19/7/19

Guía de literatura infantil e xuvenil para a igualdade


A Secretaría Xeral de Igualdade vén de publicar a  Guía de literatura infantil e xuvenil para a igualdade.

Coordinada por Pilar Sampedro, esta guía ofrece unha selección de libros publicados nos anos 2014, 2015 e 2016, distribuídos en tres tramos en función da idade ou competencia lectora. As obras escollidas alentan a reflexión e o debate sobre o papel da muller na sociedade ou o concepto de xénero e aportan referentes necesarios de mulleres, de novas masculinidades e diversidade de opcións sexuais.
Cómpre termos en conta esta guía nas seleccións que fagamos en torno á igualdade e coeducación. Asi mesmo é unha ferramenta moi útil para achegar recursos ás bibliotecas escolares.

4/7/19

LÚA EN NINGURES, a voz dos sen voz.





Xerais publicou na súa colección Merlín Lúa en Ningures de Beatriz Maceda  con ilustracións de Laura Veleiro.
Lúa e a súa familia vense na obriga de fuxir do horror da guerra e instálanse en Ningures, un campo de refuxiados onde semella que xa non queda esperanza. Porén, vai ser nese lugar onde Lúa descubra cales son os valores realmente importantes na vida das persoas ás que lle dá vozUn refuxiado é unha persoa que se ve obrigada a abandonar o seu país por causas políticas, por unha guerra...
Destinado a lectores autónomos achéganos os dereitos da infancia que se cuestionan en toda a novela: Xa ninguén lembra a Declaración de Dereitos da Infancia?Xa ninguén lembra que todos os seres humanos somos iguais?

E tamén atopamos, como se sinala en Versos e aloumiños,  a homenaxe a Principiño de Saint Exupery: ...e lembrei esa frase do Principiño que di: Pregúntome se as estrelas se iluminan co fin de que algún día cada un poida atopar a súa.

2/7/19

NO VERÁN, BANDA DESEÑADA


Animalia 2.Branco de Xosé Tomás
Publicado na colección Merlín cómics de Xerais, é a segunda entrega do autor e os protagonistas son os animais do mundo do mar e da auga.
En Animalia atopamos historias autoconclusivas cheas de ironía e humor pero tamén de reflexión ante as mudanzas do clima.



Aprende banda deseñada con Fiz de Kiko da Silva, é outra novidade da colección Xerais-Cómic de Xerais.
Neste libro, o popular personaxe de Kiko da Silva, Fiz o neno máis porco do mundo, ensínanos como se crea un cómic. Paso a paso, mediante historietas e exercicios, iranos explicando que é e como podemos crear a nosa propia banda deseñada.


Poéticas diversas, tamén no verán



POESÍA E PRAIA: RATOS DE VIAXE
Álbum de Oli, con ilustracións de Natalia Colombo e publicado en Kalandraka.
Como ben se di na presentación editorial, “cargados de equipaxe e viaxando en caravana, os ratos deste conto marchan á praia”. Rimas divertidas e encadeadas para unhas vacaciones con moitas aventuras, destinadas aos primeiros lectores.


ARTE E POESÍA: HIMBU, EL PEQUEÑO PINTOR


A poeta Raquel Lanseros escribe este fermoso libro, ilustrado por Christian Inaraja e editado por Edelvives.
En 21 poemas, cóntasenos a historia de Himbu, un pequeno elefante, que movido pola curiosidade, un día entra no estudio de pintura da súa nai e queda fascinado polo mundo das cores e a súa beleza ...
O poemario está destinado a partir de lectores autónomos.

POESÍA E MAR: VERSOS E VICEVERSOS

Kalandraka publica un diálogo poético a dúas voces, Antonio García Teijeiro e Juan Carlos Martín Ramos con fermosísimas ilustracións de Juan Ramón Alonso.

Son versos do norte e versos do sur que van e veñen como as ondas do mar, que testemuña o seu intercambio literario e lingüístico.

2/4/19

DÍA INTERNACIONAL DO LIBRO INFANTIL

O 2 de abril conmemoramos o Día Internacional do Libro Infantil,  data  de nacemento  de Hans Christian Andersen.
Achegamos  nesta data algúns títulos que deben formar parte da colección das nosas bibliotecas escolares.



O segredo do avó de Pedro Mañas, con ilustracións de Zuzanna Celej (Kalandraka, 2019), é un fermoso canto á chegada da primavera e do espertar da natureza. Este álbum é unha fonte de inspiración estética para o noso alumnado xa que as imaxes dialogan co texto, non o completan. Ao tempo ofrece recursos para a creación artística pola mestura de técnicas.


Agora non, Bernardo de David McKee (Kalandraka, 2019), un clasico que podemos ler en galego grazas á tradución de Xosé Manuel González. A temática do álbum é moi acaída co lema da edición do Día Internacional do Libro de deste ano"Os libros fannos acougar" pois necesitamos parar para escoitar.






1/4/19

Día das Artes Galegas: Luís Seoane

Para conmemorar o Día das Artes Galegas, adicado este ano a Luís Seoane, seleccionamos estes dous libros que nos achegan ao Seoane pintor e debuxante.


Botella ao mar pertence á colección Unha historia para un cadro do Museo de Belas Artes da Coruña. Neste caso é unha historia de Marilar Aleixandre inspirada no cadro As mariscadoras e ilustrado por Xosé Cobas.







Publicada en Mediavaca, esta edición conserva o formato dos debuxos orixinais e agrupa os tres libros que Seoane publicou en Arxentina (Retratos furtivos, Buenos Aires 1968, e Outros retratos furtivos, Buenos Aires 1969) e Galicia (Retratos desguello, A Coruña 1968). Son un total de 250 debuxos a liña realizados en lugares públicos de distintas cidades: Roma, Nova York, Madrid, Valencia, A Coruña etc., aos que o autor engadiu unhas liñas de texto en castelán ou galego. Nas páxinas finais do libro inclúese a transcrición e tradución de todos os textos manuscritos.

29/3/19

Historias para rirmos: Orestes perde o sentido! e O raposo aviador que voa sen motor


As historias que presentamos teñen en común a comicidade, tan demandada polo usuarios e usuarias das nosas bibliotecas.

Orestes perde o sentido!, de Rosa Aneiros, ilustrado por Kiko Da Silva, é unha novidade da colección Sopa de Libros de Xerais.
Esta historia chea de aventuras, que ten como protagonistas a Orestes e a súa irmá pequena que andan na procura  dun osiño de peluche, recomenda aos máis novos coñeceren as normas de circulación viaria.

Tamén na colección Merlín, de Xerais vén de publicarse O raposo aviador que voa sen motor, de Antonio Reigosa con ilustracións de Laura Cortés.

Destinada para primeiros lectores, este libro conta a divertida historia de Paquiño, o primeiro raposo que se fixo aviador. 



27/3/19

Algunhas propostas de lectura para o Día Mundial do Teatro

O 27 de marzo conmemoramos o Día Mundial del Teatro, que  foi creado por iniciativas do Instituto Internacional do Teatro (ITI) en 1961.
Desde as bibliotecas escolares presentamos unha selección de textos teatrais, que poden achegar a lectura dramática  ou a representación teatral ao  noso alumnado.

A raíña de Turnedó de Gloria Sanchez con ilustracións de Pablo Otero (Kalandraka, 2014) é un poema escénico no que a participación do público é fundamental para acompañar os excéntricos personaxes desta divertida corte real. A sonoridade, a rima e a estrutura acumulativa do relato son as claves para enganchar a lectura ou a representación da obra.(Presentación editorial)


O premio de textos teatrais Roberto Vidal Bolaño foi acadado por Fernando Castro Paredes coa obra de teatro A derradeira bala (Galaxia, 2018)  
Do blog De libros e outros achegamos a recensión de  Pilar Sampedro: Un xoguete tan absurdo como a guerra que é o seu tema. 
Unha traxicomedia cuns diálogos marcados pola retranca e a ironía, dise na presentación editorial.
Poucos personaxes: Luciano Cardone, as xemelgas Ramírez (Michelle e Mabel) o sarxento Unamuno e a comandante Cienfuegos. Alguén que toma a decisión de abandonar a guerra, os que o acusan de traidor, a dúbida de se o inimigo está aínda aí, detrás da outra barricada ou o silencio é a mostra de que xa a guerra rematou e... para fusilar ao desertor ou para facer a guerra só queda unha bala, a derradeira.
Riámonos da guerra, mentres nos deixen! 


O  poema Cómo el buen Don Nicanor no fue rey ni emperador de Mar Benegas, con ilustracións de Ximo Abadía (Trestristestigres, 2016) contén unha adaptación teatral realizada por Jesús Ge, para representar as aventuras de Don Nicanor.

20/3/19

O 21 de marzo, espallamos poesía

Porque a poesía non traba, enchemos as nosas bibliotecas de poemas. 

Entre as propostas, destacamos "Para facer o retrato dun paxaro" publicado en Kalandraka, porque como dín na presentación editorial "Un lenzo, unha paleta de cores e un pincel bastan para trazar as liñas da gaiola na que se acabe pousando o noso paxaro. Unha espera paciente, que pode ter a súa recompensa se a ave nos agasalla co seu canto."

Para un lectorado xuvenil propoñemos o último premio Jules Verne de literatura xuvenil  2018 Aplicación instantánea de Carlos Negro e publicado por Xerais.
Os diferentes avatares responden á pregunta Que é para ti un poema?. Eis unha das respostas:

Que é para ti un poema?

Unha motoserra do sentido completo.
Un des-corrector ortográfico.
Unha sílaba alucinada.
Un disturbio semántico.
Unha oración atea.
Unha bomba fonética.
Un punto de non retorno.

               
E, por último, recomendamos unha pequena alfaia: Poesía mínima/ Minimal Poetry de Helena Villar Janeiro, publicado en Alvarellos Editora.
Este poemario componse de 50 fotopoemas (en edición trilingüe), cousas sinxelas que constrúen o universo.

Día da narración oral: "Contar" de Pep Bruno

Hoxe, 20 de marzo, conmemórase o Día da narración oral.
Aproveitamos a efeméride para presentar o libro de Pep Bruno, Contar. Neste libro informativo o autor fala da importancia de contar e dá algunhas pistas sobre como contar contos. O libro foi publicado en febreiro de 2019 por A buen paso e as ilustracións  son de Andrea Antinori.
Recomendamos aos mediadores a súa lectura e posta en práctica nas nosas bibliotecas escolares.



7/3/19

Lecturas para o #8M


Seleccionamos para conmemorar o Día Internacional da Muller dúas historias que aínda hoxe teñen vixencia, unha publicada hai 40 anos e outra, ambientada no século XIX.


As mulleres e os homes de Catroventos Editora, con texto do Equipo Plantel e ilustracións de Luci Gutiérrez, foi publicado en 1978 mais a historia que conta está de plena actualidade xa que os cambios producidos para  acadarmos unha sociedade igualitaria non son suficientes.

O cómic Sally Heathcote. Sufragista publicado por La cúpula e coautoría de Mary M. Talbot, Kate Charlesworth e Bryan Talbot, conta a historia das mulleres inglesas que loitaron polo dereito ao voto feminino.

Ambos os dous libros forman parte das novas maletas de banda deseñada, As mulleres e os homes na de primaria e Sally Heathcote. Sufragista, na de Secundaria.

5/3/19

Singamia 1.1 e o debate científico-tecnolóxico

Xerais vén de publicar Singamia 1.1 (Queridas máquinas) de Ramón Caride Ogando, na colección Fóra de Xogo. Con este título remata a triloxía denominada AKTUAL que se iniciara con Exogamia 0.3 (2011) e continuara con Endogamia 0.2 (2013).

Os tres libros de relatos de temática científico-tecnolóxica son moi oportunos para os clubs de lectura, nomeadamente de carácter científico, que se prestan a que o lectorado experto desenvolva unha conciencia crítica e abra unha liña de debate sobre como debemos encarar este tipo de avances  desde un punto de vista ético.

"Moitos dos acontecementos destes relatos, así como o xeito en que suceden, non serían posibles hai cinco anos. Só hai que mirar ao noso redor para poder ver o que temos diante dos ollos".

27/2/19

É TEMPO DE ENTROIDO!!!

Xerais publicou a fins de 2018 o álbum É tempo de entroido! con texto de Ramón Domínguez e ilustracións de David Sierra.
O libro fai un percorrido polos diferentes entroidos galegos, á vez que vai organizando un xantar propio da festa de carnaval.
Polo álbum desfilan as figuras tradicionais do entroido como son os cigarróns, boteiros, volantes, peliqueiros, mázcaras, troiteiros, labardeiros, vergalleiros, pantallas, felos ou osos, madamas e galáns, os xenerais do Ulla, o loro Ravachol, unha merdeira viguesa e mais uns choqueiros coruñeses que foron xuntos nun chimpín a facer festa. 
O libro complétase cunha canción de Isabel Fernández Reviriego inspirada no propio texto, un karaoke  e dúas figuras para colorear, que se poden descargar no Blog de Xerais.

Múltiples posibilidades ofrece o álbum de investigación sobre os entroidos tradicionais galegos: máscaras, traxes ou a gastronomía propia da celebración.
Recomendado para primeiros lectores,  ben merece estar nas nosas bibliotecas escolares.

20/2/19

24 DE FEBREIRO: DÍA DE ROSALÍA

Próximo o día 24 de febreiro, Día de Rosalía, achegamos algunhas novidades en torno  á súa vida e obra.

A escolma de poesía rosaliana  Rosalía feminista,  realizada por Helena González Fernández en Xerais e dirixida a alumnado xuvenil.

Na presentación editorial fálasenos de que"A poesía de Rosalía de Castro agroma nun triángulo de furias: a reivindicación das mulleres; a meniña gaiteira que tatexa palabras inaugurais dunha nación non prevista; e a ira contra a precariedade, a compaixón polas persoas inocentes e tristes, a certeza da vulnerabilidade. Nese triángulo de furias afírmase a Rosalía feminista. Dálle voz á moza, á violada, á solteira, á vella, á nai obrigada a deixar o fillo só, ás mulleres confinadas entre o amor romántico e unha idea estreita de familia. Avisa dos perigos do gaiteiro da festa, do emigrante que non ha volver, da violencia do poder. Defende a xustiza pola man. E crea a viúva de vivo: esa muller soa, sen rostro, sen amor e tamén sen amo que resolve, como unha Penélope navegante, deixar de agardar.


A editorial Hoja de Lata publica unha biografía de Rosalia escrita por Luisa Carnés (narradora invisibilizada da Xeración do 27) en 1945, no seu exilio mexicano.
O prólogo foi escrito por Mª Xesús Lama, quen en 2018 gañou o Premio Nacional de Ensaio que concede o Ministerio de Cultura e Deporte de España por Rosalía de Castro. Cantos de independencia e liberdade (1837-1863).
Segundo a súa presentación editorial é "Unha obra chea de encanto e complicidade, tan rica en ambientes que parece, en moitos momentos, un conto gótico máis que un texto biográfico".
Este libro vai destinado a partir dun lectorado autónomo.

13/2/19

Algúns recursos no Día Mundial da Radio




Como cada 13 de febreiro desde o ano 2013 celebramos o Día Mundial da Radio por ser a data da creación de Radio Nacións Unidas no ano 1946.
"Os obxectivos da xornada son concienciar ao público e aos medios de comunicación acerca da importancia da radio; alentar aos encargados de tomar decisións a crear e ofrecer acceso á información a través da radio; así como mellorar as redes e a coperación internacional entre os organismos de radiodifusión."
Este ano celébrase co lema:"Diálogo, tolerancia e paz" e o poder da radio para promover o entendemento e o empoderamento das comunidades.

Lembramos algúns recursos que non debería faltar nas nosas bibliotecas escolares.



RADIO BULEBULE de Paco Nogueiras con ilustracións de David Pintor, editado por Kalandraka.
"Unha ducia de cancións divertidas, pegadizas e inspiradas nas ondas herztianas conforman a grella de programación dunha emisora comunitaria onde "o falar non ten cancelas".










Ruído de Pablo Albo, con ilustracións de Guridi e editado en Narval.
Nesta historia é prender a radio e montar un grande barullo...



En RADIO PICARIÑA podedes acceder a  unha canle de música infantil  en galego á carta.

11/2/19

Pioneiras 2, para celebrarmos o Día Internacional da Muller e da Nena na Ciencia


O 11 de febreiro foi declarado pola ONU como o Día Internacional da Muller e a Nena na Ciencia "coa finalidade de lograr o acceso e a participación plena e equitativa na ciencia para as mulleres e as nenas, e ademais para lograr a igualdade de xénero e o empoderamento das mulleres e nenas."

Aproveitamos esta data para difundir a publicación por parte de Xerais do segundo volume de Pioneiras 2, Galegas que abriron camiñde Anaír Rodríguez e con ilustracións de Abi Castillo.

1/2/19

Fondos para a biblioteca creativa: "Novos amigos" e "Como construir un hermano mayor"

Iniciamos unha selección de libros que deberían estar nos espazos creativos das nosas bibliotecas.
Pódense atopar máis recursos no Pinterest de Bibliotecas Escolares no taboleiro de Biblioteca creativa.




Novos amigos de Kalandraka presenta a un rapaz e unha rapaza unidos pola creatividade e a arte. Amósanos tamén como podemos reutilizar nas nosas creacións materiais da vida cotiá.
Asimesmo o libro fai unha lectura da capacidade integradora que ten a arte.







Cómo construir un hermano mayor da Editorial Juventud proponnos aprender anatomía a través do deseño, do xogo da creación, da manipulación e da reciclaxe. 

28/1/19

RECURSOS PARA O DÍA DA NON VIOLENCIA E DA PAZ


Desde 1964, para conmemorar a morte de Gandhi, celébrase o 30 de xaneiro o Día Escolar da Non Violencia e a Paz, recoñecido pola UNESCO en 1993. Desde as bibliotecas escolares lembramos a necesidade da educación para a tolerancia, a solidariedade, o respecto aos Dereitos Humanos, a non violencia e a paz.
É importante pór nas mans do noso alumnado recursos que fomenten esta cultura de paz e non violencia. Nestes últimos meses foron aparecendo novos libros que axudan a conformar unha sociedade máis tolerante, solidaria e non violenta. 
Achegamos tamén outros títulos publicados anteriormente. Entre eles está O nacemento do dragón,de Kalandraka. Con textos en galego e en chinés mandarín, cóntanos por que motivo o dragón é o simbolo da paz na cultura chinesa.

 O lapis máxico de Malala



Nelson Mandela e o camiño cara á liberdade













O Principio


La guerra de Catherine














El mapa de los buenos momentos


El deshielo













Vidas ocupadas


24/1/19

Títulos máis lidos nos Clubs de lectura. Curso 2017/2018

Publícanse os 50 títulos máis lidos no conxunto dos clubs de lectura adscritos o programa CLUBS DE LECTURA, da Consellería de Educación, Universidade e Formación Profesional, durante o curso 2017/2018, en centros que matriculan alumnado de ESO, bacharelato, formación profesional ou ensinanzas de réxime especial (conservatorios, escolas oficiais de idiomas, ensinanzas de persoas adultas). Durante o curso 2017/2018 participaron desta iniciativa un mínimo de 231 clubs de lectura (que foron os que recibiron asignación específica para o seu funcionamento).Unha lectura detallada desta relación fala da diversidade de lecturas presentes nestes grupos de lectura.


22/1/19

PALABRA DE BRUXA, de ANDREA BARREIRA FREIJE


Palabra de bruxa de Andrea Barreira Freije é unha das novelas do 2018 recoñecida entre as mellores en galego. Nela relátase a historia vital da última muller da casa das Xanas, que padece a persecución da Inquisición.Condenan a súa forma de vida, desapegada da tutela dos homes, libre e rebelde, perigosa para esa sociedade do medo que os inquisidores representan. Pero non todo está perdido...

Publicada na colección Costa Oeste de Galaxia, cremos que a súa lectura pode dar moito que pensar e falar cando menos nos clubs de lectura -de mozos ou de adultos- acerca daquel pasado, do noso presente e do futuro que queremos.

3/1/19

Novas de teatro: A formiga fóra do carreiro de Raquel Castro




Iniciamos o ano 2019 parabenizando á editorial Galaxia pola publicación de obras de teatro infantil galego, neste caso, A formiga fóra do carreiro de Raquel Castro.

Nela, unha formiga vai ter que enfrontarse a un feixe de animais de toda clase que non deixan de dicirlle o que debe facer e como se debe comportar cando ela, en realidade, o que quere é ser libre e feliz. 

Publicada na colección Árbore e destinada a un lectorado autónomo, A formiga fóra do carreiro ensínanos que todas e todos procuramos o noso destino.

As obras de teatro son imprescindibles nas nosas bibliotecas para facermos lecturas dramatizadas ou mesmo para a súa representación, xa que contamos con moitos grupos de teatro escolar.


13/12/18

A filla do Minotauro, un novo título de Marilar Aleixandre para lectorado xuvenil e outros.

Marilar Aleixandre volveu facela. Novamente pon nas mans das persoas mediadoras un texto magnífico para presentar a mozos e mozas e convidalos a unha experiencia de lectura das que deixan pegada. Desta vez a escritora volve á mitoloxía clásica e de alí tráenos a Miranda, A filla do Minotauro, unha rapaza afouta, curiosa, intelixente, sensible, atenta ao que pasa ao seu arredor, disposta a botar unha man nunha empresa arriscada: cómpre agochar un documento moi valioso do patrimonio cultural de Sicilia para libralo das gadoupas dos traficantes de tesouros arqueolóxicos e Miranda non dubidará en aliarse cos "bos" na defensa dese patrimonio histórico. Pero A filla do Minotauro agocha moitas outras historias e aventuras que se entrelazan a través de diferentes voces de narradores cos que Miranda se vai atopando, comezando polos seus pais, que finalmente descubren ante ela o seu segredo. Excelente texto que revisita, entreverando na aventura de Miranda, moitas outras aventuras e mitos clásicos aos que nos permite achegarnos, desfacendo algúns tópicos e desvelando algúns misterios. 

Aventura, amor, paisaxe, historia, mito, narración oral, matemáticas, arquitectura, inventos, muller, misterio, mafias... Quen dixo que non hai libros atractivos en galego para por nas mans dos nosos lectores?

Cómpre agradecer á Editorial Galaxia a publicación desta novela que mereceu o Premio Raíña Lupa de Literatura Infantil e Xuvenil 2017 e que, de seguro, proporcionará unha vivencia de lectura grata a novos e maiores. Publicada na colección Costa Oeste, os equipos de biblioteca escolar deberán lela para valorar a súa recomendación pero desde aquí pensamos que non debe faltar en ningunha biblioteca dun centro de secundaria (lectorado xuvenil). Como pasa coa auténtica literatura, A filla do Minotauro ten varios niveis de lectura e pode ser tamén de interese para outros lectores e lectoras con gaña de aventura. Ademáis, é unha novela "con mapa", desas que chaman á viaxe imaxinaria e convidan á viaxes reais "para cando se poida". 


O BESTIARIO CIENTÍFICO DE ANXOS NOGUEIROSA, I Premio María Víctoria de Literatura Xuvenil



Urco vén de publicar a novela  O BESTIARIO CIENTÍFICO DE ANXOS NOGUEIROSA de Antonio Manuel Fraga, coa que o autor gañou o I Premio María Víctoria de Literatura Xuvenil. As ilustracións son de Víctor Rivas. 
A acción sitúase no ano 1933 no Sanatorio Marítimo de Oza dos Ríos, onde coinciden Suso e Tila para pasaren unhas colonias de verán. 
Cunha intención clara de homenaxear á científica galega Ángeles Alvariño e á mestra Elvira Bao, a novela vai intercalando a vida no hospital e as descricións do "Liber Bestiarium Scientificus", bestiario máxico galego onde se recompilan e describen animais fabulosos. O libro chegou a mans de Suso dunha forma estraña e vincúlase con Tila, cando conflúen ambas as dúas historias.
A novela ben pode estar nas seleccións lectoras para o Nadal que fan as nosas bibliotecas escolares ou ser tida en conta para un club de lectura de lectores xa expertos. 

30/11/18

Novidades de Bululú: "Novo Mundo. Isabel Zendal na Expedición da vacina"


Rematamos o mes de novembro cunha novidade editorial vinculada ás ciencias en galego. Trátase de Novo Mundo. Isabel Zendal na Expedición da vacina con texto e ilustracións de El primo Ramón (Borja López Cotelo  e María Olmo Béjar)  e publicado pola editorial Bululú. Patricia Zaera Landeira fixo a tradución ao galego.
O libro relata a expedición de Isabel Zendal portando a vacina da variola a  América. A OMS ten recoñecida a esta muller como a primeira enfermeira da historia que participou nunha misión internacional de saúde pública.
No  álbum,  as ilustracións adquiren moito protagonismo e dannos oportunidade de traballar planos da cidade da Coruña e mapas da época (inicios do século XIX) e mesmo procurar as pegadas da historia da cidade e dalgún pintor moi recoñecible. Adiviñade!
Libro indispensable para as nosas bibliotecas escolares, tanto para a selección de ciencias como para a lectura atenta da mudanza dos tempos.

23/11/18

Novidades para conmemorar o 25N


Presentamos algúns novos recursos para conmemorarmos o 25N desde as bibliotecas escolares


Vermella de  Sabela Losada Cortizas , con  ilustracións de Minia Regos  vén de gañar ex aequo o I PREMIO FINA CASALDERREY de literatura infantil pola igualdade (2018). 
Na presentación editorial fan a seguinte recensión:

Cando Flor atopa unhas pingas de sangue no cuarto de baño comeza, xunto con Leo, a investigación de tan estraño suceso... Foi un accidente? Quen é a vítima? 
Serán quen de resolveren este enigma?

Na colección Mulleres bravas da nosa historia de Urco Editora, vén de publicarse Pepa, a Loba de Ledicia Costas con ilustracións de Eva Agra.

Na web da editorial fan a seguinte recensión: Xela é unha nena que ten moi claro o que quere ser de maior: bandoleira. A pesar de que á súa nai non lle chista nadiña esta idea, para a rapaza non hai nada mellor no mundo que sentar a carón da avoa e escoitar, unha e outra vez, historias sobre a nosa bandoleira, sobre Pepa a Loba, a muller afouta que a pesar de todos os obstáculos que a vida lle puxo diante, conseguiu ser a capitá dunha gavela de homes e axudar a quen o precisaba. Xela nunca ten suficiente, sempre quere saber máis. E vós, queredes saber quen foi Pepa a Loba?

Da autoría de Isabel Thomas e Anke Weckmann, Marie Curie forma parte da colección Pequeños relatos de grandes historias da Editorial Blume. Nesta preséntanse figuras femininas relevantes da historia .
Reconquista de Antía Yañez, ilustrada por Ana Pedreira, e a outra obra gañadora ex do I PREMIO FINA CASALDERREY de literatura infantil pola igualdade (2018).
Na web da editorial atopamos a seguinte información sobre o libro: 
No patio do colexio de Lúa prodúcese todos os días unha invasión que deixa moitas nenas e nenos sen espazo para desfrutar do seu tempo de recreo. Porén, grazas á súa tenacidade, Lúa vai poñer en marcha unha pequena onda que rapidamete se converte nun tsunami de solidariedade.



Marta no da besos de Belén Gaudes e Pablo Macías, publicado pola editorial  Cuatro tuerkas, forma parte da colección Ande yo valiente, que busca que os nenos e as nenas crezan libres e sen estereotipos. Nesta historia, Marta da bicos a quen quere e cando ela quere