teño uns pés perfectos, de María Solar. Kalandraka
• Todos os soños, de Xavier Estévez (ilustracións de Marcos Viso). Tambre

Obras finalistas do Libro ilustrado

• Balea, de Federico Fernández e Germán González. Kalandraka
• Cadros dunha exposición. Modest Mussorgsky, de Xosé Cobas (texto de José Antonio Abad Varela). Kalandraka
• Lendo lendas, digo versos, de Xosé Cobas (texto de Antonio G. Teijeiro e A. Reigosa). Xerais
• O home que sabía voar, de Jacobo Muñiz (texto de Xabier López López). Tambre

Cambiando o conto: Feliz feroz

Se o Lobo Feroz en lugar de ser malo quere ser bo? 

El Hematocrítico preséntanos a historia de Feliz feroz. O lobiño riquiño que lle dá unha volta ao conto clásico d´A carapuchiña vermella. Publicado en Xerais, con ilustracións de Alberto Vázquez e tradución de Anaír Rodríguez.

A irmá de Lobo Feroz está moi preocupada porque o seu fillo non é feroz, é boísimo. Feroz tranquilízaa e dille que o mande á súa casa, que el se vai encargar de convertelo nun verdadeiro lobo feroz. Será quen de conseguilo?

Destinado a primeiros lectores, o conto propón novas lecturas dalgúns contos tradicionais, onde nada é como tiñamos aprendido. Para aprendermos, con humor, que ás veces as cousas non son como parecen.

Os libros da merenda de Urco Editora

Agora que xa vén o bo tempo, non vos esquezades de levar ao patio Os libros da merenda de Urco editora... ou metelos no peto do mandilón ou na mochiliña para a casa. Son dez divertidos minilibros interactivos para os máis pequenos.

Os títulos son os seguintes:
-Don Bento, o porco fedorento
-Fariñeiro, o burro larpeiro
-Señor Fiz, o repolo feliz
-Xoana, a ra lacazana
-Besteira, a cebola falangueira
-Ramona, a cenoura sabichona
-Clemente, o polo valente
-Rosa, a vaca agarimosa
-Eladia, a ovella sabia
-Sinforoso, o can temoroso

Novos álbums para pequen@s

Kalandraka publica novos álbums destinados a primeiros lectores.

N´A viaxe de mamá Mariana Ruiz Johnson preséntanos  a experiencia dunha nai que ten que ausentarse durante un tempo do fogar por motivos laborais. Asistimos á preparación da equipaxe, a despedida no aeroporto, os cambios na rutina doméstica, a comunicación a distancia grazas aos avances da tecnoloxía e o retorno á casa.

Introdúcense os novos roles e os cambios nas familias, tan necesarios na educación dos nenos e nenas.

En Somos amigos?”  fálase da construción da amizade entre un neno e un oso, personaxes diferentes pero que se poden axudar mutuamente.

Anabel Fernández Rey estrutura a obra en dúas partes, mostrando os puntos de vista, os desexos e as necesidades de ambos ante situacións cotiás.

Nos dous álbums a tradución corre a cargo de Manuela Rodríguez.

Novas de teatro infantil

A editorial Galaxia vén de publicar na colección Árbore dúas obras de teatro: Moito morro corporation, Sociedade Ilimitada e As terapias da doutora Ledicia.

Moito morro corporation, Sociedade Ilimitada está escrita por Carlos Labraña conta e ilustrada por Rodrigo Chao. Trátase dunha historia moi divertida onde unha compañía de pallasos, trapecistas e domadores demostrarán aos pequenos e pequenas lectoras que se acheguen a eles por que o circo é “o maior espectáculo do mundo”.

Con esta obra de teatro Carlos Labraña gañou o concurso de Teatro infantil O Facho, na convocatoria de 2014.

As terapias da doutora Ledicia está escrita por Raquel Castro , con ilustracións de Almudena Aparicio. Nesta obriña, tamén cómica, unha psicóloga trata aos doentes “de corazón”. Personaxes coma o Apalpador, o Home do Saco, o Lobishome ou a Carolina serán tratados por ela,  que receita  sorrisos, brincadeiras ou ilusión.

As terapias da doutora Ledicia recibiu o Premio de Honra nos premios Estornela de Teatro que convoca a Fundación Xosé Neira Vilas, no ano 2014.

Destinadas ambas as dúas  aos lectores autónomos, ben valen  para ser lidas ou representadas nas nosas escolas.

"O último día de Terranova", o último de Rivas

Publica Manuel Rivas en Xerais a súa novela, O ÚLTIMO DÍA DE TERRANOVA, da que podemos ler unha breve recensión no blogue da editorial. 

Terranova será desde a súa lectura un espazo de múltiples ecos para os lectores e as lectoras galegas. Máis aló do bacallau e as aventuras dos mariñeiros galegos, o termo "Terranova" será a LIBRARÍA, esa  na que calquera "letraferido" quererá habitar, ou cando menos pasar unha boa tempada. Este é un libro para os amantes dos libros, para os amantes das librarías, para os resistentes, para os surrealistas, para os que defenden a memoria como única posibilidade de futuro, para os que algunha vez están En Certo Punto. para os coruñeses, para os que gostan de coñecer a historia pequena, a única que finalmente importa... e para os seguidores do escritor/poeta que mellor nos escribe. 

O último día de Terranova ha ser ben recibido nos grupos de lectura de alumnado xove (bacharelato, FP e outros)  ou  de adultos que polo país adiante se reunen para compartir experiencia lectora.

Libros - disco adicados a Manuel María na Editorial Galaxia

A editorial Galaxia publica na súa colección Sonárbore, o libro- CD Teatro de guiñol do grupo Pirilampo e con ilustracións de Iván R.

Trátase dunha escolma de poemas retranqueiros e festivos de Manuel María, dirixidos a un público infantil.
No prólogo, Xurxo Souto anima con estas palabras a escoitar o disco:

                                     ATENCIÓN!!!

                             Se escoitades este disco

                             na cama pola noite cos ollos pechados,

                             Pirilampo ha encher

                             con mil estreliñas o voso cuarto.

Tamén na mesma colección ten publicado Canta o cuco, poemas de Manuel María interpretados por Uxía e Magín Blanco, que a través da música achegan os versos do poeta aos pequenos e pequenas. O libro está ilustrado por Leandro Lamas.

Indispensables nunha biblioteca de Infantil e Primaria, e nunha selección de recursos sobre Manuel María.

Estes materiais están incluídos na maleta viaxeira de Manuel María á disposición dos centros escolares na Asesoría de Bibliotecas Escolares.

¿ A que altura está o ceo? de Jorge Mira

Jorge Mira acaba de publicar en Alvarellos Editora ¿ A que altura está o ceo? , un novo libro de divulgación científica. Escrito en colaboración con María Canosa e ilustrado por Dani Padrón.

Na cuberta do libro podemos ler:

Velaquí  unha das preguntas que se leva formulando o ser humano desde os albores da súa existencia:  Este libro vainos dar a resposta. A esta cuestión... e a moitas outras.

O físico e comunicador científico Jorge Mira realiza unha apaixonante viaxe no tempo. Comeza na época da Grecia clásica e chega ata os descubrimentos máis recentes sobre o universo.

Despois de ler estas páxinas poderemos responder a cuestións coma estas:

¿Por que vemos o ceo azul ou o Sol amarelo?

¿Como se puido saber a que altura están a Lúa, o Sol e os planetas?

¿Como é posible calcular o lonxe que está unha estrela ou unha galaxia?

¿Cal é a idade do universo?

¿E o seu tamaño?

¿Que quere dicir que o universo se expande?

¿E a que velocidade o fai?

¿É certo que foi un cura quen primeiro falou do Big Bang?..

Cara ao leste de Antía Nara

Xerais vén de publicar Cara ao leste de Antía Nara, unha investigadora galega que reside en Berlín. Esta é a súa segunda novela despois de Aquel lugar (Xerais, 2007).

Catro mozas reencóntranse, despois de dezanove anos, para velar a Isolina. A súa sobriña, emigrada en Alemaña, e tres compañeiras coas que montara unha cooperativa agraria na aldea de Al-Luaira reflexionan sobre as súas vidas desde que o seu futuro en común se vise truncado por un incendio.

Destacan na novela temas como a importancia da memoria, o velorio como momento de repaso vital, a morte, a (im)posibilidade de vivir do campo, a maternidade, a emigración, os incendios, a especulación urbanística, a vinganza etc, que flúen de xeito áxil e dramático entre as personaxes.

O alumnado de Clubs de lectura de 4º de ESO ou Bacharelato e Ciclos ben pode ser o destinatario desta breve pero intensa novela.

Adopta un animal de conto. Día Internacional do Libro Infantil 2016

Co gallo do DÍA INTERNACIONAL DO LIBRO INFANTIL, a Organización Española para o Libro Infantil e Xuvenil, OEPLI, xunto coas súas catro seccións: Asociación Galega do Libro Infantil e Xuvenil (GÁLIX), Consejo General del Libro Infantil y Juvenil, Consell Català del Llibre Infantil i Juvenil (ClijCAT) e Galtzagorri Elkartea, co patrocinio do Ministerio de Educación, Cultura e Deporte, convoca o concurso "Adopta un animal de conto".

Poden participar todos os lectores e lectoras que estean cursando Primaria ou primeiro ciclo de Secundaria, a través do seu centro docente ou dende a biblioteca. Consulta as bases en GÁLIX.

Nas actividades deste día animan a participar a centros escolares, bibliotecas e librarías na difusión da mensaxe da escritora Luciana Santori e do cartel do ilustrador Ziraldo que este ano preparou a sección brasileira do IBBY.

(Información facilitada por GÁLIX)

FONTÁN

A editorial Galaxia publica Fontán de Marcos Calveiro, coa que o autor gañou o IX Premio de Narrativa Breve Repsol 2015.

Novela biográfica de fondo histórico, trata sobre o ilustrado, matemático e topógrafo Domingo Fontán, quen elaborou o primeiro mapa científico e topográfico de Galicia, denominado a Carta Xeométrica de Galicia.

Unha das cousas que máis lle interesaba a Calveiro sobre a Fontán é  averiguar como nace a vocación de ser científico nun neno dunha aldeíña de Portas (Pontevedra) e tamén rescatar do esquezo esta figura tan importante para a ciencia. 

Coincidindo co bicentenario dos exercicios preliminares para a confección da súa Carta Xeométrica de Galicia,

o MUPEGA elaborou unha exposición sobre cartografía: 

O mundo nas mans. Cartografía escolar dos séculos XIX e XX.

Novela acaída para o itinerario lector de Xeografía de Galicia e para os clubs de lectura, 
nomeadamente os científicos. 

A historia do touro Ferdinando

Kalandraka acaba de publicar en galego A historia do touro Ferdinando”, recuperando o deseño da primeira versión en branco e negro deste clásico de 1936. A ilustración é de Robert Lawson e o texto de Munro Leaf. 
En 1938 Walt Disney gañou un Óscar pola curta que realizou a partir deste conto.

Esta historia, traducida a máis de 60 linguas, foi motivo de queima nalgúns países como Alemaña ou censura como España, onde se consideraba unha crítica á Guerra Civil pola súa mensaxe pacifista e antibelicista. Era, porén, o libro preferido de Gandhi.

Cóntasenos a historia dun touro sensible que prefire a tranquilidade do prado e o arrecendo das flores fronte á bravura que se lle presupón aos da súa raza.

Recomendado para primeiros lectores, non debe faltar na biblioteca escolar polos valores que transmite aos nenos e nenas. Nestes días podería  formar parte da selección de libros para a paz. 

Para onde imos cando desaparecemos?

Xerais publica Para onde imos cando desaparecemos?  álbum de Isabel Minhós Martíns, con ilustracións de Madalena Matoso.

A tradución do portugués é de Anaír Rodríguez.

Como non somos quen de responder a esta pregunta, o que fai o libro é fornecernos de posibles respostas, observando o que acontece ao noso redor: o sol, as nubes, as follas..., atopándoas  na imaxinación.

Este álbum vén acrecentar o listado de libros que falan da ausencia, da desaparición e da morte aos máis pequenos, que vén de ser actualizado.

Congratulámonos tamén de contar en Galicia con textos da literatura portuguesa.

A bruxa Discordia. Cancións para a paz

Nestes días que as bibliotecas escolares seleccionan materiais para conmemorar o Día Escolar da Non Violencia e a  Paz, lembramos que Mamá Cabra e Carmen Gil acaban de publicar o libro-disco A bruxa Discordia. Cancións para a paz na coleccción Sonárbore da Editorial Galaxia. As ilustracións son de Iria Fafián.

Galaxia explica que, no contexto social actual, A bruxa Discordia constitúe un álbum ateigado de valores positivos pensado e desenvolvido tendo en conta as necesidades dos nenos e nenas. Mensaxes como a importancia de compartir, de respectar ao próximo ou de convivir en harmonía escritas na súa propia linguaxe e transportadas a través dun dos vehículos máis eficaces: a música.

Material ben acaído para os primeiros lectores e para acompañar no Día da Paz.

Velaquí unha mostra das cancións que inclúe o libro-disco:

Baile da paz

Esta é a danza

da esperanza,

danza capaz

de sementar paz.

Ombro con ombro

pódese todo.

Dá un taconazo.

levanta o brazo

e con donaire

dálle ao cú aire.

Colle a orella

da túa parella.

Faille cóxegas.

Ponte en crequenas.

Esta é a danza

da esperanza,

danza capaz

de sementar paz.

Agora dá un brinco,

ou mellor cinco!,

e tres palmadas

con gargalladas.

Logo ao compás

anda cara atrás.

E cara adiante,

coma un xigante.

Pinta un momento

paz no vento.

Grita un segundo:

"paz no mundo"

Poesía infantil: O país das Andaviras

A editorial Sotelo blanco vén de publicar na súa colección Bolboreta, O país das andaviras, libro de poemas de Xoán Babarro e ilustrado por Viki Berre.

Poesías sobre paxaros e outros seres voadores da nosa fauna: merla, paspallás, galo, perdiz, lavandeira...acompañadas de ilustracións cheas de cores.

Dirixido aos primeiros lectores de Educación Infantil e 1º Ciclo de Primaria, este pequeno catálogo de aves é unha achega á poesía, ben para ler, recitar ou recrear.

O país das Andaviras

É un soño de sabores.

O arrecendo de todas as flores.

O ronsel dun bergantín. 

O que cabe no teu e no meu maxín. 

Un chapeu 

en cada flor de romeu. 

Un beixo 

en cada seixo.

Un son harmonioso

semellante ao país noso.

E mil unha andaviras de cores 

pintando a terra de rumores.

Son un animal de LLuis Llort e Salvador Macip

Xerais acaba de publicar os dous primeiros títulos da serie Son un animal, escritos por LLuis Llort e Salvador Macip, ilustrados por Sergi Cámara e traducidos do catalán por Eva Lozano Carpente.

No primeiro libro,  Son un animal: unha viaxe inesperada,  coñecemos a Armán e os seus pais científicos, a súa mascota e o singular país onde vive. Tamén descubriremos cal é o poder que o leva a vivir múltiples aventuras: transformarse no animal que toca.

En Son un animal: Armán e a fábrica podre  as amizades de Armán  xunto con el  aventúranse nunha historia para salvar a cidade e o planeta das industrias contaminantes, que producen graves danos ecolóxicos.

Indicados para lectores autónomos, Son un animal: unha viaxe inesperada e Son un animal: Armán e a fábrica podre, son uns relatos que mesturan aventuras, fantasía e humor. Neles atopamos valores como a amizade, a lealdade, a liberdade, e a defensa e protección do medio ambiente. 

Libros que conforman series, tan do gusto do noso alumnado, ben valen para a Hora de ler ou para a lectura individual cun  posterior comentario en grupo.

A estrambótica Illa do Tesouro

Bululú publica este álbum ilustrado da autoría de Pinto&Chinto. Nel fan 

unha recreación divertida d´A illa do tesouro de Stevenson. Conservan os personaxes, manteñen os fitos clave, pero cunha lente deformante segundo a súa visión humorística. Xa nos advirten na nota aclaratoria inicial: Ten coidado, porque é un libro pantasma e en calquera momento, mentres o les, pode evaporarse e desaparecer de entre as túas mans.

Indicado para lectores autónomos, esta versión pode convidar a ler a novela orixinal e introducir os clásicos nas propostas lectoras das bibliotecas escolares.

Os creadores xa publicaron, na mesma editorial  As estrambóticas viaxes de Gulliver e O estrambótico Principiño.

Teño uns pés perfectos

Teño uns pés perfectos está publicado por Kalandraka con texto de María Solar e  ilustracións de Gusti.

María Solar escribe este libro cunha dupla función, literaria e e informativa, e utiliza o recurso dun libro dentro doutro.
O personaxe principal , Melchor Sabichón, preséntase ao concurso Na busca do neno máis listo pero, malia ter preparado moitos temas, non esperaba enfrontarse a unha materia descoñecida: os pés. O protagonista atopará nun libro, que lle facilita a nai, todo canto necesita saber sobre esas extremidades inferiores: os tipos de pés, a súa anatomía e a función que cumpren para que poidamos camiñar e correr, o número de ósos que teñen, curiosidades sobre as unllas ou as pegadas que deixamos. Descobre, ao rematar o concurso, que o próximo pásanos moitas veces desapercibido.

Libro escrito con humor, destinado a lectores autónomos que queiran saber moito sobre pés.

Ler ciencia: Cor animal

Facémonos eco dun recurso informativo en galego, de interese para as bibliotecas escolares. Kalandraka publica un libro que achega a ciencia os máis pequenos. Trátase dun álbum escrito por Agustín Agra e ilustrado por Maya Hanisch. 

Cunha linguaxe adaptada ao alumnado de infantil e primaria descríbense trinta especies animais de diferentes lugares do mundo. Acompañadas dunha ilustración en collage dixital aprendemos como os animais marcan o seu terreo, como cortexan as femias, como se reproducen, como se camuflan, por que emigran, canto miden, etc.

O álbum ben pode ser unha recomendación lectora  para as familias a través da mochila viaxeira ou formar parte da selección de recursos cando se traballan os animais.

EUROPA EXPRESS , Premio Jules Verne de Narrativa Xuvenil 2015

Europa Express de Andrea Maceiras gañou o Premio Jules Verne de narrativa xuvenil, na edición de 2015.  

A novela, publicada recentemente na colección Fóra de xogo de Xerais, está protagonizada por un grupo de mozos e mozas que realizan unha viaxe Interrail por Europa ao rematar os seus estudos. Desenvólvese por distintos países e en distintos tempos (a actualidade e dez anos atrás, o tempo da viaxe) e unha postal serve para que Nico inicie o retorno ao pasado en busca de respostas ante a traxedia. Esta vai ser o pulso da vida de cada un dos personaxes, ela vai tecendo unha arañeira, unha trama psicolóxica á par da aventura de cada un deles na busca da súa identidade.

Outros temas coma o amor, a amizade, o desencanto da vida, os conflitos de identidade enriquecen a trama.

Novela recomendada para a lectura persoal e compartida.

XOSÉ NEIRA VILAS NAS BIBLIOTECAS ESCOLARES GALEGAS

La Región (versión dixital 24/9/2015)

O 8 de abril de 2011, na clausura dos Encontros PLAMBE, acompañounos Xosé Neira Vilas. Na presentación, Pilar Sampedro referiuse a el como o único clásico que aínda quedaba vivo. Nese ano estábase a celebrar o cincuentenario da publicación de Memorias dun neno labrego.

Neira Vilas falou da súa vida "emigro para ter libros" e da súa experiencia coa lectura, sobre todo cos libros para nenos e nenas.

Home xeneroso, sempre atendeu a chamada das escolas, visitando e apadriñando bibliotecas, dando charlas para rapaces e rapazas, acolléndonos en Gres de xeito agarimoso... actividades das que fomos dando conta en revistas escolares e blogs de bibliotecas.

Sempre firme na defensa da literatura galega e do ensino da lingua na escola, que coidaba fundamental para súa pervivencia.

O 26 de novembro de 2015, o noso clásico vivo, deixounos de xeito inesperado. Moitos dos seus proxectos están recén saídos como a nova edición de Cantarolas,da man da editorial Kalandraka e ilustradas por Leandro Lamas, que tivo a posibilidade de ver o día anterior á morte. Tamén ía presentar no Culturgal Romaría de historias, editado por Galaxia. Outros, aínda no forno, non terá ocasión de degustar, como ese disco con Roi Casal ou unha novela sobre o mar. Serán outros os que rematen todo ese inxente traballo iniciado por el. Ás bibliotecas escolares e á sociedade quédannos os seus libros para seren lidos, xa clásicos da literatura universal.

CONFERENCIA DE NEIRA VILAS NOS ENCONTROS DO PLAN DE MELLORA DE BIBLIOTECAS ESCOLARES 2010/2011

Un novo premio para Ledicia Costas, o Lazarillo 2015

A literatura infantil e xuvenil en galego está de noraboa xa que Ledicia Costas foi galardoada esta pasada fin de semana co Premio Lazarillo 2015 pola súa novela xuvenil Jules Verne e a vida secreta das Femmes Plante. O premio foi  convocado pola Organizacion Española para el Libro Infantil y Juvenil (OEPLI) e conta co patrocinio do Ministerio de Educacion, Cultura e Deporte.

O xurado destacou da obra obra gañadora  que se trata dunha «novela ben escrita, cunha narración fluída, unha estrutura moi ben axeitada e unha linguaxe sinxela pero elaborada, que combina con precisión elementos da realidade e ficción e imprimíndolle un aire de misterio que contribúe a facer moi emocionante a súa lectura».

A novela publicarase en Xerais no 2016.

Os noso parabéns a Ledicia Costas por este novo recoñecemento. 

Por que as sombras non teñen ollos de Luís García Mañá

Luís García Mañá publica en Xerais  Por que as sombras non teñen ollos, unha novela ambientada no territorio raiano do Couto Mixto na 2ª Guerra Mundial. O autor recrea un feito histórico acaecido nese lugar para tecer unha novela de misterio, onde non faltan a espionaxe.

Esta novela, recomendada para un público xuvenil ou adulto, pode ser un bo motivo para adentrarnos na historia do Couto Mixto, un territorio descoñecido para moitos galegos e galegas, estudado xa polo mesmo autor noutras ocasións.

ONDE VIVEN AS FADAS? Conto para ler ás escuras.

Onde viven as fadas? «Conto para ler ás escuras». Ignasi Valios i Buñuel

Neste conto, publicado por Xerais e  dirixido aos lectores máis pequenos,  o autor  proponnos xogar. Teremos que atopar as fadas e debemos iluminar o álbum para poder encontralas. Seguro que despertará nos nenos e nenas a maxia e o misterio.

Material para dar a coñecer ás familias, ben pode estar nunha mochila viaxeira ou nas suxestións de Nadal.

De novo, O lapis de Rosalía de Antón Cortizas

O lapis de Rosalía de Antón Cortizas vén de ser editado de novo da man de Xerais na colección Merlín ,con ilustracións de David Sierra.

O novo lapis de Rosalía é imaxinativo, poético, optimista, mesmo desobediente...un lapis especial para nenas de seis anos, ao que non lle gusta escribir parvadas.

Trátase dun libro moi acaído para as lecturas compartidas entre pequenos e grandes, que seguro se han divertir coas situacións  que nos propón o autor.

Para nenos e nenas de seis anos ou máis...!

Poesía Hexágono. Ollada e Experiencia. Proposta e resposta nas aulas

O selo editorial Apiario presenta este libro para docentes que queren traballar coa poesía nas aulas. Xa no prólogo, Agustín Fernández Paz quere derrubar os muros para que a literatura, neste caso a poesía, se desprenda do enfoque historicista e que estimule as capacidades creativas do alumnado. Lémbranos Fernández Paz a Rodari na Gramática da Fantasía: “A cuestión é que na escola se len os textos para xulgalos e clasificalos, non para comprendelos. A peneira da corrección retén e revaloriza as pedras, deixando escapar o ouro.”

Nos seis ensaios que compoñen o libro, seis poetas, fannos cadansúa proposta :

• A poesía non morde por Yolanda Castaño
• Curioseando por Estíbaliz Espinosa
• E inda se pode facer poesía por Celso Fernández Sanmartín
• Ler tampouco é para tanto por Carlos Negro
• Derivando na videopoesía por Antía Otero
• Poesía + graffiti nas aulas por Dores Tembrás

Tamén conta cun blog onde se pode atopar material extra para continuar co traballo na aula.

Facer chegar a poesía á mocidade é labor ben complicado. Agradecemos a Apiario esta aposta tan decidida.